Jénesis 43

Maun-Alin Sira Fila Fali Ba Ejitu

1Rai hamlaha boot liu kona rai nee. 2Bainhira sira haan hotu batar nebee sira lori hosi Ejitu, sira nia aman dehan ba sira, “Baa fali no sosa ai haan uitoan.” 3Judá hataan ba nia, “Mane ida nee koalia klaru ona mai ami no dehan, ‘Imi la bele haree fali hau nia oin, só imi nia alin mane hamutuk ho imi.’ 4Se ita haruka ami nia alin mane nee baa ho ami, nunee ami sei tuun ba no sosa ai haan ba ita. 5Maibee sei ita la haruka nia, ami sei la tuun ba. Tanba mane nee dehan ona, ‘Imi la bele haree fali hau nia oin, só imi nia alin mane hamutuk ho imi.’” 6Israel dehan, “Tanba saa mak imi halo aat mai hau no foo hatene ba mane nee katak imi sei iha alin mane ida?” 7Sira hataan, “Mane nee husu deit kona ba ami nia moris no ami nia família. Nia husu, ‘Imi nia aman moris hela ka? Imi iha alin mane ida tan ka?’ No ami foo hatene ba nia tuir ninia pergunta. Oinsaa ami bele hatene katak nia atu dehan, ‘Lori imi nia alin tuun mai’?” 8Judá dehan ba ninia aman Israel, “Haruka labarik nee baa hamutuk ho hau, no ami sei hamriik no baa, hodi ami bele moris no la mate, inklui ami no ita no ita nia oan kiik sira. 9No hau rasik sei sai garantia ba nia, no ita bele husu hetan nia hosi hau nia liman. Se hau la lori nia mai fali no rai nia iha ita nia oin, ita bele foo sala nee mai hau too rohan laek. 10Tanba se karik ami la dada tempu ona, ami bele ba-mai ba dala rua ona.”

11Nunee sira nia aman Israel dehan ba sira, “Se karik tenki hanesan nee agora, entaun halo tuir liafuan nee: lori ai fuan sira nebee diak liu hosi rai nee iha imi nia sanan sira, no lori prezenti ida ba mane nee, mina balsamu uitoan, bani been uitoan, ai morin ladanu, mira, pistásia no amendueira sira.#43:11 Mina no produsaun nebee iha folin, pistásia no amendueira mak fuan nebee kiik no toos hanesan forai maibee kuu hosi ai huun hanesan kaju. 12No lori osan dala rua iha imi nia liman. Lori fali osan nebee imi hetan iha imi nia karoon. Karik sira tau sala. 13Lori mos imi nia alin mane. Hamriik ba no fila fali ba mane nee. 14No hau hein katak Maromak Kbiit Makaas sei foo laran luak ba mane nee katak nia bele haruka sai imi nia maun seluk nee no mos Benjamin. Se karik hau lakon sira, entaun hau lakon ba.”

15Entaun mane sira nee lori prezenti ida nee, osan dala rua no Benjamin. Sira hamriik no tuun ba Ejitu no hamriik iha José nia oin.

16Bainhira José haree Benjamin hamutuk ho sira, nia koalia ba mane ida nebee tau matan ba ninia uma no dehan, “Lori mane sira nee ba hau nia uma, oho animál ida no prepara ba, tanba mane sira nee sei haan meiudia ho hau.” 17No ema ida nee halo tuir José nia liafuan. Ema nee lori mane sira nee ba José nia uma. 18Mane sira nee sei tauk, tanba ema lori sira ba José nia uma no sira dehan, “Tanba osan nebee ami hetan iha ami nia karoon iha tempu primeiru, tanba nee mak nia lori ami tama uma nee. Hodi nunee nia bele halo aat mai ami, no kastigu ami, no halo ami sai ninia atan sira no foti ami nia kuda buru sira.” 19Sira baa ema ida nebee tau matan ba José nia uma no sira koalia ho nia iha odamatan ba uma nee, 20no sira dehan, “Oh senhor, loos duni ami tuun mai ba dala ida hodi sosa ai haan. 21Bainhira ami lao fila fali too iha fatin atu toba, ami loke ami nia karoon sira, no tebes, mane ida-idak nia osan mak iha ninia karoon nia ibun laran, ami nia osan hotu. Nunee ami lori mai fali iha ami nia liman. 22No ami lori osan tan hodi sosa ai haan. Maibee ami la hatene see mak tau osan nee iha ami nia karoon.” 23Mane nee hataan, “Salóm, keta tauk. Imi nia Maromak, no imi nia aman nia Maromak mak foo riku-soin iha imi nia karoon. Hau hetan ona imi nia osan.” Depois nia lori Simeão sai ba sira. 24Mane nee lori sira tama ba José nia uma. Nia foo bee ba sira hodi fasi sira nia ain no nia foo haan ba sira nia kuda buru sira nee. 25No sira prepara sira nia prezenti hodi foo ba José bainhira nia mai iha meiudia tanba sira rona katak sira atu haan iha nebaa. 26Bainhira José fila ba uma, sira lori prezenti ida nee ba uma laran no hakneak ho oin ba rai iha José nia oin. 27José husu sira oinsaa no dehan, “Imi nia aman nebee katuas ona nee diak ka lae? Nia moris hela ka?” 28Sira hataan, “Ita boot nia atan ami nia aman sei diak no nia moris hela.” No sira hakruuk fali no hakneak iha nia oin. 29José foti nia matan no haree ninia alin Benjamin, nebee ninia inan rasik nia oan mane, no nia husu, “Ida nee mak imi nia alin mane nebee imi konta uluk mai hau ka?” No nia dehan, “Maromak haraik grasa ba o, hau nia oan mane.” 30No José sai lalais, tanba nia laran hanoin tebe-tebes ba ninia alin mane nee. Nia buka fatin hodi tanis, no nia tama ba ninia kuartu no tanis iha nebaa. 31Depois nia fasi ninia oin no sai fali. Nia kontrola aan no dehan, “Tau hahaan ba.” 32No atan sira lori hahaan ketak ba nia, no hahaan ketak ba sira, tanba iha ema Ejitu seluk nebee haan ho José. Ema Ejitu la haan hamutuk ho ema Ebreu, tanba buat nee mak sala ba ema Ejitu. 33José nia maun-alin sira tuur iha nia oin, oan mane primeiru tuir ninia direitu nudar oan boot too oan mane ikun tuir ninia idade joven nian. No mane sira nee haree ba malu no hakfodak. 34José haruka ema foo haan ba sira hosi ninia meza, maibee Benjamin nia hahaan mak barak liu dala lima kompara ho nia maun sira seluk. Nunee sira haan-hemu too bosu#43:34 Liafuan iha Ebreu dehan katak sira hemu too lanu ho sentidu katak sira bosu no kontenti. ho José.

Currently Selected:

Jénesis 43: BK

Highlight

Copy

Compare