João 21

Jesus Iha Tasi Ibun

1Tuir mai, Jesus hatudu Aan fali ba eskolante sira iha Tasi Tiberiades. No Nia hatudu Aan hanesan nee. 2Simão Pedro halibur hamutuk ho Tomé, nebee bolu Kaduak, Natanael hosi Kaná iha Galileia, Zebedeu nia oan mane sira, no Jesus nia eskolante rua tan. 3Simão Pedro dehan ba sira, “Hau baa kaer ikan.” Sira dehan ba nia, “Ami mos baa ho ita.” Sira baa no sae roo. Maibee kalan nee sira la hetan buat ida.

4Bainhira dadeer-saan ona, Jesus hamriik iha tasi ibun, maibee eskolante sira nee la hatene katak Nia mak Jesus. 5Depois Jesus dehan ba sira, “Labarik sira, modo iha ka lae?” Sira hataan ba Nia, “La iha.” 6No Nia dehan ba sira, “Soe dai ba roo nia sorin loos, no imi sei hetan.” Nunee sira soe dai, no sira la bele dada fali dai nee tanba ikan barak tebe-tebes. 7Nunee eskolante ida nebee Jesus hadomi dehan ba Pedro, “Ema nee mak Nai!” Bainhira Simão Pedro rona katak ema nee mak Nai, nia hatais ninia ropa (tanba nia isin tanan) no haksoit ba tasi laran. 8Eskolante sira seluk mai ho roo no dada dai nebee nakonu ho ikan, tanba sira laduun dook hosi rai maran, maizoumenus metru sia-nulu.#21:8 Gregu dehan kóvado 200, nebee kóvado ida mak 45cm.

9Bainhira sira too rai maran, sira haree ahi klaak ho ikan tunu hela no mos paun. 10Jesus dehan ba sira, “Lori mai ikan balu nebee imi foin kaer nee.” 11Entaun Simão Pedro sae roo no dada dai nee ba rai maran, nakonu ho ikan boot, hamutuk atus ida lima-nulu resin tolu. Maski ikan barak, maibee dai nee la naklees. 12Jesus dehan ba sira, “Mai haan.” La iha eskolante ida mak brani atu husu Nia, “See mak O?” Tanba sira hatene katak Nia mak Nai. 13Jesus hakbesik mai, foti paun no foo ba sira. Nia halo hanesan nunee ho ikan. 14Nee mak dala tolu ona nebee Jesus hatudu Aan ba Ninia eskolante sira, bainhira Nia moris hias ona hosi mate.

Jesus Ho Pedro

15Bainhira sira haan hotu tiha, Jesus dehan ba Simão Pedro, “Simão, João nia oan, o hadomi#21:15 Gregu dehan agapé nebee ‘hadomi atu serví’, iha mos Jesus nia pergunta ba dala rua. Hau liu fali sira nee ka?” Pedro dehan ba Jesus, “Sin, Nai. O hatene katak hau hadomi O.”#21:15 Gregu dehan fileo nebee ‘hadomi nudar belun’, iha mos Jesus nia pergunta ba dala tolu. Pedro sempre hataan ho liafuan fileo. Jesus dehan ba nia, “Foo haan ba Hau nia bibi oan sira.” 16Ba dala rua, Jesus dehan ba nia, “Simão, João nia oan, o hadomi Hau ka?” Nia dehan ba Jesus, “Sin, Nai. O hatene katak hau hadomi O.” Jesus dehan ba nia, “Tau matan ba Hau nia bibi sira.” 17Ba dala tolu, Jesus dehan ba nia, “Simão, João nia oan, o hadomi Hau ka?” Pedro sai tristi tanba Jesus husu dala tolu ona, “O hadomi Hau ka?” No nia dehan ba Jesus, “Nai, O hatene buat hotu. O hatene katak hau hadomi O.” Jesus dehan ba nia, “Foo haan ba Hau nia bibi sira. 18Tebes, tebes, Hau dehan ba o, katak bainhira o sei joven, o hatais aan no lao baa nebee deit tuir o nia hakarak. Maibee bainhira o sai katuas ona, o sei lolo o nia liman, no ema seluk sei foo hatais o, no lori o ba fatin nebee o lakohi.” 19Jesus koalia nunee hodi foo hatene oinsaa mak Pedro atu mate hodi foo glória ba Maromak. No bainhira Jesus koalia tiha liafuan nee, Nia dehan ba Pedro, “Tuir Hau.”

Eskolante Nebee Jesus Hadomi

20Depois Pedro fila oin no haree eskolante ida nebee Jesus hadomi lao tuir sira. Nia#21:20 Ema hanoin katak João koalia kona ba ninia aan rasik. Haree João 13:21-26. mak ida nebee uluk sadere ba Jesus nia hirus matan bainhira haan kalan no dehan, “Nai, see mak ema nee, nebee atu faan O?” 21Bainhira Pedro haree eskolante nee, nia dehan ba Jesus, “Nai, oinsaa kona ba ema nee?” 22Jesus dehan ba nia, “Se karik Hau hakarak ema nee hela too Hau mai fali, saida mak nee ba o? O tuir Hau ba!” 23Entaun liafuan nee habelar iha maun-alin sira nia leet, katak eskolante nee sei la mate. Maibee Jesus la dehan ba nia katak ema nee la mate. Maibee Jesus dehan, “Se karik Hau hakarak ema nee hela too Hau mai fali, saida mak nee ba o?”

24Eskolante ida nee mak foo sasin kona ba buat sira nee, no nia mak hakerek buat sira nee. No ita hatene katak ninia sasin nee mak loos.

25Tuir lo-loos, iha buat barak tan nebee Jesus halo. Se karik ema hakerek buat sira nee hotu, hau hanoin katak mundu mos la too atu rai livru sira nee, nebee ema bele hakerek.

Currently Selected:

João 21: BK

Highlight

Copy

Compare