João 18

Ema Kaer Jesus

1Bainhira Jesus koalia liafuan nee hotu, Nia lao sai ba liur ho Ninia eskolante sira no hakur mota Sedron. Nia tama ba toos ida iha fatin nebaa ho Ninia eskolante sira. 2Judas, nebee atu faan Nia, mos hatene fatin nee, tanba dala barak Jesus halibur hamutuk ho Ninia eskolante sira iha nebaa. 3#18:3 Haree Mateus 26:47-56, Marcos 14:43-50, Lucas 22:47-53.Judas simu ona soldadu lubun ida no guarda sira hosi xefi saserdote sira no Farizeu sira. No nia mai ho ema sira nee ho lampu, ai lakan no armas kroat. 4Jesus hatene ona buat hotu nebee atu akontese ba Nia. Nunee Nia hakat ba oin no dehan ba sira, “Imi buka see?” 5Sira hataan ba Nia, “Jesus hosi Nazaré.” Jesus dehan ba sira, “Hau mak nee.” No Judas, nebee faan Nia, mos hamriik hamutuk ho sira. 6Bainhira Nia dehan ba sira, “Hau mak nee”, sira hakiduk kedas no monu ba rai. 7Nunee Nia husu fali ba sira, “Imi buka see?” No sira dehan, “Jesus hosi Nazaré.” 8Jesus hataan, “Hau foo hatene ona ba imi katak Hau mak nee. Se imi buka Hau, husik sira seluk nee sai ba.” 9Ida nee atu kumpri liafuan nebee Jesus koalia ona, “Hau la lakon ema ida hosi sira nebee O foo mai Hau.”#18:9 Hosi João 6:39. Haree mos João 17:12. 10Depois Simão Pedro, nebee iha surik ida, losu surik nee no ataka saserdote boot nia atan. Nia sabir tiha atan nia tilun sorin loos. Atan nee nia naran Malkos. 11Jesus dehan ba Pedro, “Hatama fali o nia surik iha ninia fatin. Hau sei la hemu kopu nebee Hau nia Aman foo ona mai Hau ka?”

12 #18:12-13 Haree Mateus 26:57. Depois soldadu lubun, komandante ho guarda ema Judeu sira nian kaer tiha Jesus no futu Nia. 13Sira lori Nia uluk ba Anas. Tanba Anas mak Kaifas nia banin mane. Iha tinan nebaa, Kaifas mak saserdote boot. 14Kaifas mak ema nebee foo konselhu ba ema Judeu sira katak diak liu ema ida deit mate ba povu.#18:14 Hosi João 11:50.

Pedro Nega Jesus

15Simão Pedro no mos eskolante ida seluk lao tuir Jesus. Saserdote boot konhese eskolante ida seluk nee, nunee nia bele tama saserdote boot nia pátiu ho Jesus. 16#18:16-18 Haree Mateus 26:69-70, Marcos 14:66-68, Lucas 22:55-57.Maibee Pedro hamriik iha odamatan liur. Eskolante ida seluk, nebee saserdote boot konhese nee, koalia ba atan feto nebee hein odamatan no lori Pedro tama ba laran. 17Atan feto nebee hein odamatan dehan ba Pedro, “Laos o mos Mane nee nia eskolante ida?” Pedro dehan, “Hau lae.” 18Atan no guarda sira halo ona ahi ho ahi klaak tanba tempu nee malirin. No sira hamriik haneruk ahi. No Pedro hamriik ho sira hodi haneruk ahi.

Saserdote Boot Investiga Jesus

19 #18:19-24 Haree Mateus 26:59-68, Marcos 14:55-65, Lucas 22:63-71. Depois saserdote boot husu Jesus kona ba Ninia eskolante sira no kona ba Ninia hanorin. 20Jesus hataan ba saserdote boot, “Hau koalia iha ema hotu nia oin. Hau hanorin beibeik iha sinagoga no iha Templu, iha fatin nebee ema Judeu sira sempre halibur hamutuk. Hau la koalia sub-subar buat ida. 21Tanba saa mak o husu Hau? Husu ba sira nebee rona tiha Hau kona ba buat nebee Hau dehan ba sira. Tebes, sira hatene buat nebee Hau dehan.” 22Bainhira Jesus koalia tiha nunee, guarda ida nebee hamriik iha nebaa basa Jesus ho ninia liman, no dehan, “O hataan ba saserdote boot hanesan nee ka?” 23Jesus hataan ba nia, “Se Hau koalia sala karik, foo sai sala nee. Maibee se Hau koalia loos, tanba saa mak o basa Hau?” 24Depois Anas haruka Jesus, nebee futu metin hela, ba saserdote boot Kaifas.

Pedro Nega Fali Jesus

25 #18:25-27 Haree Mateus 26:71-75, Marcos 14:69-72, Lucas 22:58-62. Simão Pedro hamriik hela hodi haneruk ahi. Nunee ema sira dehan ba nia, “Laos o mos Ninia eskolante ida ka?” Pedro nega dehan, “Hau lae.” 26Depois saserdote boot nia atan sira ida, nebee maluk ho ida nebee mak Pedro sabir tiha ninia tilun, dehan, “Laos katak hau haree o iha toos ho Nia?” 27Pedro nega fali. No iha momentu nee kedas manu mos kokoreek.

Jesus Hasoru Pilatos

28Depois sira lori Jesus hosi Kaifas nia uma ba governadór nia postu.#18:28 Iha lian Gregu, fatin nee mak ‘praetoria’; Governadór hela iha uma boot nee nebee iha kampu no soldadu sira nia hela fatin. Iha mos 18:33 no 19:9. Oras nee sei sedu, no sira rasik la tama ba governadór nia postu hodi sira la bele halo foer sira nia aan; atu nunee sira bele haan Páskua. 29#18:29-40 Haree Mateus 27:11-23, Marcos 15:2-15, Lucas 23:2-3,18-25.Pilatos sai ba liur hodi hasoru sira, no dehan, “Imi akuza Mane nee kona ba saida?” 30Sira hataan ba Pilatos, “Se Nia laos kriminozu, ami sei la lori Nia ba ita boot.” 31Depois Pilatos dehan ba sira, “Lori Nia ba, no tesi lia ba Nia tuir imi nia lei.” Nunee ema Judeu sira dehan ba Pilatos, “Tuir lei, ami la bele foo kastigu mate ba ema ida.” 32Ida nee akontese hodi kumpri liafuan nebee Jesus koalia ona atu hatudu oinsaa mak Nia atu mate.

Jesus Nia Reinu

33Depois Pilatos tama fali ba ninia uma governadór nian. Nia bolu Jesus, no dehan, “O mak ema Judeu sira nia liurai ka?” 34Jesus hataan, “Ita koalia nunee tanba ita nia hanoin rasik ka ema seluk koalia ba ita kona ba Hau?” 35Pilatos hataan, “Hau mak ema Judeu ka? O nia nasaun rasik no xefi saserdote sira mak entrega O mai hau. O halo saida?” 36Jesus hataan, “Hau nia reinu laos hosi mundu nee. Se Hau nia reinu hosi mundu nee, entaun Hau nia atan sira sei luta atu ema Judeu sira la kaer Hau. Maibee Hau nia reinu laos hosi mundu nee.” 37Nunee Pilatos dehan ba Nia, “Entaun O mak Liurai ka?” Jesus hataan, “Ita rasik mak dehan katak Hau mak Liurai. Tanba nee mak Hau moris mai, no tanba nee mak Hau tama mai mundu, atu foo sasin ba lia loos. Ema hotu nebee hosi lia loos rona Hau nia lian.” 38Pilatos dehan ba nia, “Saida mak lia loos?” Koalia tiha nunee, Pilatos sai fali ba ema Judeu sira, no dehan ba sira, “Hau la hetan sala ida iha Nia. 39Maibee imi iha kostumi ida, katak hau tenki husik ema ida ba imi iha tempu Páskua. Nunee imi hakarak hau husik ema Judeu sira nia Liurai ba imi ka?” 40Sira hotu hakilar fali, “Laos Mane nee, maibee Barabás.” Barabás mak naok-teen ida.

Currently Selected:

João 18: BK

Highlight

Copy

Compare