João 9
9
Jesus Kura Ema Matan Delek
1Bainhira Jesus liu dadaun, Nia haree mane ida nebee moris mai matan delek nanis. 2No Ninia eskolante sira husu Nia, “Rabi, see mak sala hodi halo nia moris mai matan delek? Mane nee ka ninia inan-aman?” 3Jesus hataan, “Laos katak mane nee mak sala ka ninia inan-aman mak sala, maibee hodi Maromak bele hatudu Ninia hahalok liu hosi mane nee. 4Bainhira sei loron hela, ita tenki halo servisu hosi Nia nebee haruka Hau mai. Tanba kalan sei mai, bainhira ema ida la bele servisu. 5Bainhira Hau sei iha mundu hela, Hau mak naroman ba mundu.” 6Koalia tiha nunee, Nia tafui kabeen ba rai no halo tahu ho Ninia kabeen. Depois Nia kose tahu nee ba ema matan delek nia matan. 7Nia dehan ba mane nee, “Baa fasi iha kolan Siloé.” (nee katak ‘Haruka’) Entaun mane nee baa no fasi aan. Nia mai fali no bele haree ona.
8Mane nee nia vizinhu sira no sira nebee uluk haree nia baibain husu ezmola, dehan, “Laos nia mak mane nebee uluk tuur husu ezmola?” 9Balu dehan, “Nia mak mane nee duni.” Ema seluk dehan, “Lae, só nia iha oin hanesan mane nee.” Maibee nia rasik dehan, “Hau mak nia.” 10Nunee sira dehan ba nia, “Oinsaa mak o nia matan nakloke?” 11Nia hataan dehan, “Mane ida naran Jesus halo tahu, no kose ba hau nia matan. Nia dehan mai hau, ‘Baa fasi iha kolan Siloé.’ Hau baa fasi tiha, no hau bele haree.” 12Sira dehan ba nia, “Ema nee iha nebee?” Nia dehan, “Hau la hatene.”
13Sira lori mane nebee uluk matan delek ba ema Farizeu sira. 14No loron nebee Jesus halo tahu no loke mane nee nia matan mak loron Sabdu. 15Entaun ema Farizeu sira husu fali nia oinsaa nia bele haree. Nia dehan ba sira, “Ema tau tahu ba hau nia matan. Hau fasi aan, no agora hau haree.” 16Ema Farizeu balu dehan, “Ema nee laos hosi Maromak. Tanba Nia la halo tuir loron Sabdu.” Ema seluk dehan, “Oinsaa mak sala nain ida bele halo milagre sira hanesan nee?” Nunee sira haksesuk malu. 17Entaun sira dehan fali ba ema matan delek nee, “O dehan saida kona ba Ema nebee loke o nia matan?” Mane nee dehan, “Nia mak profeta ida.”
18Maibee ema Judeu sira la fiar katak mane nee uluk matan delek no agora bele haree. Entaun sira bolu inan-aman hosi mane nebee bele haree fali nee. 19Ema Farizeu husu sira, “Ida nee mak imi nia oan nebee imi dehan katak nia moris mai matan delek ka? Entaun oinsaa mak agora nia bele haree? 20Mane nee nia inan-aman hataan, “Ami hatene katak mane nee mak ami nia oan, no katak nia moris mai matan delek. 21Maibee kona ba oinsaa mak agora nia bele haree, ami la hatene. No ami la hatene see mak loke ninia matan. Nia boot ona, husu took nia. Nia bele hataan mesak.” 22Ninia inan-aman koalia hanesan nee tanba sira tauk ema Judeu sira. Tanba ema Judeu sira konkorda ona katak se ema ruma konfesa katak Jesus mak Kristu, sira sei hasai ema nee hosi sinagoga. 23Nunee ninia inan-aman dehan, “Nia boot ona, husu took nia.”
24Sira bolu fali mane nebee uluk matan delek, no sira dehan ba nia, “Foo glória ba Maromak. Ami hatene katak Ema nee mak sala nain.” 25Nia hataan, “Se Nia mak sala nain ka lae, hau la hatene. Só hau hatene deit buat ida nee: uluk hau matan delek, no agora hau haree.” 26Sira dehan fali ba mane nee, “Nia halo saida ba o? Oinsaa mak Nia loke o nia matan?” 27Mane nee hataan ba sira, “Hau foo hatene ona ba imi, no imi la rona. Tanba saa mak imi hakarak rona fali? Imi mos hakarak sai Ninia eskolante sira ka?” 28No sira hatete aat mane nee no dehan, “O mak Ninia eskolante, maibee ami mak Moisés nia eskolante sira. 29Ami hatene katak Maromak koalia ba Moisés. Maibee kona ba ema nee, ami la hatene Nia mai hosi nebee.” 30Mane nee hataan no dehan ba sira, “Nee ka, hau admira! Imi la hatene Nia mai hosi nebee, maibee Nia loke hau nia matan. 31Ita hatene katak Maromak la rona tuir sala nain sira. Maibee Maromak rona ba ema nebee adora Maromak no halo tuir Ninia hakarak. 32Hori uluk kedas too agora#9:32 Lian Gregu dehan ‘hosi tempu hahuu’. ema seidauk rona kona ba ema ida nebee loke matan hosi ema nebee moris mai matan delek. 33Se Mane nee laos hosi Maromak karik, Nia la bele halo buat ida.” 34Sira hataan ba nia, “O moris mai iha sala laran, no o hakarak hanorin fali ami ka?” No sira duni sai tiha nia ba liur.
35Jesus rona katak sira duni sai mane nee. Bainhira Nia hetan mane nee, Nia dehan, “O fiar ba Maromak nia Oan ka?” 36Mane nee hataan dehan, “Nai, Nia mak see? Atu nunee hau bele fiar ba Nia.” 37No Jesus dehan ba mane nee, “O haree tiha ona Nia, no Nia mak koalia dadaun ho o.” 38Mane nee dehan, “Nai, hau fiar.” No mane nee adora Nia. 39Jesus dehan, “Tanba tesi lia mak Hau tama mai iha mundu nee, atu sira nebee la haree bele haree, no sira nebee bele haree sei sai matan delek.” 40Ema Farizeu balu nebee besik Nia rona liafuan nee, no dehan ba Nia, “Ami mos matan delek ka?” 41Jesus dehan ba sira, “Se imi matan delek, imi la iha sala. Maibee agora imi dehan, ‘Ami bele haree,’ nunee imi nia sala hela nafatin.”
Currently Selected:
João 9: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
