João 14

Hau Mak Dalan, Lia Loos No Moris

1Keta laran susar: fiar ba Maromak, fiar mos ba Hau. 2Hau nia Aman nia uma iha fatin barak atu hela. Se la nunee karik, Hau sei foo hatene ba imi. Hau baa atu prepara fatin ba imi. 3No se Hau baa no prepara fatin ba imi, Hau sei mai fali, no lori imi ba Hau nia fatin. Nunee iha fatin nebee Hau hela, imi mos bele hela iha nebaa. 4Imi hatene dalan ba fatin nebee Hau atu baa. 5Tomé dehan ba Nia, “Nai, ami la hatene O atu baa nebee. Entaun oinsaa mak ami bele hatene dalan nee?” 6Jesus dehan ba nia, “Hau mak dalan, lia loos no moris. Ema ida la bele hakbesik ba Aman, só deit liu hosi Hau. 7Se imi konhese ona Hau, imi sei konhese mos Hau nia Aman. No hosi ohin ba oin, imi konhese Nia no haree ona Nia.”

8Filipe dehan ba Jesus, “Nai, hatudu Aman mai ami, no ida nee too ona ba ami.” 9Jesus dehan ba nia, “Hau hamutuk ho o too tempu kleur ona, Filipe, no o seidauk konhese Hau ka? Nia nebee haree ona Hau mak haree ona Aman. Entaun nusaa mak o dehan, ‘Hatudu Aman mai ami’? 10Imi la fiar katak Hau hela iha Aman, no Aman hela iha Hau ka? Liafuan nebee Hau koalia ba imi, Hau la koalia hosi Hau nia Aan rasik. Maibee Aman nebee hela iha Hau mak halao Ninia servisu. 11Fiar Hau katak Hau hela iha Aman, no Aman hela iha Hau. Se lae, fiar Hau tanba servisu nebee Hau halo ona nee.

12Tebes, tebes, Hau dehan ba imi katak ema nebee fiar ba Hau, sei halo mos servisu nebee Hau halo. No nia sei halo servisu boot liu fali sira nee, tanba Hau atu baa Aman. 13No buat hotu nebee imi husu hodi Hau nia naran, Hau sei halo, atu nunee Aman bele hetan glória iha Oan Mane. 14Se imi husu Hau buat naran deit hodi Hau nia naran, Hau sei halo.

Jesus Promete Espíritu Santu

15“Se imi hadomi Hau, imi sei halo tuir Hau nia ukun fuan sira. 16No Hau sei husu ba Aman, no Nia sei foo imi Ajudadór#14:16 Lian Gregu dehan Parakletos nebee ‘bolu mai iha sorin’ hodi ajuda no defende. Sira uza liafuan nee ho Barnabé iha Apostolu 4:36, tempu kamaan ba Israel iha Lucas 2:25, no Maromak nia hahalok iha 2 Korinto 1:3. ida seluk hodi hela ho imi too rohan laek. 17Nia mak Espíritu lia loos nian. Mundu la bele simu Nia, tanba mundu la haree Nia no la konhese Nia. Maibee imi konhese Nia, tanba Nia hela ho imi no Nia sei hela iha imi nia laran.

18Hau sei la husik imi sai oan kiak. Hau sei mai fali ba imi. 19La kleur tan, mundu sei la haree tan Hau. Maibee imi sei haree Hau. Tanba Hau moris, imi mos sei moris. 20Iha loron nebaa, imi sei hatene katak Hau hela iha Hau nia Aman, no imi iha Hau, no Hau iha imi. 21Ema nebee simu Hau nia ukun fuan sira, no halo tuir ukun fuan sira nee, nia mak ema nebee hadomi Hau. No nia nebee hadomi Hau, Hau nia Aman sei hadomi nia, no Hau sei hadomi nia, no Hau sei hatudu Aan ba nia. 22Judas (laos Iskariotes) dehan ba Jesus, “Nai, nusaa mak O hatudu Aan ba ami no laos ba mundu?” 23Jesus hataan ba nia, “Se ema ida hadomi Hau, nia sei halo tuir Hau nia liafuan. No Hau nia Aman sei hadomi nia, no Ami sei mai ba nia, no halo Ami nia hela fatin ho nia. 24Ema nebee la hadomi Hau, la halo tuir Hau nia liafuan. Liafuan nebee imi rona nee laos Hau nian, maibee liafuan nee mak Aman nian nebee haruka Hau mai.

25Hau koalia buat sira nee ba imi bainhira Hau sei hamutuk ho imi. 26Maibee Ajudadór, katak Espíritu Santu, nebee Aman sei haruka mai hodi Hau nia naran, Nia sei hanorin buat hotu ba imi, no halo imi hanoin hetan buat hotu nebee Hau dehan ona ba imi. 27Hau husik dame ba imi. Hau foo Hau nia dame ba imi. Hau foo ba imi laos hanesan mundu foo. Keta laran susar, no keta laran tauk. 28Imi rona ona katak Hau dehan ba imi, ‘Hau sei baa, no Hau sei fila fali ba imi.’ Se imi hadomi Hau, imi sei haksolok tanba Hau atu baa Aman, tanba Aman mak boot liu Hau. 29Agora, Hau foo hatene ona ba imi molok buat sira nee akontese, atu nunee, bainhira akontese ona, imi bele fiar Hau. 30Hau sei la koalia barak tan ho imi, tanba ukun nain mundu nee nian mai dadaun. Nia la iha kbiit atu ukun Hau, 31maibee Hau halo tuir buat nebee Aman manda ona Hau, hodi mundu bele hatene katak Hau hadomi Aman. Hamriik ba, mai ita sai hosi fatin nee.

Currently Selected:

João 14: BK

Highlight

Copy

Compare