João 19

Jesus Atu Hetan Kastigu Mate

1 #19:1-16 Haree Mateus 27:27-31, Marcos 15:16-20. Depois Pilatos lori Jesus, no baku Nia ho sikote. 2Soldadu sira bobar ai tarak hodi halo koroa, no tau iha Ninia ulun. No sira foo hatais Nia ho hena kór uvas. 3Sira dehan, “Viva! Liurai ema Judeu nian!” No sira basa Nia ho sira nia liman. 4Pilatos sai fali, no dehan ba sira, “Tebes, hau lori Nia sai mai liur ba imi atu imi bele hatene katak hau la hetan sala ida iha Nia.” 5Depois Jesus sai mai. Nia hatais hela koroa hosi ai tarak no hena kór uvas. No Pilatos dehan ba sira, “Haree ba, Mane mak nee!” 6Bainhira xefi saserdote sira no guarda sira haree Nia, sira hakilar, “Prega Nia ba krús! Prega Nia ba krús!” Pilatos dehan ba sira, “Imi rasik lori Nia no prega Nia ba krús. Tanba hau la hetan sala ida iha Nia.” 7Ema Judeu sira hataan, “Ami iha lei, no tuir ami nia lei nee Nia tenki mate tanba Nia foti Ninia Aan nudar Maromak nia Oan.” 8Bainhira Pilatos rona tiha liafuan nee, nia sai tauk liu tan. 9Nia tama fali ba uma governadór nian no dehan ba Jesus, “O mai hosi nebee?” Maibee Jesus la hataan buat ida. 10Entaun Pilatos dehan ba Nia, “O la koalia mai hau ka? O la hatene ka, katak hau iha kbiit atu prega O ba krús, no hau iha kbiit atu husik O livre?” 11Jesus hataan, “Ita la iha kbiit ida hasoru Hau, só deit kbiit nebee ita simu hosi leten. Nunee ema nebee entrega Hau ba ita mak halo sala boot liu tan.” 12Hosi oras nee ba oin, Pilatos buka atu husik Jesus livre. Maibee ema Judeu sira hakilar dehan, “Se ita boot husik Mane nee livre, ita boot laos César nia belun. Ema nebee foti aan nudar liurai, nia kontra César.” 13Bainhira Pilatos rona tiha liafuan nee, nia lori Jesus sai ba liur. Nia tuur iha kadeira tesi lia nian iha fatin nebee bolu Fatuk Belar, no iha lian Ebreu, bolu Gabata. 14Loron nee mak loron preparasaun ba Páskua, no oras maizoumenus meiudia. No Pilatos dehan ba ema Judeu sira, “Haree ba, imi nia Liurai!” 15Maibee sira hakilar, “Halakon Nia! Halakon Nia! Prega Nia ba krús!” Pilatos dehan ba sira, “Hau sei prega imi nia Liurai ba krús ka?” Xefi saserdote sira hataan, “Ami la iha liurai, só César deit.” 16Depois Pilatos entrega Jesus ba sira atu prega Nia ba krús. No sira lori Jesus.

Ema Prega Jesus Ba Krús

17 #19:17-24 Haree Mateus 27:33-44, Marcos 15:22-32, Lucas 23:33-43. Jesus lori Ninia krús no lao sai ba fatin naran Ulun Ruin, nebee iha lian Aramaiku naran Golgota. 18Sira prega Jesus ba krús iha nebaa. Sira prega mos ema nain rua ho Nia, iha sor-sorin, no Jesus iha klaran.

19Pilatos hakerek avizu ida no tau iha krús. Liafuan nee dehan: “Jesus Hosi Nazaré, Ema Judeu Nia Liurai.” 20Ema Judeu barak lee avizu ida nee tanba fatin nebee sira prega Jesus ba krús besik sidade. No liafuan nee hakerek iha lian Aramaiku, Latin no Gregu.#19:20 Ema Judeu sira koalia lian Aramaiku. Ema Roma koalia lian Latin. Ema baibain hosi nasaun barak hatene lian Gregu tanba nasaun nee ukun nasaun barak molok Roma, inklui mos Israel. 21Depois ema Judeu sira nia xefi saserdote sira dehan ba Pilatos, “Keta hakerek, ‘Ema Judeu Nia Liurai,’ maibee katak, ‘Ema nee dehan: Hau mak ema Judeu nia Liurai.’” 22Pilatos hataan, “Buat nebee hau hakerek ona nee, hau hakerek ona!”

23Bainhira soldadu sira prega tiha Jesus ba krús, sira foti Ninia ropa no fahe ba parte haat hodi soldadu ida-idak hetan parte ida. Maibee Ninia faru naruk#19:23 Ropa simples hanesan faru iha leten maibee naruk too ain tuur. nee la suku tanba soru deit hosi leten too kraik. 24Entaun sira dehan ba malu, “Ita lalika lees ropa nee. Maibee mai ita dada rifa atu hatene see mak hetan.” Ida nee akontese atu kumpri eskritura nebee dehan,

“Sira fahe hau nia hena ba malu,

no dada rifa kona ba hau nia ropa.”#19:24 Hosi Salmu 22:18.

Nunee soldadu sira halo buat sira nee. 25Jesus nia inan, Ninia inan nia alin feto, Maria nebee Kleofas nia feen, no Maria Madalena hamriik besik krús. 26Bainhira Jesus haree Ninia inan, no eskolante ida nebee Nia hadomi hamriik besik, Nia dehan ba Ninia inan, “Feto, haree ba, o nia oan mane!” 27Depois Nia dehan ba eskolante ida nee, “Haree ba, o nia inan mak nee!” Entaun hosi oras nee, eskolante ida nee simu feto nee ba ninia uma.

Jesus Mate

28Liu tiha nee, Jesus hatene buat hotu kompletu ona. No hodi kumpri eskritura,#19:28 Haree Salmu 69:21. ‘Kompletu’ nee hosi lian Gregu telio. ‘Kumpri’ nee hosi lian Gregu telios katak ‘halo kompletu’. Haree João 17:4 no Filipe 3:12 no nota. Nia dehan, “Hau hamrook.” 29#19:29-30 Haree Mateus 27:48-50, Marcos 15:36-37, Lucas 23:36.Iha nebaa, ema tau buli ida nebee nakonu ho tua siin. Sira habokon esponja ida iha tua siin nee, tau iha ai sanak isope, no lolo ba Ninia ibun. 30Bainhira Jesus simu tiha tua siin nee, Nia dehan, “Hotu ona.” Depois Nia hakruuk Ninia ulun, no entrega Ninia espíritu.

Ema Sona Jesus

31Loron nee mak loron preparasaun, no loron Sabdu nebee tuir mai mak loron boot. Tanba nee ema Judeu sira husu Pilatos katak nia bele baku tohar ema sira nee nia ain no hasai sira. Nunee mate isin sira nee la bele hela iha krús iha loron Sabdu.#19:31 Tuir ema Judeu sira nia lei, sira la bele husik ema iha krús liu loron ida. Haree Deuteronómiu 21:23. 32Entaun soldadu sira mai, no baku tohar ema primeiru nia ain, no mos ida seluk nebee prega iha krús ho Jesus. 33Maibee bainhira sira too iha Jesus, sira haree katak Nia mate ona, nunee sira la baku tohar Ninia ain. 34Maibee soldadu ida sona Ninia sorin ho dima, no raan ho bee suli sai kedas. 35Ema nebee haree ida nee mak foo sasin. No ninia sasin nee loos. Nia hatene katak nia koalia lia loos. Nunee imi mos bele fiar. 36Tanba buat sira nee akontese hodi kumpri eskritura, “Ninia ruin ida mos sei la tohar.”#19:36 Iha loron nebee Jesus mate, ema Judeu sira mos oho bibi Páskua nian maibee la bele halo tohar bibi nia ruin. Haree Exodu 12:46 no Númeru 9:12. 37No eskritura ida fali dehan, “Sira sei hateke ba nia nebee sira sona.”#19:37 Hosi Zakarias 12:10.

Sira Hakoi Jesus

38Tuir mai, José hosi Arimateia husu Pilatos atu nia bele foti Jesus nia mate isin. Nia mak Jesus nia eskolante ida, maibee sub-subar deit tanba nia tauk ema Judeu sira. Pilatos foo lisensa ba nia, entaun nia baa no foti Jesus nia mate isin. 39Nicodemos mos mai no lori buat morin, nebee kahur mina mira ho aloes, maizoumenus kilograma tolu-nulu resin tolu. Nia mak ema nebee uluk baa hasoru Jesus iha kalan.#19:39 Lee kona ba Nicodemus hasoru Jesus iha João 3:1-15. 40Sira foti Jesus nia mate isin, no falun ho hena linhu no buat morin, tuir ema Judeu sira nia kostumi atu hakoi mate isin. 41Fatin nebee sira prega Jesus ba krús nee iha jardin ida. No jardin nee iha rate foun ida nebee ema seidauk tau mate isin. 42Entaun tanba ema Judeu sira nia loron preparasaun, no tanba rate nee besik fatin nee, sira tau Jesus iha nebaa.

Currently Selected:

João 19: BK

Highlight

Copy

Compare