João 15

Jesus Mak Ai Uvas Loos

1“Hau mak uvas huun lo-loos, no Hau nia Aman mak toos nain.#15:1 Bele lee kona ba nasaun Israel mak uvas huun iha Salmu 80:8-11, Isaias 5:1-7. 2Sanak hotu iha Hau nebee la foo fuan, Nia hasai tiha. No sanak hotu nebee foo fuan, Nia hamoos hodi bele foo fuan liu tan. 3Imi moos ona tanba liafuan nebee Hau koalia ona ba imi. 4Hela iha Hau, no Hau iha imi. Hanesan uvas sanak la bele foo fuan mesak, maibee tenki hela iha uvas huun, nunee mos imi la bele foo fuan, só imi hela iha Hau. 5Hau mak uvas huun, imi mak sanak sira. Ema nebee hela iha Hau, no Hau iha nia, ema nee sei foo fuan barak. Tanba ketak hosi Hau, imi la bele halo buat ida. 6Se ema ida la hela iha Hau, toos nain sei soe nia hanesan sanak ida no nia sai maran. Depois ema halibur sanak sira nee, soe ba ahi laran no sunu tiha. 7Se imi hela iha Hau, no Hau nia liafuan hela iha imi, imi bele husu saida deit nebee imi hakarak, no ida nee sei halo ba imi. 8Nunee Hau nia Aman hetan glória bainhira imi foo fuan barak. Ho ida nee imi sei hatudu aan katak imi mak Hau nia disípulu sira. 9Hanesan Aman hadomi Hau, nunee mos Hau hadomi imi. Hela nafatin iha Hau nia domin. 10Se imi halo tuir Hau nia ukun fuan sira, imi sei hela nafatin iha Hau nia domin. Hanesan Hau mos halo tuir Hau nia Aman nia ukun fuan sira, no hela iha Ninia domin. 11Hau koalia buat sira nee ba imi hodi Hau nia ksolok bele hela iha imi, no imi nia ksolok sei sai nakonu.

12Ida nee mak Hau nia ukun fuan, katak imi hadomi malu hanesan Hau hadomi imi. 13La iha domin boot liu nee, katak ema foo ninia moris tanba ninia belun sira. 14Imi mak Hau nia belun sira, se imi halo buat nebee Hau manda ba imi. 15Hau la bolu tan imi atan. Tanba atan la hatene saida mak ninia nai halo. Maibee Hau bolu imi belun. Tanba buat hotu nebee Hau rona hosi Hau nia Aman, Hau hatoo ona ba imi. 16Laos imi mak hili Hau, maibee Hau mak hili imi. Hau foo knaar ba imi katak imi tenki baa no foo fuan, no imi nia fuan sei hela nafatin. Buat hotu nebee imi husu hosi Aman hodi Hau nia naran, Nia sei foo ba imi. 17Hau manda buat sira nee ba imi, hodi imi sei hadomi malu.

Mundu Sei Odi Imi

18Se mundu odi imi karik, imi hatene katak sira odi uluk tiha ona Hau. 19Se imi hosi mundu, mundu sei hadomi imi nudar sira nian. Maibee imi laos mundu nian, tanba Hau hili ona imi sai hosi mundu, nunee mundu odi imi. 20Hanoin hetan liafuan nebee Hau dehan ona ba imi, ‘Atan la boot liu fali ninia nai.’#15:20 Haree João 13:16. Se sira foo terus ba Hau, sira mos sei foo terus ba imi. Se sira halo tuir Hau nia liafuan, sira mos sei halo tuir imi nia liafuan. 21Maibee sira sei halo buat hotu nee ba imi tanba Hau nia naran, tanba sira la hatene Nia nebee haruka Hau mai. 22Se Hau la mai no koalia ba sira, sira la iha sala. Maibee agora sira la bele finji katak sira la iha sala. 23Ema nebee odi Hau, odi mos Hau nia Aman. 24Se Hau la halo milagre iha sira nia leet, nebee ema seluk la halo, sira la iha sala. Maibee agora sira haree ona no odi Hau no mos Hau nia Aman. 25Maibee nee tenki kumpri liafuan nebee hakerek ona iha sira nia Lei katak, ‘Sira odi Hau maski razaun la iha.’#15:25 Hosi Salmu 35:19 ka Salmu 69:4.

26Maibee Hau sei haruka Ajudadór ba imi, nebee mai hosi Aman. Nia mak Espíritu lia loos nian nebee mai hosi Aman. Nia sei foo sasin kona ba Hau. 27No imi mos sei foo sasin, tanba hori uluk kedas imi hamutuk ho Hau.

Currently Selected:

João 15: BK

Highlight

Copy

Compare