Jénesis 46
46
José Lori Ninia Família Baa Ejitu
1Israel halo viajen ho buat hotu nebee nia iha no nia baa too Beer-Seba. Nia oferese sakrifísiu sira ba nia aman Isak nia Maromak. 2Maromak koalia ho Israel liu hosi vizaun sira iha kalan, no Nia dehan, “Jacó, Jacó!” No Jacó hataan, “Hau mak nee.” 3Nia dehan, “Hau mak Maromak, o nia aman nia Maromak. Keta tauk atu tuun ba Ejitu tanba iha nebaa Hau sei halo o sai nasaun ida nebee boot. 4Hau rasik sei tuun ba Ejitu ho o, no tebes Hau sei lori imi sai fali. No José nia liman sei taka o nia matan.”
5Jacó sai hosi Beer-Seba. Israel nia oan sira lori sira nia aman Jacó, sira nia oan kiik sira, no sira nia feen sira iha kuda kareta boot sira nebee Faraó mak haruka hodi tula sira. 6Sira lori sira nia animál sira no sira nia sasaan nebee sira hetan iha rai Kanaan no sira baa too iha Ejitu, Jacó hamutuk ho ninia família tomak. 7Jacó tama ba Ejitu hamutuk ho ninia oan mane sira, bei-oan mane sira, oan feto sira, bei-oan feto sira no ninia família tomak.
8Ida nee mak Israel nia oan sira nia naran nebee tama ba Ejitu, nebee Jacó no ninia oan mane sira: Ruben mak Jacó nia oan primeiru. 9Ruben nia oan mane sira: Hanok, Palu, Hezron no Karmi. 10Simeão nia oan mane sira: Jemuel, Jamin, Ohad, Jakin, Zoar no mos Saul nebee oan mane hosi feto Kanaan. 11Levi nia oan mane sira: Gerson, Koat no Merari. 12Judá nia oan mane sira: Er, Onan, Sela, Perez no Zera. Maibee Er no Onan mate iha rai Kanaan. Peres nia oan mane sira mak Hezron no Hamul. 13Isakar nia oan mane sira: Tola, Puva, Job no Simron. 14Zebulón nia oan mane sira: Sered, Elon no Jaleel. 15Ema sira nee mak Lea nia oan mane sira nebee nia hetan ba Jacó iha Padan-Aram, ho ninia oan feto Dina. Ninia oan mane no oan feto sira nee hamutuk tolu-nulu resin tolu.
16Gad nia oan mane sira: Zifion, Hagi, Suni, Ezbon, Eri, Arodi no Areli. 17Aser nia oan mane sira: Jimna, Isua, Isui, Beria no sira nia alin feto Sera. Beria nia oan mane sira: Heber no Malkiel. 18Ema sira nee mak oan mane sira hosi Zilpa, feto nebee Labão foo ba nia oan feto Lea. Zilpa hetan oan sira nee ba Jacó - ema nain sanulu resin neen.
19Oan mane sira hosi Rakél, Jacó nia feen: José no Benjamin. 20José hetan oan mane rua iha rai Ejitu: Manasés no Efraim, nebee hetan hosi Asenat, oan feto hosi Potifera, amu lulik iha On. 21Benjamin nia oan mane sira: Bela, Beker, Asbel, Gera, Naaman, Ehi, Ros, Mupim, Hupim no Arde. 22Ema sira nee mak oan mane nebee mai hosi Rakél - hamutuk ema nain sanulu resin haat. 23Dan nia oan mane: Husim. 24Naftali nia oan mane sira: Jazeel, Guni, Jezer no Silem. 25Ema sira nee mak oan sira hosi Bila, feto nebee Labão foo ba nia oan feto Rakél. Bila hetan oan sira nee ba Jacó - hamutuk ema nain hitu.
26Ema hotu nebee tama ba Ejitu ho Jacó, nebee mai hosi ninia isin, nebee la inklui ninia oan sira nia feen sira, mak ema nain neen-nulu resin neen. 27José nia oan mane sira nebee moris iha Ejitu mak ema nain rua. Nunee ema hotu iha Jacó nia uma kain, nebee tama ba Ejitu hamutuk ema nain hitu-nulu.
Jacó Hasoru José
28Jacó haruka Judá baa uluk nia hodi baa José hodi hatudu dalan ba Gosen. Nunee sira too iha rai Gosen. 29José prepara ninia kuda kareta no nia sae ba hodi hasoru ninia aman Israel iha Gosen. Nia hatudu aan ba ninia aman no hakuak nia no tanis kleur iha nia aman nia kakorok. 30Israel dehan ba José, “Agora husik hau mate tanba hau haree ona o nia oin, no o sei moris hela.” 31José dehan ba ninia maun-alin sira, no ba ninia aman nia uma kain, “Hau sei baa no foo hatene ba Faraó no dehan ba nia, ‘Hau nia maun-alin sira, no hau nia aman nia uma kain, nebee uluk iha rai Kanaan, agora too ona mai hau. 32No ema sira nee mak bibi atan sira, tanba sira nia servisu mak hakiak animál sira. Nunee sira lori sira nia bibi lubun sira, karau lubun sira no buat hotu nebee sira iha.’ 33Bainhira Faraó sei bolu imi, no nia dehan, ‘Imi halo servisu saida?’ 34Nunee imi sei dehan, ‘Ita boot nia atan sira nia servisu kona ba hakiak animál sira hosi tempu nebee ami sei joven too agora, hanesan ami nia bei-ala sira.’ Hodi nunee imi bele hela iha rai Gosen, tanba bibi atan hotu mak foer loos ba ema Ejitu sira.”
Currently Selected:
Jénesis 46: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
