Jénesis 6

Mundu Sai Aat Liu Tan

1Bainhira ema komesa sai barak iha mundu, no sira hetan oan feto sira, 2Maromak nia oan mane sira haree katak ema nia oan feto sira bonita, no sira fihir feto tuir sira nia hakarak hodi sai sira nia feen. 3Depois Nai dehan, “Hau nia Espíritu sei lakohi diskuti malu#6:3 Liafuan iha Ebreu refere ba julga, ka diskuti malu hodi resolve problema. ho ema ba nafatin, tanba nia mak isin deit. Nunee nia moris deit too tinan atus ida rua-nulu. 4Iha tempu nebaa, ema ain aas hela iha mundu, no mos iha tempu tuir mai. Tanba Maromak nia oan mane sira hola#6:4 Ebreu dehan ‘tama ba’. ema nia oan feto sira, no sira hetan oan sira. Oan sira nee sai asuwain iha tempu antigu, nebee ema konhesidu.

5Depois Nai haree ema sai aat tebes iha mundu. Buat hotu nebee sira hanoin iha sira nia fuan laran sei aat nafatin. 6No Nai tristi tanba Nia halo ona ema iha mundu, no Nia hanoin ho laran susar. 7Nunee Nai dehan, “Hau sei halakon ema nebee Hau kria ona nee hosi mundu tomak, inklui ema no animál, buat nebee dolar no manu iha lalehan, tanba Hau tristi katak Hau halo ona sira. 8Maibee Noé hetan grasa iha Nai nia oin.

Noé Halo Roo Boot

9Ida nee mak Noé nia jerasaun sira. Noé mak ema nebee moris loos no perfeitu iha povu nia leet, no Noé lao hamutuk ho Maromak. 10Noé hetan oan mane nain tolu, naran Sem, Kam no Jafet.

11Iha tempu nebaa, mundu mak aat iha Maromak nia oin, no mundu nee nakonu ho violénsia. 12Maromak hateke ba mundu no haree katak fatin nee aat tanba ema hotu nebee iha mundu lao ho hahalok aat. 13No Maromak dehan ba Noé, “Hau desidi ona atu hamate ema hotu,#6:13 Ebreu ‘Buat hotu nebee moris nia tempu rohan mai too Hau nia oin’. tanba mundu nee nakonu ho violénsia liu hosi sira. Tebes, Hau sei destrui sira ho mundu nee. 14Halo roo boot ida hosi ai kakeu. Halo kuartu sira iha roo laran, no taka roo nia laran no liur ho alkatraun. 15Halo roo hanesan nee: nia naruk metru atus ida tolu-nulu resin lima (135m), nia luan metru rua-nulu resin rua ho balu (22,5m), no nia aas metru sanulu resin tolu ho balu (13,5m).#6:15 Sira sukat ho liman sorin too sikun nebee naruk maizoumenus 45cm. Iha lian Ebreu sira sukat ho liman sorin naruk 300, luan 50, no aas 30. 16Halo kakuluk iha roo leten nebee husik kuak#6:16 Ka ‘halo janela hodi naroman bele tama’. sentimu haat-nulu resin lima (45cm) hosi roo leten. Halo odamatan iha roo sorin, no halo roo nee ho andár tolu. 17Tebes, Hau sei haruka udan boot too rai nabeen iha mundu hodi destrui isin hotu, buat hotu nebee dada iis iha lalehan nia okos, no buat hotu iha mundu sei mate. 18Maibee Hau sei estabelese Hau nia aliansa ho o. O sei tama roo boot nee, hamutuk ho o nia oan sira, o nia feen no o nia oan sira nia feen sira nebee sei hamutuk ho o. 19No hosi animál hotu nebee moris, o sei hatama rua-rua hodi hakiak sira hamutuk ho o, aman ida no inan ida. 20Inklui manu tuir sira nia modelu, no animál nebee lao tuir sira nia modelu, no animál nebee dolar tuir sira nia modelu, rua-rua hosi animál oi-oin sei mai hodi bele moris hela. 21No mos, haloot ai haan nebee o presiza haan. Halibur ai haan nee ba o no animál hotu nee hodi haan.” 22Noé halo tuir buat hotu nebee Maromak haruka nia halo.

Currently Selected:

Jénesis 6: BK

Highlight

Copy

Compare