Jénesis 7
7
Noé No Rai Nabeen
1Depois Nai hatete ba Noé, “Tama ba roo laran, o no o nia família tomak. Tanba hosi jerasaun nee, Hau haree katak o mak moris loos iha Hau nia oin. 2Hosi animál hotu nebee moos, o sei foti pár hitu, aman no inan. Hosi animál nebee la moos, o sei foti pár ida, aman no inan. 3Hosi manu iha loro leten, o sei foti pár hitu, aman no inan. Nunee animál sira nee bele moris nafatin iha mundu tomak. 4Tanba iha loron hitu ba oin, Hau sei haruka udan ba mundu too loron haat-nulu no kalan haat-nulu. Hau sei destrui buat hotu nebee moris iha mundu tomak nebee Hau halo nee.” 5No Noé halo tuir buat hotu nebee Nai haruka nia halo.
6Noé tinan atus neen (600) bainhira udan boot mai iha mundu. 7Noé tama ba roo laran ho nia oan mane sira, nia feen no nia oan mane sira nia feen sira, tanba rai nabeen. 8Hosi animál moos, no animál la moos, no manu sira no buat hotu nebee dolar iha rai, 9sira tama ba roo laran hamutuk ho Noé, rua-rua, aman no inan, hanesan Maromak haruka ona ba Noé. 10Liu tiha loron hitu, udan boot mai no halo rai nabeen iha mundu.
11Bainhira Noé tinan atus neen (600), iha fulan segundu, iha loron sanulu resin hitu, iha loron nee, bee matan hotu iha fatin klean liu nakloke, no janela sira iha lalehan nakloke. 12No udan mai mundu durante loron haat-nulu no kalan haat-nulu. 13Iha loron nee duni, Noé, no Noé nia oan mane Sem, Kam no Jafet, no Noé nia feen, no ninia oan mane sira nia feen nain tolu, tama ba roo laran. 14Sira tama hamutuk ho animál fuik oi-oin tuir sira nia modelu, no animál hakiak oi-oin tuir sira nia modelu, no buat hotu nebee dolar iha rai tuir sira nia modelu, no manu oi-oin tuir sira nia modelu, inklui manu kiik oi-oin. 15Sira tama ba roo laran hamutuk ho Noé, rua-rua, hosi buat hotu nebee moris no dada iis. 16Sira tama ba, aman no inan, hosi buat hotu nebee moris, tuir Maromak nia orden ba Noé. No Nai taka nia iha laran.
17Udan boot kontinua mai iha mundu durante loron haat-nulu. No bee sae ba beibeik too hiit roo boot nee. Roo nee sae iha mundu leten. 18Bee aumenta boot tan, no sae aas iha mundu, no roo boot nee namlele iha bee leten. 19Bee aumenta boot tan iha mundu too taka foho aas hotu nebee iha lalehan tomak nia okos. 20Bee aumenta too aas liu foho, no taka sira too iha metru hitu iha foho leten. 21Buat hotu nebee moris iha mundu mate, inklui manu, animál hakiak, animál fuik, buat hotu nebee dolar iha rai, no ema hotu. 22Buat hotu nebee dada iis hodi moris, buat hotu iha rai maran nee mate. 23Buat hotu nebee moris iha mundu nee lakon, inklui ema, no animál hakiak, no buat sira nebee dolar no manu sira iha loro leten. Sira lakon hosi mundu. Só deit Noé mak moris hela, ho sira nebee hamutuk ho nia iha roo boot laran. 24Bee boot taka mundu durante loron atus ida lima-nulu (150).
Currently Selected:
Jénesis 7: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
