João 7
7
Jesus Tuir Festa Tenda
1Tuir mai, Jesus lao ba-mai iha Galileia. Nia la lao ba-mai iha Judeia, tanba ema Judeu sira buka atu oho Nia. 2Ema Judeu sira nia Festa Baraka besik ona.#7:2 Bele lee kona ba Festa Baraka nian iha Levítiku 23:33-43. 3Nunee Ninia alin sira dehan ba Nia, “Sai hosi fatin nee, no baa Judeia, hodi O nia eskolante sira mos bele haree buat nebee O halo. 4Tanba se karik ema ida hakarak sai ema konhesidu, nia la servisu sub-subar deit. Se O halo buat sira nee, hatudu aan ba mundu.” 5Tanba Ninia alin sira mos la fiar ba Nia. 6Jesus dehan ba sira, “Hau nia tempu seidauk too. Maibee imi nia tempu iha nafatin. 7Mundu la bele odi imi, maibee mundu odi Hau. Tanba Hau foo sasin kona ba sira, katak buat nebee sira halo mak aat. 8Imi sae ba no tuir festa nee. Hau la#7:8 Manuskritu balu dehan ‘seidauk’. baa festa nee tanba Hau nia tempu seidauk too.” 9Koalia tiha nunee, Nia hela iha Galileia.
10Maibee bainhira Ninia alin sira baa tiha ona, depois Nia mos sae ba festa. Nia la baa hodi ema hatene, maibee Nia baa nonook deit. 11Ema Judeu sira buka Nia iha festa, no dehan, “Nia iha nebee?” 12No iha povu nia leet ema murmura barak kona ba Nia. Balu dehan, “Nia ema diak.” Ema seluk dehan, “Lae; Nia lori povu ba dalan sala.” 13Maibee ema la koalia kona ba Nia iha ema barak nia oin tanba sira tauk ema Judeu sira.
14Tuir mai, maizoumenus too iha festa klaran, Jesus sae ba iha Templu. No Nia hahuu hanorin iha nebaa. 15Ema Judeu sira admira, no dehan, “Oinsaa mak ema nee hatene liafuan nee? Tanba Nia nunka baa eskola.” 16Jesus hataan ba sira, “Hau nia doutrina laos Hau nian. Maibee doutrina nee mai hosi Nia nebee haruka Hau mai. 17Ema nebee hakarak halo tuir Maromak nia hakarak sei hatene doutrina nee mai hosi Maromak ka Hau koalia hosi Hau nia aan rasik. 18Nia nebee koalia hosi ninia aan rasik buka glória ba ninia aan rasik. Maibee nia nebee buka glória ba ida nebee haruka nia mai, ema nee mak loos, no la iha buat nebee la loos iha nia. 19Laos Moisés foo Lei ba imi? Maibe imi ida la tuir Lei nee. Tanba saa mak imi buka atu oho Hau?” 20Povu nee hataan, “O iha diabu ida! See mak buka atu oho O?” 21Jesus hataan ba sira, “Hau halo milagre ida, no imi hotu hakfodak. 22Moisés foo sirkunsizaun ba imi, no imi foo sirkunsizaun ba ema iha loron Sabdu (maski nee laos hosi Moisés, maibee hosi bei-ala sira).#7:22 Lee kona ba halo sunat iha Jénesis 17:11 no nota. 23Se ema bele simu sirkunsizaun iha loron Sabdu, hodi nunee imi la kontra Moisés nia Lei, entaun tanba saa mak imi hirus Hau bainhira Hau halo ema nia isin tomak diak iha loron Sabdu? 24Keta tesi lia tuir buat nebee imi haree deit, maibee tesi lia tuir julgamentu lo-loos.”
Nia Mak Kristu Ka?
25Entaun ema balu hosi povu Jerusalém dehan, “Laos Nia mak mane nebee sira buka atu oho? 26Maibee haree took, Nia koalia iha ema barak nia oin, no sira la dehan buat ida ba Nia. Nai ulun sira hatene lo-loos katak Nia mak Kristu duni karik? 27Maibee ita hatene ema nee mai hosi nebee. Bainhira Kristu mai, la iha ema ida mak hatene Nia mai hosi nebee.” 28Entaun bainhira Jesus hanorin hela iha Templu, Nia foo sai ho lian makaas, “Imi hatene Hau, no imi hatene Hau mai hosi fatin nebee. Maibee Hau la mai tuir Hau nia hakarak rasik. Nia nebee haruka Hau mai, Nia mak loos. No imi la hatene Nia. 29Hau hatene Nia. Tanba Hau mai hosi Nia, no Nia mak haruka Hau mai.” 30Entaun sira buka atu kaer Nia. Maibee la iha ema ida mak tau liman ba Nia, tanba Ninia oras seidauk too. 31Maski nunee ema barak hosi povu nee fiar ba Nia, no dehan, “Bainhira Kristu mosu mai, Nia sei halo milagre barak liu fali buat nebee ema ida nee halo ka?”
Guarda Mai Atu Kaer Jesus
32Ema Farizeu sira rona katak povu nee murmura hanesan nee kona ba Jesus. Nunee ema Farizeu sira no xefi saserdote sira haruka guarda sira atu baa kaer Nia. 33Entaun Jesus dehan, “Hau sei hamutuk ho imi too tempu uitoan tan. Depois Hau sei fila fali ba Ida nebee haruka Hau mai. 34Imi sei buka Hau, no imi sei la hetan Hau. Iha fatin nebee Hau hela, imi la bele baa.” 35Ema Judeu sira dehan ba malu, “Nia sei baa nebee, hodi ami la bele hetan Nia? Nia sei baa too ema Judeu sira nebee hela iha rai liur,#7:35 Iha tempu uluk, nasaun Babilónia kastigu iha ema Judeu sira no lori sira ba fatin oi-oin. iha ema Gregu sira nia leet, no hanorin ema Gregu sira ka?#7:35 Ema hosi nasaun barak hatene lian Gregu tanba molok tempu Roma, reinu Gregu mak ukun nasaun barak. 36Ninia liafuan nee katak saida bainhira Nia dehan, ‘Imi sei buka Hau, no imi sei la hetan Hau,’ no ‘Iha fatin nebee Hau hela, imi la bele baa’?”
Mota Bee Moris
37Iha loron ikus, nebee iha loron boot iha festa nee, Jesus hamriik no foo sai ho lian makaas, “Se ema ruma hamrook karik, husik nia mai iha Hau, no hemu. 38See deit nebee fiar iha Hau, hanesan eskritura dehan, ‘Hosi ninia laran sei suli sai mota bee moris nian.’” 39Nia koalia kona ba Espíritu nebee sira nebee fiar ba Nia sei simu. Maibee too tempu nee, Maromak seidauk foo Espíritu Santu, tanba Jesus seidauk hetan glória.
Povu Haksesuk Malu
40Bainhira sira rona liafuan nee, povu balu dehan, “Loos duni, Nia mak Profeta.” 41Ema seluk dehan, “Nia mak Kristu.” Maibee ema balu tan dehan, “Kristu sei mai hosi Galileia ka? 42Laos eskritura dehan katak Kristu sei mai hosi David nia bei-oan, no hosi Belém, aldeia nebee uluk David hela ka?” 43Nunee povu fahe malu tanba Nia. 44Sira balu hakarak kaer Nia; maibee la iha ema ida mak brani atu tau liman ba Nia.
45Depois guarda sira fila fali ba xefi saserdote sira no ema Farizeu sira. Sira husu guarda sira nee, “Tanba saa mak imi la lori Nia mai?” 46Guarda sira hataan, “La iha ema ida nebee koalia hanesan Mane nee!” 47Ema Farizeu sira hataan, “Nia mos lohi imi ka? 48Iha nai ulun ida ka ema Farizeu sira ida nebee fiar ona ba Nia ka? 49Maibee povu nee, nebee la hatene Lei, sira hetan malisan.” 50Sira ida naran Nicodemos, nebee uluk hasoru Jesus iha kalan,#7:50 Haree João 3:1. dehan ba sira, 51“Ita nia Lei tesi lia ba ema ida molok ita rona nia ka, no hatene saida mak nia halo?” 52Sira hataan ba nia, “Ita mos hosi Galileia ka? Buka no haree took. Tanba la iha profeta ida nebee sae mai hosi Galileia.”
[Manuskritu antigu liu la inklui 7:53 - 8:11]
53[No sira ida-idak fila ba ninia uma.
Currently Selected:
João 7: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
