João 13

Jesus Fasi Eskolante Sira Nia Ain

1Molok Festa Páskua, bainhira Jesus hatene katak Ninia oras too ona atu sai hosi mundu nee hodi baa Aman. Nia hadomi Ninia maluk sira nebee iha mundu, no Nia sei hadomi sira too rohan. 2Sira haan kalan dadaun, no diabu hatama ona hanoin iha Judas Iskariotes, Simão nia oan, nia fuan laran atu faan Jesus. 3Jesus hatene katak Aman foo ona buat hotu ba Ninia liman, no katak Nia mai hosi Maromak, no Nia atu fila fali ba Maromak. 4Nia hamriik hosi fatin haan kalan, tau Ninia ropa iha sorin, foti toalha ida no kesi ba Ninia kanotak. 5Depois Nia fui bee ba basia ida, no komesa fasi Ninia eskolante sira nia ain, no hamaran sira ho toalha nebee Nia kesi ba Ninia kanotak nee. 6Nia mai too Simão Pedro, no Pedro dehan ba Nia, “Nai, O sei fasi hau nia ain ka?” 7Jesus hataan ba nia, “Agora o seidauk kompriende buat nebee Hau halo, maibee tuir mai o sei kompriende.” 8Pedro dehan ba Nia, “O sei nunka fasi hau nia ain.” Jesus hataan ba nia, “Se Hau la fasi o, o sei la hamutuk ho Hau.” 9Simão Pedro dehan ba Nia, “Nai, laos hau nia ain deit, maibee fasi mos hau nia liman no hau nia ulun!” 10Jesus dehan ba nia, “Ema nebee hariis ona, la presiza fasi fali, só deit ninia ain, tanba nia isin tomak moos ona. No imi moos ona, maibee laos imi hotu.” 11Tanba Nia hatene ona see mak atu faan Nia. Nunee Nia dehan, “Laos imi hotu mak moos.”

12Bainhira Nia fasi ona sira nia ain, Nia foti fali Ninia ropa no tuur fali. No Nia dehan ba sira, “Imi hatene buat nebee Hau foin halo ba imi ka lae? 13Imi bolu Hau Mestri no Nai, no imi koalia nee loos, tanba Hau nunee duni. 14Entaun se Hau, nebee imi nia Nai no Mestri, fasi ona imi nia ain, nunee imi mos tenki halo ida nee ba malu, atu fasi imi nia maluk nia ain. 15Tanba Hau foo ezemplu ona ba imi, katak imi tenki halo hanesan Hau halo ba imi. 16Tebes, tebes, Hau dehan ba imi, atan ida la boot liu fali ninia nai; no nia nebee haruka ema mak boot liu ema nebee nia haruka. 17Imi hatene buat sira nee karik, imi sei haksolok se imi halo tuir. 18Hau la koalia kona ba imi hotu. Hau hatene sira nebee Hau hili ona. Maibee atu kumpri eskritura, ‘Nia nebee haan paun hamutuk ho Hau mak hamriik hasoru Hau.’#13:18 Hosi Salmu 41:9. 19Agora Hau foo hatene ba imi molok ida nee akontese. Nunee, bainhira ida nee akontese, imi bele fiar katak Hau mak Nia. 20Tebes, tebes, Hau dehan ba imi, ema nebee simu ida nebee Hau haruka ba, simu mos Hau. No ema nebee simu Hau, simu mos Nia nebee haruka Hau mai.”

Ema Ida Sei Faan Jesus

21Koalia tiha nunee, Jesus iha laran susar iha espíritu, no Nia foo sai, “Tebes, tebes, Hau dehan ba imi, katak ema ida hosi imi sei faan Hau.” 22Eskolante sira hateke ba malu. Sira la hatene Nia koalia kona ba see loos. 23Eskolante ida nebee Jesus hadomi tuur besik Jesus. 24Entaun Simão Pedro foo sinál ba eskolante ida nee atu husu Jesus, Nia koalia kona ba see loos. 25Nunee, eskolante nee, nebee sadere ba Jesus nia hirus matan,#13:25 Iha sira nia kultura, sira latan iha meza no bele sadere ba malu. dehan ba Nia, “Nai, see mak ema nee?”

26Jesus hataan, “Nia mak ida nebee Hau sei foo paun pedasuk nee, nebee Hau atu habokon.” No bainhira Jesus habokon tiha paun nee, Nia foo ba Judas Iskariotes, Simão nia oan. 27Bainhira Judas simu paun nee, Satanás tama kedas iha nia laran. Depois Jesus dehan ba nia, “Buat nebee o atu halo, halo lalais ba.” 28La iha ema ida iha meza hatene tanba saa mak Jesus koalia hanesan nee ba Judas. 29Judas kaer kofre, entaun sira balu hanoin katak Jesus dehan ba nia, “Sosa buat nebee ita presiza ba festa nee,” ka nia sei baa foo buat ruma ba ema kiak. 30Bainhira Judas simu ona paun nee, nia sai kedas. No rai kalan ona.

Ukun Fuan Foun

31Bainhira Judas sai tiha ona, Jesus dehan, “Agora Ema Nia Oan simu glória, no Maromak simu glória iha Nia. 32Se Maromak simu glória iha Nia, Maromak sei foo glória ba Nia iha Maromak nia Aan rasik, no foo kedas glória nee ba Nia. 33Kiik-oan sira, Hau sei hamutuk ho imi too tempu uitoan tan. Imi sei buka Hau, no hanesan Hau dehan ba ema Judeu sira, agora Hau dehan mos ba imi, ‘Iha fatin nebee mak Hau atu baa, imi la bele baa.’ 34Hau foo ukun fuan foun ida ba imi hodi imi sei hadomi malu: hadomi malu hanesan Hau hadomi imi. 35Nunee ema hotu sei hatene katak imi mak Hau nia eskolante sira, se imi hatudu domin ba malu.”

36Simão Pedro dehan ba Nia, “Nai, O atu baa nebee?” Jesus hataan ba Pedro, “Iha fatin nebee mak Hau atu baa, o la bele baa agora. Maibee depois mak o sei tuir.” 37Pedro dehan ba Nia, “Nai, tanba saa mak agora hau la bele tuir O? Hau prontu atu foo hau nia moris tanba O.” 38Jesus hataan, “O sei foo duni o nia moris tanba Hau ka? Tebes, tebes, Hau dehan ba o, molok manu aman kokoreek, o sei nega Hau dala tolu.”

Currently Selected:

João 13: BK

Highlight

Copy

Compare