João 8

Feto Nebee Halo Sala Adultériu

1Maibee Jesus baa Foho Oliveira. 2Iha dadeer-saan, Nia tama fali ba Templu. Povu hotu hakbesik mai Nia, no Nia tuur hodi hanorin sira. 3Ema eskriba no Farizeu sira lori feto ida ba Jesus nebee sira kaer toman bainhira feto nee halo hela sala adultériu. Sira tau feto nee iha ema nia leet. 4No sira dehan ba Jesus, “Mestri, ema toman feto nee bainhira nia halo hela sala adultériu. 5Tuir Lei, Moisés manda ita atu tuda mate feto hanesan nee ho fatuk.#8:5 Haree lei iha Deuteronómiu 22:22. Maibee O dehan oinsaa?” 6Sira koalia hanesan nee hodi koko Nia, atu sira bele akuza Nia. Maibee Jesus hakruuk no hakerek iha rai ho Ninia liman fuan. 7Bainhira sira husu beibeik ba Nia, Nia hamriik no dehan ba sira, “Imi ida nebee sala la iha, husik nia tuda uluk fatuk ba feto nee.” 8No Nia hakruuk fali no hakerek iha rai. 9Bainhira sira rona liafuan nee, sira ida-idak sai deit, hahuu hosi katuas sira. Ikus mai, Jesus mesak deit ho feto nebee hamriik iha Ninia oin. 10Bainhira Jesus hamriik, no haree ema sira nee ida la iha, só feto deit, Nia dehan ba feto, “Feto, sira baa nebee? La iha ema ida mak kondena o ka? 11Feto dehan, “La iha, Nai.” No Jesus dehan ba nia, “Hau mos la kondena o. Baa deit, no keta halo sala tan.”]#8:1-11 Manuskritu antigu liu la iha versíkulu 8:1-11 nee.

Jesus Mak Naroman Ba Mundu

12Jesus koalia tan ba sira, no dehan, “Hau mak naroman mundu nian. Ema nebee tuir Hau sei la lao iha nakukun laran, maibee nia sei iha naroman moris nian.” 13Entaun ema Farizeu sira dehan ba Nia, “O foo sasin kona ba O nia aan rasik. Nunee O nia sasin la loos.” 14Jesus hataan, “Maski Hau foo sasin kona ba Hau nia aan rasik, Hau nia sasin nee loos. Tanba Hau hatene Hau mai hosi nebee no Hau atu baa iha nebee. Maibee imi la hatene Hau mai hosi nebee no Hau atu baa iha nebee. 15Imi tesi lia tuir sistema isin nian.#8:15 Nee katak tesi lia tuir buat nebee sira haree ka hanoin mundu nian. Haree João 3:6. Hau la tesi lia ba ema ida. 16Maibee se Hau tesi lia karik, Hau nia julgamentu mak loos. Tanba Hau la mesak, maibee Hau hamutuk ho Aman nebee haruka Hau mai. 17Iha imi nia Lei sira hakerek katak testemunha hosi ema nain rua mak loos. 18Hau mak ida nebee foo sasin kona ba Hau nia aan rasik, no Aman nebee haruka Hau mai foo sasin kona ba Hau.” 19Entaun sira dehan ba Nia, “O nia Aman iha nebee?” Jesus hataan, “Imi la hatene Hau ka Hau nia Aman. Se imi hatene Hau, imi sei hatene mos Hau nia Aman.” 20Jesus koalia liafuan nee iha tezourária, bainhira Nia hanorin iha Templu. Maibee la iha ema ida mak kaer Nia, tanba Ninia oras seidauk too.

21Jesus dehan fali ba sira, “Hau sei sai ba, no imi sei buka Hau, maibee imi sei mate iha imi nia sala. Fatin nebee Hau baa, imi la bele baa.” 22Nunee ema Judeu sira dehan, “Nia sei oho aan ka? Tanba Nia dehan, ‘Fatin nebee Hau baa, imi la bele baa.’” 23Nia dehan ba sira, “Imi hosi kraik; Hau hosi leten. Imi hosi mundu nee; Hau laos hosi mundu nee. 24Nunee Hau dehan ba imi, katak imi sei mate iha imi nia sala. Tanba se imi la fiar katak Hau mak Nia, imi sei mate iha imi nia sala.” 25Entaun sira husu ba Nia, “See mak O?” Jesus dehan ba sira, “Hau mak Nia nebee Hau dehan nafatin ba imi hori uluk kedas. 26Hau iha buat barak atu dehan kona ba imi, no buat barak atu tesi lia. Maibee Nia nebee haruka Hau mai mak loos. No Hau foo sai ba mundu liafuan nebee Hau rona hosi Nia.” 27Sira la kompriende katak Nia koalia ba sira kona ba Aman. 28Entaun Jesus dehan ba sira, “Bainhira imi hiit sae Ema Nia Oan,#8:28 Jesus refere ba tempu nebee sira hiit sae Nia iha krus. Haree João 3:14. mak foin imi hatene katak Hau mak Nia. No imi sei hatene katak Hau la halo buat ida hosi Hau nia aan rasik, maibee Hau foo sai buat sira nebee Hau nia Aman hanorin mai Hau. 29Nia nebee haruka Hau mai mak hamutuk ho Hau. Nia la husik Hau mesak, tanba Hau sempre halo buat sira nebee halo Nia kontenti.” 30Bainhira Jesus koalia liafuan nee, ema barak fiar ba Nia.

Lia Loos Sei Foo Liberdade

31Jesus dehan ba ema Judeu sira nebee fiar ba Nia, “Se imi hela iha Hau nia liafuan, imi mak Hau nia disípulu duni. 32No imi sei hatene lia loos, no lia loos sei halo imi livre.” 33Sira hataan ba Nia, “Ami mak Abraão nia bei-oan, no ami nunka sai atan ba ema ida. Nusaa mak O dehan, ‘Imi sei sai livre’?”

34Jesus hataan ba sira, “Tebes, tebes, Hau dehan ba imi, see deit nebee halo sala mak atan ba sala. 35Atan sei la hela nafatin iha uma too tinan ba tinan, maibee Oan Mane mak hela nafatin too tinan ba tinan. 36Nunee se Oan Mane mak halo imi livre, imi sei sai livre duni. 37Hau hatene katak imi mak Abraão nia bei-oan. Maibee imi buka atu oho Hau, tanba Hau nia liafuan la hetan fatin iha imi nia laran. 38Hau koalia buat nebee Hau haree ona hosi Hau nia Aman, no imi halo buat nebee imi haree ona hosi imi nia aman.”

Imi Nia Aman Mak Diabu

39Sira hataan ba Nia, “Abraão mak ami nia aman.” Jesus dehan ba sira, “Se imi mak Abraão nia oan duni, imi sei halo tuir Abraão nia hahalok. 40Maibee agora imi buka atu oho Hau, nebee foo sai ba imi lia loos nebee Hau rona hosi Maromak. Abraão la halo ida nee. 41Imi halo tuir hahalok hosi imi nia aman.” Sira dehan ba Nia, “Ami la moris mai hosi sala seksuál. Ami iha Aman ida deit, nebee Maromak.” 42Jesus dehan ba sira, “Se Maromak imi nia Aman, imi sei hadomi Hau. Tanba Hau mai hosi Maromak no Hau iha nee. Hau la mai tanba Hau nia hakarak rasik, maibee Nia mak haruka Hau mai. 43Tanba saa mak imi la kompriende buat nebee Hau dehan? Tanba imi la bele rona Hau nia liafuan. 44Imi hosi imi nia aman diabu. No imi hakarak halo tuir imi nia aman nia hakarak. Hori uluk kedas nia mak oho door. Nia la bele hamriik iha lia loos, tanba la iha lia loos iha nia. Bainhira nia koalia bosok, nia koalia tuir ninia aan rasik. Tanba nia mak bosok-teen, no lia bosok nia aman. 45Maibee tanba Hau koalia lia loos ba imi, nunee imi la fiar Hau. 46Imi ida nebee mak bele hatudu katak Hau halo sala? Se Hau koalia lia loos, tanba saa mak imi la fiar Hau? 47Ema nebee hosi Maromak rona Maromak nia liafuan. Imi la rona tanba imi la mai hosi Maromak.”

Jesus Moris Molok Abraão

48Ema Judeu sira hataan ba Nia, “Laos ami koalia loos bainhira ami dehan katak O mak ema Samaria, no O iha diabu ida?” 49Jesus hataan, “Hau la iha diabu ida. Maibee Hau foo onra ba Hau nia Aman, no imi despreza Hau. 50Hau la buka glória ba Hau nia aan rasik. Iha Ida nebee buka glória nee no Nia mak Juis. 51Tebes, tebes, Hau dehan ba imi, se ema ida halo tuir Hau nia liafuan, nia sei nunka mate.” 52Ema Judeu sira dehan ba Nia, “Agora ami hatene katak O iha diabu ida! Abraão mate ona, no profeta sira mos mate ona. Maibee O dehan, ‘Se ema ida halo tuir Hau nia liafuan, nia sei nunka mate.’#8:52 Iha lian Gregu, versíkulu 51 dehan ‘nunka haree mate’, versíkulu 52 dehan ‘nunka haan mate’. 53O boot liu fali ami nia aman Abraão nebee mate ona ka? No profeta sira mos mate ona! O halo aan nee see fali?” 54Jesus hataan, “Se Hau foo onra ba Hau nia aan, Hau nia onra nee la iha folin. Hau nia Aman mak foo onra mai Hau, Nia nebee imi dehan, ‘Nia mak ami nia Maromak.’ 55Maibee imi la konhese Nia. Hau konhese Nia. No se Hau dehan, ‘Hau la konhese Nia,’ Hau sei sai bosok-teen hanesan mos imi. Maibee Hau konhese duni Nia, no halo tuir Ninia liafuan. 56Imi nia aman Abraão haksolok bainhira nia haree Hau nia loron mai. Nia haree loron nee, no nia kontenti.” 57Nunee ema Judeu sira dehan ba Nia, “O nia tinan seidauk too lima-nulu, no O haree tiha ona Abraão ka?” 58Jesus dehan ba sira, “Tebes, tebes, Hau dehan ba imi, molok Abraão moris, Hau iha ona.”#8:58 Ka ‘Hau mak nee’. Jesus uza liafuan nee hodi liga ba Maromak nia naran, ‘Hau Mak Hau.’ Haree Exodu 3:14. 59Nunee sira foti fatuk atu tuda Nia. Maibee Jesus subar aan, no sai hosi Templu.

Currently Selected:

João 8: BK

Highlight

Copy

Compare