João 12

Maria Fui Mina Ba Jesus

1 #12:1-8 Haree Mateus 26:6-13, Marcos 14:3-9, Lucas 7:37-39. Loron neen molok Páskua, Jesus baa too iha Betánia, fatin nebee Lázaro hela. Lázaro mak ida nebee uluk mate no Jesus halo moris hias ona hosi mate. 2Sira konvida Jesus mai haan kalan. Marta serví no Lázaro tuur hamutuk ho sira iha meza ho Jesus. 3Maria foti mina morin nardu moos,#12:3 Mina morin mean nebee karun. Haree Marcos 14:3 no nota. besik litru sorin, nebee karun tebes. Nia fui mina nee ba iha Jesus nia ain, no hamaran Jesus nia ain ho ninia fuuk. No uma nee sai nakonu ho mina nia morin. 4Depois Jesus nia eskolante ida, naran Judas Iskariotes, nebee atu faan Nia, dehan, 5“Tanba saa mak la faan mina morin nee ho folin denáriu atus tolu,#12:5 Iha tempu nebaa, ema selu servisu nain osan denáriu ida kada loron ida. no foo ba ema kiak?” 6Judas dehan ida nee laos tanba nia hanoin ema kiak, maibee tanba nia mak naok-teen. Nia lori kofre no nia foti osan nee ba ninia aan rasik. 7Jesus dehan, “Husik nia ba. Nia hanoin atu rai ida nee ba loron nebee hakoi Hau. 8Tanba ema kiak sempre hamutuk ho imi, maibee Hau sei la hamutuk nafatin ho imi.

Planu Atu Oho Lázaro

9Bainhira ema lubun boot hosi ema Judeu sira hatene katak Jesus iha nebaa, sira mai too fatin nee. Sira mai laos deit tanba Jesus, maibee atu haree mos Lázaro, nebee Jesus halo moris hias ona hosi mate. 10Maibee xefi saserdote sira koalia hamutuk atu oho mos Lázaro. 11Tanba Lázaro nee mak ema Judeu barak husik sira no fiar ba Jesus.

Jesus Tama Iha Jerusalém

12 #12:12-15 Haree Mateus 21:4-9, Marcos 11:7-10, Lucas 19:35-38. Loron tuir mai, ema lubun boot nebee mai ona ba festa, rona katak Jesus atu tama ba Jerusalém. 13Sira foti ramus sanak hosi ai palma sira, no sai ba atu hasoru Nia. Sira hakilar, “Hosana! Bensaun ba Nia nebee mai hodi Nai nia naran, ba Liurai hosi Israel!”#12:13 ‘Hosana’ katak ‘salva’, no ema uza hodi hahii. Haree Salmu 118:25-26. 14Jesus hetan kuda buru oan ida, no Nia sae kuda buru nee. Ida nee tuir liafuan nebee hakerek nanis ona,

15“Keta tauk, oan feto hosi Zion,

tebes, ita nia Liurai mai, Nia tuur iha kuda buru oan nia leten.”#12:15 Hosi Zakarias 9:9.

16Fo-foun, Jesus nia eskolante sira la kompriende buat sira nee. Maibee bainhira Jesus simu glória, sira hanoin hetan katak buat sira nee hakerek nanis ona kona ba Nia, no katak ema halo buat sira nee ba Nia. 17Ema lubun nebee uluk hamutuk ho Jesus bainhira nia bolu Lázaro hosi rate no halo nia moris hias hosi mate kontinua foo sasin nafatin. 18Tanba nee mak ema lubun sai ba hodi hasoru Nia tanba sira rona katak Nia halo milagre ida nee. 19Nunee ema Farizeu sira dehan ba malu, “Ita haree katak ita la manaan buat ida. Haree took, mundu tomak lao tuir Nia.”

Jesus Foo Sai Kona Ba Nia Mate

20Ema Gregu balu iha povu nia leet sae mai hodi halo adorasaun iha festa. 21Sira hakbesik ba Filipe, nebee hosi Betsaida iha Galileia, no husu nia, “Senhor, ami hakarak haree Jesus.” 22Filipe baa no foo hatene ba André. Depois André no Filipe foo hatene ba Jesus. 23Jesus hataan ba sira, “Oras too ona, atu Ema Nia Oan simu glória. 24Tebes, tebes, Hau dehan ba imi, se trigu musan ida la monu ba rai no mate, nia hela mesak deit. Maibee se nia mate, nia bele foo fuan barak. 25Nia nebee hadomi ninia moris sei lakon ninia moris. No nia nebee odi ninia moris iha mundu nee sei kaer nafatin too moris rohan laek.#12:25 Lian Gregu dehan psuké nebee bele tradus ‘klamar’, no zoe nebee ‘moris’. Nunee ‘Nia nebee hadomi ninia klamar sei lakon ninia klamar. No nia nebee odi ninia klamar iha mundu nee sei kaer nafatin too moris rohan laek.’ 26Se ema ruma serví Hau, husik nia tuir Hau. Iha fatin nebee Hau iha, Hau nia atan mos iha nebaa. Se ema ruma serví Hau, Hau nia Aman sei foo onra ba nia.

Sira Tenki Foti Aas Oan Mane

27Agora Hau iha laran susar. Hau sei dehan saida? ‘Aman, salva Hau hosi oras nee’? Maibee tanba razaun nee mak Hau mai too oras nee. 28Aman, foo glória ba O nia naran.” Depois lian mai hosi lalehan no dehan, “Hau foo ona glória ba Hau nia naran, no Hau sei foo tan glória ba naran nee.” 29Ema lubun nebee hamriik iha nebaa no rona lian nee dehan katak nee mak rai tarutu ida. Ema seluk dehan, “Anju ida koalia ba Nia.” 30Jesus hataan, “Lian nee la mosu tanba Hau, maibee tanba imi. 31Tempu tesi lia mai ona ba mundu nee. Agora Maromak#12:31 Lian Gregu la dehan ‘Maromak’. sei duni sai mundu nee nia ukun nain. 32No Hau, bainhira sira hiit sae Hau hosi rai, Hau sei dada ema hotu mai Hau.” #12:32 Jesus refere ba tempu nebee sira hiit sae Nia iha krus. Haree João 3:14. 33Nia dehan ida nee hodi hatudu oinsaa mak Nia atu mate. 34Ema lubun nee hataan ba Nia, “Ami rona tiha hosi Lei katak Kristu sei hela ba nafatin.#12:34 Karik sira la kompriende loos, tanba versikulu ruma ezemplu Salmu 110:4, Isaias 9:7, Ezekiel 37:25, Daniel 7:13-14 no Lucas 1:33. Entaun oinsaa mak O dehan, ‘Sira tenki hiit sae Ema Nia Oan? See loos mak Ema Nia Oan nee?” 35Jesus dehan ba sira, “Naroman sei iha imi nia leet too tempu uitoan tan. Lao ba bainhira imi sei iha naroman, hodi nakukun la hadau imi. Tanba ema nebee lao iha nakukun laran la hatene nia baa nebee. 36Fiar ba naroman bainhira imi sei iha naroman nee, atu nunee imi bele sai naroman nia oan sira.” Bainhira Jesus koalia tiha nunee, Nia sai no subar Aan hosi sira.

Tanba Saa Povu La Fiar

37Maski Jesus halo ona milagre barak iha sira nia oin, sira la fiar nafatin ba Nia. 38Ida nee kumpri liafuan hosi profeta Isaias, nebee dehan,

“Nai, see mak fiar liafuan nebee sira rona hosi ita?

No Nai hatudu sai ona Ninia liman ba see?”#12:38 Liman signifika katak kbiit. Hosi Isaias 53:1.

39Nunee sira la bele fiar, tanba Isaias dehan fali,

40“Nia halo sira nia matan sai delek,

no Nia halo sira nia fuan laran sai toos;

keta halo be sira haree ho sira nia matan,

kompriende ho sira nia fuan laran, no fila fali mai,

no Hau sei kura sira.”#12:40 Hosi Isaias 6:10.

41Isaias dehan buat sira nee tanba nia haree Jesus nia glória, no koalia kona ba Nia. 42Maski nunee, ema barak hosi ukun nain sira mos fiar ba Nia. Maibee sira la foo sai sira nia fiar tanba sira tauk ema Farizeu sira. Tanba sira lakohi ema soe sira hosi sinagoga. 43Tanba sira hadomi liu glória hosi ema duké glória hosi Maromak.

Jesus Mai Hodi Salva Mundu

44Jesus hakilar no dehan, “Ema nebee fiar mai Hau, laos fiar mai Hau maibee fiar ba Nia nebee haruka Hau mai. 45No ema nebee haree Hau, haree Nia nebee haruka Hau mai. 46Hau mai iha mundu nudar naroman, atu ema nebee fiar mai Hau sei la hela iha nakukun laran. 47No se ema ruma rona Hau nia liafuan, no la halo tuir, Hau la tesi lia ba nia. Tanba Hau mai laos atu tesi lia ba mundu, maibee atu salva mundu. 48Ema nee rejeita Hau, no la simu Hau nia liafuan, iha Ida nebee sei tesi lia ba nia. Liafuan nebee Hau koalia ona sei tesi lia ba nia iha loron ikus. 49Tanba Hau la koalia hosi Hau nia aan rasik, maibee Aman nebee haruka Hau mai mak foo ukun fuan ida mai Hau - saida mak atu dehan no saida mak atu koalia. 50No Hau hatene katak Ninia ukun fuan mak moris rohan laek. Buat nebee Hau koalia nunee, Hau koalia tuir buat nebee Aman foo hatene ona mai Hau.

Currently Selected:

João 12: BK

Highlight

Copy

Compare