Jénesis 47

Jacó Nia Família Hela Iha Gosen

1José baa no foo hatene ba Faraó no dehan, “Hau nia aman no maun-alin sira, no sira nia bibi lubun sira, karau lubun sira no buat hotu nebee sira iha, mai ona hosi rai Kanaan. No tebes, sira too iha rai Gosen. 2José hili ninia maun nain lima no lori sira baa hasoru Faraó. 3Faraó dehan ba José nia maun sira, “Imi halo servisu saida?” Sira hataan ba Faraó, “Ita boot nia atan sira mak bibi atan, hanesan ami nia bei-ala sira.” 4No sira aumenta liafuan ba Faraó, “Ami mai hodi lao ba-mai iha rai nee, tanba ita boot nia atan sira la iha duut hodi foo ba ami nia bibi lubun sira, tanba rai Kanaan hamlaha boot. Nunee, favór ida, husik ita boot nia atan sira hela iha rai Gosen.” 5Faraó koalia ho José no dehan, “O nia aman no maun-alin sira mai ona too o. 6Rai Ejitu mak iha o nia oin. Haruka o nia aman no maun-alin sira baa hela iha rai nebee diak liu. Husik sira hela iha rai Gosen. Se o hatene ema ruma iha sira nia leet nebee iha forsa, entaun foo knaar ba sira hodi tau matan ba hau nia animál sira.”

7Depois José lori mai ninia aman Jacó hodi hasoru Faraó, no Jacó foo bensaun ba Faraó. 8Faraó dehan ba Jacó, “Ita tinan hira ona?” 9Jacó hataan ba Faraó, “Tempu nebee hau halo viajen durante hau nia moris nee too tinan atus ida tolu-nulu. Tempu nee mak uitoan deit no aat durante hau nia moris. No hau la moris naruk too hanesan hau nia bei-ala sira nia tempu bainhira sira halo viajen durante sira nia moris.” 10Jacó foo bensaun ba Faraó, depois nia sai hosi Faraó nia prezensa. 11José lori ninia aman no maun-alin sira no foo fatin ba sira iha rai Ejitu, iha rai nebee diak liu, rai iha Ramesés, tuir Faraó nia orden. 12José foo ai haan ba ninia aman no nia maun-alin sira. Nia foo ai haan ba ninia aman nia uma kain tomak tuir sira nia família sira.

José No Rai Hamlaha Boot

13Iha tempu nebaa, iha rai hotu ai haan la iha tanba hamlaha boot tebes. Nunee rai Ejitu no rai Kanaan sai fraku tanba rai hamlaha. 14José halibur osan hotu nebee iha rai Ejitu no rai Kanaan tanba ema sosa batar nee. No José lori osan nee ba Farão nia uma. 15Bainhira osan hotu ona iha rai Ejitu no iha rai Kanaan, ema Ejitu hotu mai ba José no dehan, “Foo ai haan mai ami, nusaa mak ami mate iha ita boot nia oin?” Tanba osan la iha. 16José dehan, “Foo imi nia animál sira, no hau sei foo ai haan troka imi nia animál sira, se osan la iha.” 17Entaun sira lori sira nia animál sira ba José. No José foo ai haan ba sira troka sira nia kuda, bibi lubun, karau lubun no kuda buru sira nee. Nia foo ai haan ba sira troka ho sira nia animál sira nee durante tinan ida tan. 18Bainhira tinan nee remata, sira ba fali José iha tinan tuir mai no dehan ba nia, “Ami sei la subar hosi ami nia senhor katak ami nia osan uza hotu ona. Ami nia senhor iha mos ami nia animál lubun sira. Agora ami la iha buat ida iha senhor nia oin – só deit ami nia isin lolon sira nee no ami nia rai. 19Nusaa mak ami no ami nia rai sei mate iha ita boot nia oin? Sosa ami no ami nia rai troka ho ai haan, nunee ami no ami nia rai sei sai atan ba Faraó. Foo batar mai ami hodi ami bele moris hela no la mate, no hodi rai nee la lakon.”

20Entaun José sosa rai tomak iha Ejitu ba Faraó, tanba ema Ejitu hotu faan sira nia rai, tanba hamlaha boot nee domina sira. Nunee rai nee sai Faraó nian. 21José muda ema hotu ba sidade sira hosi Ejitu nia área tomak, hosi sor-sorin. 22Só deit nia la sosa amu lulik sira nia rai tanba amu lulik sira hetan ai haan hosi Faraó no sira sei haan ai haan nebee Faraó foo hela ba sira. Nunee sira la faan sira nia rai.

23Depois José dehan ba povu nee, “Tebes, ohin loron hau sosa imi no imi nia rai ba Faraó. Haree fini nee, lori ba no kuda iha rai. 24No tuir mai, imi tenki foo hosi rezultadu nee parte ida hosi parte lima ba Faraó, no parte haat mak imi nian hodi rai fini, no hetan ai haan, no foo haan ba imi nia uma kain sira no foo haan ba imi nia kiik-oan sira.” 25Povu hataan, “Ita boot mak salva ona ami nia moris. Husik ami hetan grasa iha ami nia senhor nia oin, tanba ami sei sai Farão nia atan sira.” 26José halo lei ida iha rai Ejitu nebee sei iha too ohin loron, katak Faraó tenki hetan parte ida hosi parte lima. Só deit la inklui amu lulik sira nia rai, nebee la sai Faraó nian.

27Israel hela iha rai Ejitu, iha área Gosen. Sira hetan riku-soin iha nebaa, no sira aumenta ba beibeik too barak loos. 28Jacó hela iha rai Ejitu tinan sanulu resin hitu tan. Nunee Jacó nia idade kompletu mak tinan atus ida haat-nulu resin hitu. 29Bainhira Israel nee besik atu mate, nia bolu ninia oan mane José no dehan ba nia, “Agora, se hau hetan grasa iha o nia oin, favór ida, tau o nia liman iha hau nia kelen okos. Hatudu domin metin no laran loos mai hau no, favór ida, la bele hakoi hau iha Ejitu. 30Maibee hau sei mate hamutuk ho hau nia bei-ala sira, no o sei lori hau sai hosi Ejitu no hakoi hau iha hau nia bei-ala sira nia rate.” José hataan, “Hau sei halo tuir apaa nia liafuan nee.” 31Jacó dehan, “Jura mai hau.” No José jura ba nia. Depois Israel hakruuk aan iha ninia kama ulun.

Currently Selected:

Jénesis 47: BK

Highlight

Copy

Compare