João 17

Jesus Halo Orasaun

1Bainhira Jesus koalia tiha liafuan nee, Nia foti matan ba lalehan no dehan, “Aman, oras too ona. Foo glória ba O nia Oan Mane, atu nunee O nia Oan Mane mos bele foo glória ba O. 2Tanba O foo ona ba Nia kbiit atu ukun isin hotu, atu Nia bele foo moris rohan laek ba sira hotu nebee O foo ona ba Nia. 3Ida nee mak moris rohan laek, katak sira bele konhese O, Maromak loos mesak deit, no Jesus Kristu, nebee O haruka mai. 4Hau foo ona glória ba O iha mundu. Hau halo kompletu ona servisu nebee O foo mai Hau atu halo. 5Agora, Oh Aman, foo glória mai Hau iha O nia prezensa ho glória nebee Hau iha uluk ho O, molok mundu mosu mai.

6Hau foo sai ona O nia naran ba ema nebee O foo mai Hau hosi mundu. Sira mak O nian, no O foo sira mai Hau. No sira halo tuir O nia liafuan. 7Agora sira hatene katak buat hotu nebee O foo ona mai Hau mai hosi O. 8Tanba Hau foo ona ba sira liafuan nebee O foo mai Hau. No sira simu ona liafuan nee. No sira hatene lo-loos ona katak Hau mai hosi O, no sira fiar ona katak O mak haruka Hau mai. 9Hau halo orasaun ba sira. Hau la halo orasaun ba mundu, maibee kona ba sira nebee O foo ona mai Hau, tanba sira mak O nian. 10Buat hotu nebee Hau nian mak O nian, no O nian mak Hau nian. No Hau hetan glória iha sira. 11Agora, Hau la hela tan iha mundu, maibee sira sei iha mundu, no Hau atu baa too O. Aman Santu, tau matan ba sira iha O nia naran, sira nebee O foo ona mai Hau, atu sira bele sai ida deit, hanesan Ita mak ida deit. 12Durante tempu nebee Hau hamutuk ho sira, Hau tau matan ba sira iha O nia naran. O mak foo sira mai Hau, no Hau tau matan ba sira. Sira ida la lakon, só deit oan lakon nian, hodi kumpri eskritura.#17:12 Ema nebee atu lakon, katak eskolante Judas nebee faan Jesus. Haree João 18:1-5. 13Agora Hau atu baa too O. Hau koalia buat sira nee iha mundu atu sira bele sai nakonu ho Hau nia ksolok. 14Hau foo tiha ona O nia liafuan ba sira. No mundu odi sira, tanba sira laos hosi mundu, hanesan Hau mos laos hosi mundu. 15Hau la husu katak O hasai sira hosi mundu, maibee katak O proteje sira hosi aat nain. 16Sira laos hosi mundu, hanesan Hau mos laos hosi mundu. 17Halo sira santu liu hosi lia loos. O nia liafuan mak lia loos. 18Hanesan O haruka Hau ba mundu, nunee mos Hau haruka sira ba mundu. 19No tanba sira mak Hau halo Aan santu, atu nunee sira mos bele sai santu iha lia loos.#17:19 Liafuan nebee dehan ‘halo santu’ iha versíkulu 17-19 mak hagiazo iha lian Gregu. Nee katak ‘haketak nudar santu hodi serví Maromak’, hanesan ‘konsagra’.

20Hau la husu kona ba sira deit, maibee Hau husu mos kona ba sira nebee sei fiar ba Hau liu hosi sira nia liafuan; 21atu nunee sira hotu sai ida deit. Hanesan O, Aman, iha Hau, no Hau iha O, nunee mos sira bele hela iha Ita. Nunee mundu bele fiar katak O mak haruka Hau mai. 22Hau foo ona ba sira glória nebee O foo mai Hau, atu nunee sira bele sai ida deit, hanesan Ita mak ida deit. 23Hau iha sira, no O iha Hau. Nunee sira bele sai perfeitu#17:23 Gregu telioo, katak ‘kompletu’, ‘too’ ka ‘perfeitu’. Haree João 4:34, 17:4, no Filipe 3:12 no nota. nudar ida deit. No mundu bele hatene katak O mak haruka Hau, no katak O hadomi sira hanesan mos O hadomi Hau. 24Aman, Hau hakarak katak sira nebee O foo ona mai Hau bele hamutuk ho Hau iha fatin nebee Hau hela, atu nunee sira bele haree Hau nia glória nebee O foo ona mai Hau. Tanba O hadomi Hau molok mundu nee hahuu. 25Oh Aman loos, maski mundu la konhese O, Hau konhese O, no ema sira nee hatene katak O haruka Hau mai. 26No Hau foo hatene ona O nia naran ba sira, no Hau sei foo hatene nafatin kona ba O nia naran, atu nunee domin nebee O hadomi Hau bele hela iha sira, no Hau hela iha sira.”

Currently Selected:

João 17: BK

Highlight

Copy

Compare