João 20

Jesus Moris Hias

1 #20:1-8 Haree Mateus 28:1-8, Marcos 16:1-8, Lucas 24:1-10. Iha loron primeiru iha semana nee, dadeer-saan nakukun, Maria Madalena baa sedu too iha rate. Nia haree katak fatuk nee hasai tiha ona hosi rate. 2Entaun nia halai no baa hasoru Simão Pedro, no eskolante ida seluk, nebee Jesus hadomi, no dehan ba sira, “Sira foti tiha ona Nai hosi rate, no ami la hatene sira tau Nia iha nebee.” 3Nunee Pedro sai ba, ho eskolante ida fali, atu baa rate. 4Sira nain rua halai hamutuk. No eskolante ida seluk lalais liu Pedro, no nia too uluk iha rate. 5No nia hakruuk hodi hateke ba laran. Nia haree ropa linhu rai hela iha nebaa, maibee nia la tama. 6Depois Simão Pedro too tuir nia, no tama ba rate laran. Nia haree ropa linhu nebee rai hela. 7Hena nebee falun ba Jesus nia ulun la hamutuk ho ropa linhu, maibee lulun tiha no tau ketak iha fatin seluk. 8Depois eskolante ida seluk, nebee too uluk ba rate, mos tama ba laran. Nia haree no fiar. 9Tanba sira seidauk kompriende eskritura, katak Jesus tenki moris hias hosi mate. 10Depois eskolante sira fila fali ba sira nia uma.

Jesus Hatudu Aan Ba Maria Madalena

11Maibee Maria hamriik iha rate liur no tanis hela. Bainhira nia tanis hela, nia hakruuk hodi hateke ba rate laran. 12No nia haree anju rua nebee hatais ropa mutin no tuur iha fatin nebee uluk ema tau Jesus. Ida tuur iha ulun fatin, no ida seluk tuur iha ain fatin. 13Sira dehan ba nia, “Feto, tanba saa mak o tanis?” Nia dehan ba sira, “Tanba sira foti ona hau nia Nai, no Hau la hatene sira tau Nia iha nebee.” 14Bainhira nia koalia nunee, nia fila oin no haree Jesus hamriik iha nebaa. Maibee nia la hatene katak ema nee mak Jesus. 15Jesus dehan ba nia, “Feto, tanba saa mak o tanis? O buka see?” Maria hanoin katak Jesus mak ema nebee servisu iha jardin. Maria dehan, “Senhor, se karik Ita Boot lori ona Nia hosi fatin nee, foo hatene mai hau, Ita Boot tau Nia iha fatin nebee, no hau sei baa foti Nia.” 16Jesus dehan ba nia, “Maria.” Maria fila oin, no dehan ba Nia, “Rabi!” (katak ‘Mestri’). 17Jesus dehan ba nia, “Keta kaer Hau, tanba Hau seidauk sae ba Hau nia Aman. Maibee baa hasoru Hau nia maun-alin sira, no dehan ba sira, ‘Hau sei sae ba Hau nia Aman, no imi nia Aman, ba Hau nia Maromak, no imi nia Maromak.’” 18Maria Madalena baa no foo hatene ba eskolante sira, “Hau haree ona Nai!” No nia hatoo liafuan nebee Jesus dehan ba nia.

Jesus Hatudu Aan Ba Eskolante Sira

19Iha loron nee, nebee loron primeiru iha semana nee, bainhira kalan ona no odamatan taka tiha, eskolante sira halibur hamutuk tanba sira tauk ema Judeu sira. No Jesus mai no hamriik iha sira nia leet. Nia dehan ba sira, “Dame hela ho imi.” 20Koalia tiha nunee, Jesus hatudu Ninia liman no Ninia sorin ba sira. Bainhira eskolante sira haree Nai, sira haksolok. 21Depois Jesus dehan fali ba sira, “Dame hela ho imi. Hanesan Aman haruka ona Hau, nunee mos Hau haruka imi.” 22Koalia tiha nunee, Nia huu iis ba sira, no dehan ba sira, “Simu Espíritu Santu ba. 23Se imi foo perdaun ba ema ruma nia sala, sira sei hetan perdaun. Se imi la foo perdaun ba ema, sira sei la hetan.”

Jesus Hatudu Aan Ba Tomé

24Maibee Tomé, ema ida hosi sira nain sanulu resin rua nee, nebee bolu Kaduak, la hamutuk ho sira bainhira Jesus mai. 25Entaun eskolante sira seluk dehan ba nia, “Ami haree ona Nai.” Maibee nia dehan ba sira, “Se hau la haree Ninia kanek hosi pregu iha Ninia liman, no se hau la tau hau nia liman fuan iha kanek hosi pregu nee, no se hau la hatama hau nia liman ba Ninia sorin, hau sei nunka fiar.”

26Liu tiha loron ualu, Jesus nia eskolante sira halibur hamutuk fali iha uma laran. No Tomé mos hamutuk ho sira. Maski odamatan xavi metin hela, Jesus mai, no hamriik iha sira nia leet. No Nia dehan, “Dame hela ho imi.” 27Depois Nia dehan ba Tomé, “Tau o nia liman fuan iha nee, no haree Hau nia liman. Lolo o nia liman, no hatama ba Hau nia sorin. Keta lakon fiar, maibee fiar ba.” 28Tomé hataan ba Nia, “Hau nia Nai no hau nia Maromak!” 29Jesus dehan ba Tomé, “O fiar tanba o haree Hau ka? Haksolok ba sira nebee fiar, maski la haree.”

Surat Nee Nia Objetivu

30Jesus halo milagre barak tan iha Ninia eskolante sira nia oin nebee la hakerek iha surat ida nee. 31Maibee buat sira nee hakerek ona atu imi bele fiar katak Jesus mak Kristu, Maromak nia Oan; no katak liu hosi fiar nee, imi bele hetan moris iha Ninia naran.

Currently Selected:

João 20: BK

Highlight

Copy

Compare