Jénesis 48

Bensaun Ba Efraim No Manasés

1Liu tiha nee, ema ida foo hatene ba José, “Tebes, ita boot nia aman moras.” Entaun José baa hamutuk ho nia oan mane rua, Manasés no Efraim. 2Ema foo hatene ba Jacó, “Tebes, ita nia oan mane José mai atu hasoru ita.” No Israel hakaas aan hodi tuur iha ninia kama. 3Jacó dehan ba José, “Maromak Kbiit Makaas mak hatudu aan mai hau iha Luz,#48:3 Haree Jénesis 35:1-15. nebee iha rai Kanaan, no Nia foo bensaun mai hau. 4Nia dehan mai hau, ‘Tebes Hau sei foo oan ba o, no habarak o, no Hau sei halo o sai povu ida nebee ema lubun boot, no Hau sei foo rai nee ba o nia bei-oan sira too tinan ba tinan. 5Agora, o nia oan mane rua nee, Efraim no Manasés, nebee o hetan iha rai Ejitu molok hau mai too o iha Ejitu, oan rua nee mak hau nian, hanesan Ruben no Simeão, sira sei sai hau nian. 6No oan sira nebee o hetan tuir oan rua nee mak o nian. Maibee nain rua nee sei hetan naran hanesan sira nia maun sira tuir sira nia liman rohan. 7No kona ba hau, bainhira hau mai hosi Padan, Rakél mate iha hau nia sorin iha rai Kanaan bainhira ami iha dalan besik too iha Efrata. No Hau hakoi nia iha nebaa, iha dalan ba Efrata. Fatin nee mak Belém.”

8Israel haree José nia oan mane sira no nia husu, “See mak sira nee?” 9José dehan ba ninia aman, “Sira mak hau nia oan mane sira, nebee Maromak foo mai hau iha fatin nee.” Jacó dehan, “Favór ida, lori sira mai hau no hau sei foo bensaun ba sira.” 10Israel nia matan delek tanba nia idade boot ona no nia la bele haree. José lori nia oan sira hakbesik ba Jacó no nia rei oan sira nee no hakuak sira. 11Israel dehan ba José, “Uluk hau la hanoin atu haree fali o nia oin, maibee tebes, Maromak mak hatudu mos o nia oan sira mai hau.” 12José foti sira hosi Jacó nia ain tuur, no nia hakruuk ho oin ba rai. 13No José foti sira nain rua nee, ho Efraim iha nia liman loos hodi ba Israel nia liman karuk, no Manasés iha nia liman karuk hodi ba Israel nia liman loos. Hanesan nee mak José lori sira ba Israel. 14No Israel lolo nia liman loos no tau ba Efraim nia ulun leten, nebee oan segundu, no nia tau ninia liman karuk ba Manasés nia ulun leten. Israel hatene buat nebee nia halo, maski Manasés mak oan primeiru. 15Jacó foo bensaun ba José no dehan,

“Maromak, Ida nebee hau nia bei-ala Abraão

no hau nia aman Isak lao iha Ninia oin,

Maromak nebee foo haan mai hau

durante hau nia moris tomak too ohin loron,

16Anju ida nebee hola fali hau hosi buat hotu nebee aat,

hau husu Nia foo bensaun ba oan sira nee,

no husik sira hetan hau nia naran,

no husik sira hetan naran hosi hau nia bei-ala Abraão no hau nia aman Isak,

no husik sira aumenta ba beibeik

too sira sai ema lubun boot iha mundu laran.”

17Bainhira José haree katak ninia aman tau liman loos iha Efraim nia ulun leten, nia la kontenti. José foti ninia aman nia liman hodi hasai hosi Efraim nia ulun no tau fali ba Manasés nia ulun. 18José dehan, “La bele hanesan nee, hau nia apaa. Ida nee mak hau nia oan primeiru, tau ita nia liman loos ba ninia ulun.” 19Maibee ninia aman lakohi no dehan, “Hau hatene, hau nia oan, hau hatene. Nia mos sei sai povu ida, no nia sei sai boot, maibee ninia alin sei sai boot liu nia, no ninia bei-oan sira sei sai nasaun barak.” 20Entaun nia foo bensaun ba sira iha loron nebaa, no nia dehan,

“Israel sei foo sai bensaun liu hosi imi no dehan,

‘Maromak halo ita sai hanesan Efraim no Manasés.’”

Nunee nia halo Efraim sai uluk Manasés. 21Israel dehan ba José, “Tebes, hau atu mate, maibee Maromak mak hamutuk ho o no Nia sei lori o ba o nia bei-ala sira nia rai. 22No mos, hau foo ona ba o fatin ida liu fali o nia maun-alin sira, nebee hau hadau hosi ema Amoreu sira ho hau nia surik no hau nia rama.”

Currently Selected:

Jénesis 48: BK

Highlight

Copy

Compare