João 6

Ai Haan Ba Ema Rihun Lima

1 #6:1-13 Haree Mateus 14:13-21, Marcos 6:32-44, Lucas 9:10-17. Liu tiha nee, Jesus baa iha Tasi Galileia nia sorin ba, nebee ema bolu Tasi Tiberiades. 2Ema lubun boot tuir Nia tanba sira haree ona Ninia milagre sira nebee Nia halo ba ema moras sira. 3No Jesus sae foho ida, no Nia tuur iha nebaa ho Ninia eskolante sira. 4No ema Judeu sira nia Festa Páskua besik ona. 5Jesus foti matan no haree ema lubun boot mai dadaun atu hasoru Nia. Entaun Nia dehan ba Filipe, “Ita bele sosa paun iha nebee atu ema sira nee bele haan?” 6Nia dehan ida nee atu koko Filipe. Tanba Nia hatene ona saida mak Nia atu halo. 7Filipe hataan ba Nia, “Osan denáriu#6:7 Osan denáriu ida mak folin atu selu ema nebee servisu loron ida. atus rua mos la too atu sosa paun hodi ema ida-idak bele hetan paun pedasuk kiik ida.” 8Ninia eskolante ida naran, André, Simão Pedro nia alin, dehan ba Nia, 9“Iha labarik mane ida iha nee. Nia iha paun fuan lima nebee halo hosi trigu boot, no ikan kiik rua. Maibee oinsaa mak ida nee bele too ba ema barak tebes nee?” 10No Jesus dehan, “Haruka sira tuur.” Fatin nebaa iha duut barak. Entaun ema tuur, no sira maizoumenus ema mane nain rihun lima. 11Jesus foti paun sira nee. Nia foo agradese, no fahe paun ba eskolante sira. Depois eskolante sira fahe ba sira nebee tuur. Nia halo hanesan ho ikan too sira bosu. 12Bainhira sira bosu ona, Nia dehan ba Ninia eskolante sira, “Halibur tiha hahaan restu. La bele estraga buat ida.” 13Nunee sira halibur hamutuk hahaan resin nee. Sira halibur pedasuk sira hosi paun trigu boot fuan lima too bote sanulu resin rua nakonu. Hahaan nee mak resin hosi buat nebee ema haan tiha ona. 14Bainhira povu haree ona milagre nebee Jesus halo nee, sira dehan, “Tebes duni, Nia mak Profeta nebee atu tama mai iha mundu nee!”#6:14 Maromak promete Profeta espesiál ida liu hosi Moisés. Haree Deuteronómiu 18:15.

15Jesus haree katak sira atu mai kaer Nia no obriga Nia atu sai liurai, nunee Nia husik sira no sae ba foho mes-mesak.

Jesus Lao Iha Bee Leten

16 #6:16-21 Haree Mateus 14:22-33, Marcos 6:45-52. Bainhira rai nakaras ona, Jesus nia eskolante sira tuun ba tasi. 17Sira sae roo ida atu hakur tasi ba iha Kafarnaum. Kalan ona, no Jesus seidauk mai too sira. 18Depois tasi sai boot tanba anin huu makaas. 19Bainhira sira hean roo too maizoumenus kilometru lima ka neen,#6:19 Gregu dehan ‘stadia 25 ka 30’, nebee stadia ida mak 185m. sira haree Jesus lao iha tasi leten. Nia hakbesik ba roo no sira tauk. 20Maibee Nia dehan ba sira, “Nee mak Hau. Keta tauk!” 21Nunee, sira kontenti atu simu Nia tama ba iha roo laran. No derepenti roo too iha fatin nebee sira atu baa.

Jesus Mak Paun Moris Nian

22Loron tuir mai, ema lubun nebee hela iha tasi sorin ba haree katak la iha roo seluk iha nebaa, só deit roo ida nebee Jesus nia eskolante sira sae tiha. No sira hatene katak Jesus la baa ho Ninia eskolante sira iha roo laran, maibee Ninia eskolante sira mak baa mesak. 23Roo sira seluk mai hosi Tiberiades besik too fatin nebee Nai foo agradese no sira haan paun. 24Nunee bainhira ema lubun nee haree katak Jesus la iha, no Ninia eskolante sira mos la iha, sira sae roo no baa too Kafarnaum hodi buka Jesus.

25Bainhira sira hetan Nia iha tasi sorin ba, sira dehan ba Nia, “Rabi, bainhira mak O too iha nee?” 26Jesus hataan ba sira, “Tebes, tebes, Hau dehan ba imi: Imi buka Hau, laos tanba imi haree milagre sira, maibee tanba imi haan paun too bosu. 27Keta servisu atu hetan hahaan nebee lakon mohu, maibee servisu atu hetan hahaan nebee dura too moris rohan laek. Ema Nia Oan sei foo hahaan nee ba imi. Tanba Aman Maromak tau tiha ona marka#6:27 Liafuan iha Gregu hanesan ‘karimbu’. Sira uza karimbu hodi taka ba surat. Ukun nain bele mos taka ba sanan rai nebee tau ai haan hodi hatudu ai haan nee mak ninian duni. Haree dezenhu iha Jénesis 41:42. ba Nia.” 28Depois sira dehan ba Nia, “Saida mak ami tenki halo atu halao Maromak nia servisu?” 29Jesus hataan ba sira, “Ida nee mak Maromak nia servisu, katak imi fiar ba Ida nebee Nia haruka mai.” 30Nunee sira dehan ba Jesus, “Entaun sinál saida mak O sei hatudu, hodi ami bele haree no fiar O? O sei halo saida? 31Ami nia bei-ala sira haan maná iha rai fuik, tuir liafuan nebee hakerek ona, ‘Nia foo paun hosi lalehan ba sira atu haan.’”#6:31 Haree liafuan nee iha Neemias 9:15, no istória iha Exodu 16:4. 32Jesus dehan ba sira, “Tebes, tebes, Hau dehan ba imi katak laos Moisés mak foo paun hosi lalehan ba imi, maibee Hau nia Aman mak foo Paun lo-loos hosi lalehan ba imi. 33Tanba Maromak nia Paun mak Nia nebee tuun mai hosi lalehan, no foo moris ba mundu.” 34Sira dehan ba Nia, “Nai, foo nafatin paun nee mai ami.”

35Jesus dehan ba sira, “Hau mak Paun moris nian. Ema nebee mai ba Hau sei la hamlaha tan. No ema nebee fiar ba Hau sei la hamrook tan. 36Maibee Hau dehan ona ba imi, katak imi haree ona Hau, maibee imi la fiar. 37Ema hotu nebee Aman foo mai Hau, sei mai iha Hau. No nia nebee mai iha Hau, Hau sei la duni sai. 38Tanba Hau tuun mai hosi lalehan, laos atu halo tuir Hau nia hakarak, maibee atu halo tuir hakarak hosi Ida nebee haruka Hau mai. 39Ida nebee haruka Hau mai, Ninia hakarak mak nee: katak Hau sei la lakon ema ida hosi ema hotu nebee Nia foo mai Hau, maibee Hau sei halo sira moris hias iha loron ikus. 40Tanba nee mak Hau nia Aman nia hakarak: katak ema hotu nebee haree Oan Mane no fiar ba Nia, sei hetan moris rohan laek. No Hau sei halo nia moris hias iha loron ikus.

41Entaun ema Judeu sira murmura kona ba Jesus, tanba Nia dehan, “Hau mak Paun nebee tuun mai hosi lalehan.” 42No sira dehan, “Laos Nia mak Jesus, José nia Oan Mane? Laos ami konhese Ninia inan-aman? Nusaa mak agora Nia dehan, ‘Hau tuun mai hosi lalehan?’” 43Jesus hataan ba sira, “Keta murmura ba malu. 44La iha ema ida bele mai iha Hau, só deit Aman, nebee haruka ona Hau, mak dada nia. No Hau sei halo nia moris hias iha loron ikus. 45Profeta sira hakerek nanis ona, ‘Maromak sei hanorin sira hotu.’#6:45 Haree Isaias 54:13. Ema hotu nebee rona no aprende tiha hosi Aman, sei mai iha Hau. 46La iha ema ida nebee haree ona Aman, só deit Nia nebee mai hosi Maromak; Nia mak haree ona Aman. 47Tebes, tebes, Hau dehan ba imi, ema nebee fiar mak hetan moris rohan laek. 48Hau mak Paun moris nian. 49Imi nia bei-ala sira haan maná iha rai fuik, no sira mate ona. 50Maibee Paun ida nee tuun mai hosi lalehan, no ema nebee haan Paun nee sei la mate. 51Hau mak Paun moris nian nebee tuun mai hosi lalehan. Se ema haan Paun nee, nia sei moris tinan ba tinan. Paun nebee Hau sei foo hodi mundu bele moris mak Hau nia isin.”

52Nunee ema Judeu sira haksesuk malu no dehan, “Oinsaa mak Ema nee bele foo Ninia isin mai ita atu haan?” 53Jesus dehan ba sira, “Tebes, tebes, Hau dehan ba imi, se imi la haan Ema Nia Oan nia isin, no la hemu Ninia raan, imi la iha moris iha imi nia laran. 54See-see deit nebee haan Hau nia isin no hemu Hau nia raan, nia hetan moris rohan laek. No Hau sei halo nia moris hias iha loron ikus. 55Tanba Hau nia isin mak ai haan lo-loos, no Hau nia raan mak hemu lo-loos. 56Ema nebee haan Hau nia isin, no hemu Hau nia raan, nia mak hela iha Hau, no Hau hela iha nia. 57Hanesan Aman nebee moris mak haruka Hau mai, no Hau moris tanba Aman, nunee mos ema nebee haan Hau, sei moris tanba Hau. 58Ida nee mak Paun nebee tuun mai hosi lalehan. No Paun nee la hanesan paun nebee imi nia bei-ala sira haan no depois sira mate. Tanba ema nebee haan hosi Paun nee sei moris tinan ba tinan.” 59Jesus dehan buat sira nee iha sinagoga, bainhira Nia hanorin iha Kafarnaum.

Ema Barak Husik Jesus

60Bainhira Ninia eskolante sira rona tiha liafuan nee, barak dehan, “Liafuan nee todan. See mak bele rona?” 61Maibee Jesus hatene iha Ninia laran katak Ninia eskolante sira murmura kona ba liafuan nee. Nunee Nia dehan ba sira, “Liafuan nee halo imi monu ka? 62Nunee saa tan se imi haree Ema Nia Oan sae ba fatin nebee Nia hela uluk? 63Espíritu mak foo moris; isin la folin buat ida. Liafuan nebee Hau koalia ona ba imi mak espíritu no moris. 64Maibee imi balu la fiar.” Tanba Jesus hatene hori uluk kedas,#6:64 Gregu nia liafuan nee dehan hosi tempu hahuu. see mak la fiar, no ida nebee sei faan Nia. 65No Nia dehan, “Tanba nee mak Hau dehan ba imi katak la iha ema ida bele mai iha Hau, só deit nia nebee Aman foo lisensa atu mai.”

66Liu tiha tempu nee, Jesus nia eskolante barak fila kotuk no lakohi lao tan ho Nia. 67Nunee Jesus dehan ba sira nain sanulu resin rua, “Imi mos hakarak baa ka?” 68Simão Pedro hataan ba Nia, “Nai, ami atu baa ho see loos? O mak iha liafuan moris rohan laek nian. 69Ami fiar no hatene duni katak O mak Ida Nebee Santu hosi Maromak.” 70Jesus hataan ba sira, “Laos Hau rasik mak hili imi nain sanulu resin rua? Maibee ema ida hosi imi mak diabu ida.” 71Nia koalia kona ba Judas, Simão Iskariotes nia oan. Tanba nia mak ida nebee sei faan Jesus, maski nia mak ida hosi sira nain sanulu resin rua.

Currently Selected:

João 6: BK

Highlight

Copy

Compare