João 5

Jesus Kura Iha Pixina

1Liu tiha nee, ema Judeu sira halo festa no Jesus sae ba Jerusalém.

2Jerusalém iha kolan ida besik Portaun Bibi,#5:2 Moru haleu sidade Jerusalém ho portaun barak. Portaun Bibi mak iha leten besik ho templu. Haree dezenhu iha Neemias 3:1. nebee iha lian Ebreu naran Betesda. Kolan nee iha varanda lima. 3Ema aleijadu barak toba iha varanda sira nee: ema matan delek, ain aat no isin mate.#5:3 Manuskritu balu aumenta ‘Sira hein bee nakdoko. 4 Tanba dala ruma anju ida tuun mai iha kolan no doko bee. See mak tama uluk iha bee laran bainhira nakdoko tiha, nia sei hetan kura hosi moras nebee nia iha.’ 5Iha nebaa iha mane ida nebee moras too tinan tolu-nulu resin ualu ona. 6Bainhira Jesus haree mane nee toba iha nebaa no Nia hatene katak mane nee toba iha nebaa too tempu kleur ona, Nia dehan ba mane nee, “O hakarak sai diak ka?” 7Mane aleijadu hataan ba Nia, “Senhor, hau la iha ema ida atu hatama hau ba kolan nee bainhira bee book aan. Tanba bainhira hau baa, ema seluk tama uluk liu hau.” 8Jesus dehan ba mane nee, “Hamriik ba. Foti o nia biti, no lao ba.” 9No mane nee sai diak kedas. Nia foti ninia biti, no lao ba. Maibee loron nee mak loron Sabdu.

10Nunee ema Judeu sira dehan ba mane nebee foin isin diak, “Ohin loron mak Sabdu. Tuir lei, o keta lori o nia biti.” 11Nia hataan ba sira, “Ema nebee foo isin diak mai hau dehan mai hau, ‘Foti o nia biti, no lao ba.’” 12Entaun sira husu nia, “See mak dehan ba o, ‘Foti o nia biti, no lao ba’?” 13No mane nebee foin hetan kura nee la hatene see mak kura nia. Tanba Jesus lao sai nonook ba ema lubun boot nia klaran iha fatin nebaa. 14Tuir mai, Jesus hetan mane nee iha Templu, no dehan ba nia, “Haree ba, o isin diak ona! Keta halo sala tan atu nunee buat nebee aat liu tan la bele kona o.” 15Mane nee sai ba no foo hatene ba ema Judeu sira katak ema nebee foo isin diak ba nia mak Jesus. 16Nunee ema Judeu sira hanehan Jesus, tanba Nia halo buat sira nee iha loron Sabdu. 17Maibee Jesus hataan ba sira, “Hau nia Aman servisu nafatin too agora, no Hau mos servisu nafatin.” 18Nunee ema Judeu hakaas aan liu tan atu oho Nia. Tanba Nia la kontra deit loron Sabdu, maibee Nia mos bolu Maromak nudar Ninia Aman rasik. Ho ida nee Nia halo Nia aan hanesan ho Maromak.

Jesus Nia Autoridade

19Entaun Jesus dehan ba sira, “Tebes, tebes, Hau dehan ba imi, Oan Mane la bele halo buat ida mesak deit. Só Nia halo deit buat nebee Nia haree Aman halo. Tanba saida deit mak Aman halo, Oan Mane mos halo hanesan. 20Tanba Aman hadomi Oan Mane, no hatudu ba Oan Mane buat hotu nebee Nia halo. No Nia sei hatudu ba Oan Mane hahalok boot liu fali buat sira nee, hodi halo imi admira. 21Tanba hanesan Aman halo ema mate hadeer fali, no foo moris ba sira; nunee Oan Mane sei foo moris ba ema nebee Nia hakarak. 22Tanba Aman la tesi lia ba ema ida, maibee Nia foo knaar ba Oan Mane atu tesi lia ba ema hotu, 23atu nunee, ema hotu bele foo onra ba Oan Mane, hanesan sira foo onra ba Aman. See deit nebee la foo onra ba Oan Mane, ema nee mos la foo onra ba Aman nebee haruka Nia mai. 24Tebes, tebes, Hau dehan ba imi, ema nebee rona Hau nia liafuan, no fiar Ida nebee haruka Hau mai, nia hetan moris rohan laek. Nia sei la hetan kastigu. Nia muda hosi mate ba moris.

25Tebes, tebes, Hau dehan ba imi, oras sei mai, no agora too ona, bainhira ema mate sei rona Maromak nia Oan nia lian, no sira nebee rona sei moris. 26Tanba hanesan Aman iha moris iha Ninia aan rasik, nunee mos, Nia foo ona ba Oan Mane hodi Nia mos iha moris iha Ninia aan rasik. 27No Aman foo ona kbiit ba Oan Mane atu tesi lia, tanba Nia mak Ema Nia Oan. 28Keta admira kona ba ida nee, tanba oras sei mai bainhira ema hotu nebee iha rate laran sei rona Ninia lian, 29no sira sei sai mai. Ema nebee halo diak, sei hadeer fali no tama ba moris. No ema nebee halo aat, sei hadeer fali no tama ba kastigu.

Jesus Nia Sasin Sira

30Hau la bele halo buat ida mesak deit. Hau tesi lia tuir buat nebee Hau rona. No Hau tesi lia loos. Tanba Hau la buka Hau nia hakarak rasik, maibee hakarak hosi Nia nebee haruka ona Hau mai. 31Se Hau foo sasin kona ba Hau nia aan rasik, Hau nia sasin nee la loos. 32Iha ida seluk nebee foo sasin kona ba Hau, no Hau hatene katak sasin nebee nia foo mak loos. 33Imi haruka ona ema ba João, no nia foo sasin ba lia loos. 34Hau la simu sasin hosi ema, maibee Hau dehan buat sira nee hodi imi bele hetan salvasaun. 35João mak ahi oan nebee lakan no nabilan. No imi kontenti atu haksolok too tempu uitoan iha ninia naroman. 36Maibee Hau iha sasin nebee boot liu João nian. Tanba Aman foo servisu mai Hau atu halo too kompletu. No Hau halo duni servisu nee. No servisu nee foo sasin kona ba Hau katak Aman mak haruka Hau mai. 37No Aman nebee haruka Hau mai, Nia rasik foo sasin kona ba Hau. Imi nunka rona Ninia lian, no imi nunka haree Ninia oin. 38Ninia liafuan la hela iha imi nia laran, tanba imi la fiar Ida nebee Nia haruka mai. 39Imi buka hatene Eskritura sira, tanba imi hanoin katak iha Eskritura mak imi hetan moris rohan laek. No Eskritura foo sasin kona ba Hau. 40Maibee imi lakohi mai iha Hau, hodi imi bele hetan moris. 41Hau la simu glória hosi ema. 42Maibee Hau hatene katak imi la iha Maromak nia domin iha imi nia laran. 43Hau mai hodi Hau nia Aman nia naran, no imi la simu Hau. Se karik ema seluk mai hodi ninia naran rasik, imi sei simu nia. 44Oinsaa mak imi bele fiar? Tanba imi simu glória hosi ema seluk, maibee imi la buka glória nebee mai hosi Maromak, nebee Maromak mesak deit. 45Keta hanoin katak Hau foo sala ba imi iha Aman nia oin. Tanba imi espera ba Moisés, maibee nia mak ida nebee foo sala ba imi. 46Tanba se karik imi fiar Moisés, imi sei fiar Hau. Tanba nia hakerek tiha ona kona ba Hau. 47Maibee se imi la fiar buat nebee nia hakerek, oinsaa mak imi bele fiar Hau nia liafuan?”

Currently Selected:

João 5: BK

Highlight

Copy

Compare