Jénesis 42

José Nia Maun Sira Baa Ejitu

1Bainhira Jacó hatene katak batar iha Ejitu, nia dehan ba ninia oan mane sira, “Nusaa mak imi hateke ba malu deit?”#42:1 Lian Ebreu, ‘haree’; hanesan ho liafuan ‘hateke’ nebee tuir mai nee. 2No nia dehan, “Tebes, hau rona ona katak batar iha Ejitu. Tuun ba Ejitu no sosa hosi nebaa hodi ita bele moris hela no la mate.” 3José nia maun nain sanulu tuun ba hodi sosa batar iha Ejitu. 4Maibee Jacó la haruka Benjamin, José nia alin, atu baa hamutuk ho ninia maun sira tanba nia dehan, “Keta halo be buat aat hasoru nia.” 5Israel nia oan mane sira mai hodi sosa ai haan hamutuk ho ema seluk tanba rai hamlaha kona mos rai Kanaan.

6José mak governadór iha rai nebaa no nia faan ai haan ba ema hotu iha rai nee. No José nia maun sira mai no hakneak ho oin ba rai iha José nia oin. 7José haree ninia maun sira no nia konhese sira maibee nia la foo sai ninia aan ba sira. Nia koalia hirus ho sira no nia husu, “Imi hosi nebee?” Sira hataan, “Hosi rai Kanaan hodi sosa ai haan.” 8No José konhese ninia maun sira maibee sira la konhese nia. 9José hanoin hetan ninia mehi nebee nia mehi kona ba sira, no nia dehan ba sira, “Imi mak espiaun! Imi mai hodi buka rai nee nia fatin nebee fraku.”#42:9 Ebreu ‘fatin nebee molik’, hodi haree oinsaa ataka rai nee. 10Sira hataan ba nia, “Lae, ami nia senhor, maibee ita boot nia atan ami nee mai hodi sosa ai haan. 11Ami hotu mak oan mane sira hosi aman ida deit. Ami koalia loos, ita boot nia atan ami nee laos espiaun.” 12José dehan, “Lae! Maibee imi mai hodi buka rai nee nia fatin nebee fraku.” 13Sira dehan, “Ita boot nia atan ami nee mak ema nain sanulu resin rua. Ami mak oan mane sira hosi mane ida iha rai Kanaan. Tebes, alin ikun sei hela ho ami nia aman, no ida la iha ona.” 14José dehan ba sira, “Nee mak hanesan hau hatete ona, ‘Imi mak espiaun’. 15Imi bele prova aan hanesan nee: hodi Faraó nebee moris, imi sei la sai hosi fatin nee, só deit imi nia alin ikun mai iha nee. 16Haruka ema ida hosi imi nia leet hodi baa no lori mai imi nia alin nee. Imi restu sei tama ba komarka too imi nia istória prova loos ona, hodi haree katak imi koalia loos ka lae. Se lae, hodi Faraó nebee moris, imi mak espiaun duni.” 17No nia hatama sira hamutuk ba iha kadeia too loron tolu. 18Iha loron terseiru nia dehan ba sira, “Halo tuir hanesan nee no imi sei moris, tanba hau hamtauk Maromak. 19Se imi koalia loos, husik ema ida hetan kastigu hela iha kadeia laran nee no imi restu bele baa. Lori batar nee tanba imi nia uma kain sira hasoru rai hamlaha. 20Maibee lori imi nia alin ikun mai fali hau hodi prova imi nia liafuan. Nunee imi sei la mate.” No sira halo tuir. 21Sira dehan ba malu, “Tuir lo-loos, ita hetan terus nee tanba ita nia sala uluk kona ba ita nia alin. Ita haree ninia terus iha ninia klamar bainhira nia husu ita atu hatudu grasa maibee ita la rona.” 22Ruben hataan ba sira no dehan, “Laos katak hau koalia ona ba imi no dehan, ‘Keta halo sala hasoru labarik nee’, maibee imi lakohi rona. Tebes, ita tenki selu fali kona ba ninia raan.” 23Sira la hatene katak José kompriende sira, tanba nia koalia ho sira liu hosi ema ida nebee tradus ninia liafuan. 24No nia fila oin hosi sira no tanis. Depois nia fila ba sira no koalia ho sira. Nia foti Simeão no kesi nia iha sira nia oin. 25Depois José haruka ema enxe nakonu sira nia karoon sira ho batar no foo fali ema ida-idak nia osan iha ninia karoon no foo bukae hodi haan iha dalan. Nunee ema halo hanesan nee ba sira.

26Sira tau batar nee ba sira nia kuda buru sira no sai hosi fatin nee. 27No bainhira sira too iha fatin atu toba, ema ida loke ninia karoon hodi foo haan ba ninia kuda buru no nia haree ninia osan nee iha hela saku nia ibun. 28Nia dehan ba ninia maun-alin sira, “Ema hatama fali hau nia osan. Osan nee sei iha hau nia karoon laran!” No sira nia fuan laran tuk-tuku. Sira sai tauk no dehan ba malu, “Saida mak Maromak halo ba ita?”

29Bainhira sira too tiha sira nia aman Jacó iha rai Kanaan, sira konta buat hotu nebee akontese ba sira no dehan, 30“Mane ida nebee nai ulun iha rai nebaa, nia koalia hirus mai ami, no nia hanoin katak ami mak espiaun iha rai nebaa. 31No ami dehan ba nia, ‘Ami koalia lo-loos. Ami laos espiaun. 32Ami mak maun-alin sira nain sanulu resin rua, oan mane sira hosi ami nia aman. Alin ida la iha ona no alin ikun sei hela ho ami nia aman iha rai Kanaan.’ 33No mane ida nebee nai ulun iha rai nebaa dehan mai ami, ‘Liu hosi liafuan nee mak hau bele hatene katak imi koalia lo-loos: husik ema ida hosi imi nia leet hodi hela ho hau, no foti ai haan ba imi nia uma kain nebee ai haan la iha no baa. 34Depois lori mai hau imi nia alin ikun. Nunee hau sei hatene katak imi laos espiaun maibee ema loos. Depois hau sei husik imi nia maluk ida nee no imi bele lao ba-mai iha rai nee.’”

35Bainhira sira hasai ai haan hosi sira nia karoon sira nee, tebes, ema ida-idak hetan ninia osan iha ninia karoon. Bainhira sira no sira nia aman haree sira nia osan nee, sira tauk. 36Sira nia aman Jacó dehan ba sira, “Imi halakon tiha hau nia oan sira: José la iha, Simeão la iha no imi sei lori Benjamin. Buat hotu nee hasoru hau.” 37Ruben koalia ho ninia aman no dehan, “Se karik hau la lori fali Benjamin ba ita, nunee ita bele oho hau nia oan mane rua. Entrega nia ba hau nia liman no hau sei lori nia mai fali.” 38Maibee Jacó dehan, “Hau nia oan mane sei la tuun ba hamutuk ho imi. Tanba ninia maun mate ona, no hela nia deit. Se karik buat aat hasoru nia iha dalan nebee imi lao, nunee imi sei hatuun hau nia fuuk mutin ba rate ho laran tristi.”

Currently Selected:

Jénesis 42: BK

Highlight

Copy

Compare