João 16

Sira Sei Oho Imi

1“Hau hatete buat sira nee ba imi hodi imi la monu ba sala.#16:1 Lian Gregu skandalidzo katak ‘tama lasu’ ka ‘sidi’. Haree Mateus 11:6 no nota. 2Sira sei hasai imi hosi sinagoga sira. No mos, tempu sei too mai bainhira ema nebee oho imi sei hanoin katak nia serví Maromak. 3Sira sei halo buat sira nee tanba sira la konhese Aman, ka Hau. 4Maibee Hau foo hatene kona ba buat sira nee ba imi, katak bainhira tempu nee mai, imi bele hanoin hetan katak Hau foo hatene ona ba imi. Fo-foun Hau la foo hatene kona ba buat sira nee ba imi, tanba Hau sei hamutuk ho imi.

Espíritu Santu Nia Servisu

5“Agora Hau atu baa Nia nebee haruka Hau mai. No imi la husu hau, ‘O atu baa nebee?’ 6Maibee tanba Hau dehan buat sira nee ba imi, imi nia fuan laran sai tristi tebe-tebes. 7Maski nunee Hau dehan lia loos ba imi: diak liu ba imi katak Hau baa. Tanba se Hau la baa, Ajudadór sei la mai ba imi. Maibee se Hau baa, Hau sei haruka Nia ba imi. 8No bainhira Nia mai, Nia sei foo hanoin ba mundu kona ba sala, moris loos no julgamentu. 9Kona ba sala, tanba sira la fiar ba Hau. 10Kona ba moris loos, tanba Hau baa Hau nia Aman, no imi sei la haree tan Hau. 11No kona ba julgamentu, tanba mundu nee nia ukun nain hasoru ona tesi lia.

12Hau sei iha buat barak atu foo sai ba imi, maibee agora imi la toman atu lori buat sira nee. 13Maibee bainhira Espíritu lia loos nian mai, Nia sei lori imi tama ba lia loos hotu. Tanba Nia sei la koalia hosi Ninia aan rasik, maibee Nia sei koalia buat hotu nebee Nia rona. No Nia sei foo sai ba imi kona ba buat sira nebee atu mai. 14Nia sei foo glória mai Hau. Tanba Nia sei simu buat nebee Hau nian, no foo sai ba imi. 15Buat hotu nebee Aman nian mak Hau nian. Tanba nee mak Hau dehan katak Espíritu sei simu buat nebee Hau nian, no foo sai ba imi.

Laran Tristi Sei Sai Haksolok

16“La kleur tan imi sei la haree tan Hau. Depois la kleur tan fali, imi sei haree Hau.” 17Entaun Ninia eskolante balu koalia ba malu, “Nia dehan saida ba ita nebee, ‘La kleur tan imi la haree ona Hau. Depois la kleur tan fali, imi sei haree Hau;’ no, ‘Tanba Hau baa Aman’?” 18Nunee sira dehan, “Saida mak liafuan nee, nebee Nia dehan, ‘La kleur tan’? Ita la hatene saida mak Nia dehan.” 19Jesus hatene katak sira hakarak husu Nia. Entaun Nia dehan ba sira, “Imi husu ba malu kona ba Hau nia liafuan ohin nee ka, ‘La kleur tan imi la haree ona Hau. Depois la kleur tan fali, imi sei haree Hau’? 20Tebes, tebes, Hau dehan ba imi, katak imi sei tanis no halerik, maibee mundu sei haksolok. Imi sei laran susar. Maibee imi nia laran susar nee sei sai haksolok. 21Bainhira feto ida atu tuur ahi, nia laran susar tanba ninia oras too ona. Maibee bainhira nia tuur ahi ona no iha bebee, nia la hanoin hetan tan ninia terus, tanba nia haksolok katak ema ida moris mai ona iha mundu nee. 22Nunee mos agora imi laran susar. Maibee Hau sei haree fali imi, no imi nia fuan laran sei haksolok. No la iha ema ida mak bele hasai imi nia ksolok hosi imi. 23Iha loron nebaa, imi sei la husu Hau buat ida. Tebes, tebes, Hau dehan ba imi, buat hotu nebee imi husu hosi Aman hodi Hau nia naran, Nia sei foo ba imi. 24Too agora imi seidauk husu buat ida hodi Hau nia naran. Husu ba, no imi sei simu, hodi imi nia ksolok sei sai nakonu.

Jesus Manaan Mundu

25Hau koalia ona buat sira nee ba imi liu hosi komparasaun. Maibee tempu sei too mai bainhira Hau sei la koalia tan ba imi ho komparasaun, maibee Hau sei koalia mo-moos ba imi kona ba Aman. 26Iha loron nebaa, imi sei husu hodi Hau nia naran. Maibee Hau la dehan ba imi katak Hau sei hatoo imi nia pedidu ba Aman. 27Tanba Aman rasik hadomi imi, tanba imi hadomi Hau, no imi fiar katak Hau mai hosi Maromak. 28Hau mai hosi Aman, no Hau tama mai iha mundu nee. No agora Hau sei husik mundu, no fila fali ba Aman.”

29Ninia eskolante sira dehan ba Nia, “Ah, agora O koalia mo-moos, no la uza ona komparasaun! 30Agora ami hatene katak O hatene buat hotu-hotu, no la presiza ema ida atu husu O. Tanba nee mak ami fiar katak O mai hosi Maromak.” 31Jesus hataan ba sira, “Agora imi fiar ka? 32Rona ba, oras sei too mai, no too duni ona, katak imi sei namkari, ida-idak baa ninia uma. Imi sei husik Hau mesak. Maibee Hau la mesak, tanba Aman mak hamutuk ho Hau. 33Hau koalia buat sira nee ba imi, atu imi bele iha dame iha Hau. Iha mundu nee imi sei hetan susar. Maibee aten brani ba; Hau manaan tiha ona mundu.”

Currently Selected:

João 16: BK

Highlight

Copy

Compare