João 4

Jesus Ho Feto Hosi Samaria

1Jesus hatene katak ema Farizeu sira rona ona katak Jesus foo batizmu no hetan eskolante barak liu João. 2Tuir lo-loos, laos Jesus rasik nebee foo batizmu, maibee Ninia eskolante sira. 3Entaun Jesus sai hosi Judeia, no lao fali ba Galileia. 4No Nia tenki lao liu hosi Samaria. 5Nia mai ba sidade ida iha Samaria, naran Sikar. Fatin nee besik rai nebee uluk Jacó foo ba ninia oan mane José.#4:5 Haree Jénesis 33:19 no Josué 24:32. 6Jacó nia bee posu iha nebaa. Jesus kole ho Ninia viajen no Nia tuur iha bee posu nia sorin. Oras nee besik meiudia.

7Feto Samaria ida mai atu kuru bee. Jesus dehan ba nia, “Foo bee mai Hau atu hemu.” 8Tanba Ninia eskolante sira baa tiha ona sidade hodi sosa ai haan. 9Feto Samaria nee dehan ba Nia, “Oinsaa mak Ita, ema Judeu ida, husu fali bee hemu hosi hau, feto Samaria ida?” Tanba ema Judeu sira la koalia ho ema Samaria sira. 10Jesus hataan ba nia, “Se o hatene karik Maromak nia prezenti, no See loos mak dehan ba o, ‘Foo bee mai Hau atu hemu,’ o sei husu Nia, no Nia sei foo bee moris nian ba o.” 11Feto nee dehan ba Jesus, “Mestri, Ita la iha buat ida atu kuru bee, no bee posu nee klean. Nunee ita bele hetan bee moris nian hosi nebee? 12Ita mak boot liu fali ami nia aman Jacó, nebee foo bee posu nee mai ami ka? Nia rasik hemu hosi bee posu nee, no ninia oan sira, no ninia karau sira mos hemu hosi bee nee.” 13Jesus hataan ba nia, “Ema hotu nebee hemu hosi bee nee sei hamrook fali. 14Maibee ema nebee hemu hosi bee nebee Hau sei foo ba nia sei nunka hamrook.#4:14 Lian Gregu inklui ‘too rohan laek’. Tanba bee nebee Hau sei foo ba nia sei sai bee matan nebee suli sai too moris rohan laek.” 15Feto nee dehan ba Jesus, “Mestri, foo bee nee mai hau, hodi hau la bele hamrook tan, no hau la presiza mai tan iha nee atu kuru bee.”

16Jesus dehan ba nia, “Baa bolu o nia laen, no mai iha nee.” 17Feto hataan, “Hau la iha laen.” Jesus dehan ba nia, “O koalia loos bainhira o dehan, ‘Hau la iha laen.’ 18Tanba o hola ona laen nain lima. No mane nebee agora moris hamutuk ho o laos o nia laen. Nunee o koalia loos duni.” 19Feto dehan ba Nia, “Mestri, hau haree katak Ita mak profeta ida. 20Ami nia bei-ala sira adora iha foho nee. Maibee imi dehan katak ema tenki adora iha Jerusalém.” 21Jesus dehan ba nia, “Feto, fiar Hau ba: tempu sei mai bainhira imi sei la adora Aman iha foho nee ka iha Jerusalém. 22Imi adora buat nebee imi la hatene. Ami adora buat nebee ami hatene. Tanba salvasaun mai hosi ema Judeu sira. 23Maibee oras sei mai, no agora tempu too ona, bainhira ema nebee adora lo-loos sei adora Aman iha espíritu no iha lia loos. Tanba Aman buka ema hanesan nee atu adora Nia. 24Maromak mak Espíritu, no sira nebee adora Nia tenki adora iha espíritu no iha lia loos.” 25Feto nee dehan ba Nia, “Hau hatene katak Mesias sei mai, nebee ema bolu Kristu. Bainhira Nia mai, Nia sei foo hatene buat hotu mai ami.” 26Jesus dehan ba nia, “Hau mak Nia, nebee koalia dadaun ho o.”

27Iha momentu nee, Ninia eskolante sira too mai. No sira hakfodak katak Nia koalia ho feto ida. Maibee sira ida la husu, “O presiza saida?” ka, “Tanba saa mak O koalia ho nia?” 28Feto nee husik hela ninia sanan rai no fila fali ba sidade. No nia dehan ba ema, 29“Mai lai! Haree mane ida nebee foo hatene mai hau kona ba buat hotu nebee hau halo tiha ona. Nia mak Kristu karik?” 30Depois sira sai hosi sidade, no mai atu hasoru Nia.

31Iha tempu nee, Ninia eskolante sira husu Nia, no dehan, “Rabi, haan lai.” 32Maibee Nia dehan ba sira, “Hau iha ai haan hodi haan nebee imi la hatene.” 33Nunee eskolante sira dehan ba malu, “Ema lori buat ruma ba Nia atu haan ka?” 34Jesus dehan ba sira, “Hau nia ai haan mak atu halo tuir Ninia hakarak nebee haruka Hau mai, no atu halo Ninia servisu too kompletu. 35Laos imi dehan, ‘Sei hela fulan haat, depois tempu silu batar’? Tebes, Hau hatete ba imi, “Foti sae imi nia matan no haree ba. Toos sira nee prontu atu silu. 36Nia nebee silu simu ninia kolen, no nia halibur rezultadu ba moris rohan laek. Nunee ida nebee kari fini no ida nebee silu sei haksolok hamutuk. 37Tanba iha nee liafuan nee loos duni, katak, ‘Ida kari, no ida seluk silu.’ 38Hau haruka imi atu silu iha fatin nebee imi la servisu. Ema seluk mak halo servisu nee, no imi hetan benefísiu hosi sira nia kolen.”

39Ema Samaria sira hosi sidade nee fiar ba Jesus tanba testemunha hosi feto, nebee dehan, “Nia foo hatene mai hau kona ba buat hotu nebee hau halo ona.” 40Nunee bainhira ema Samaria sira mai too Jesus, sira husu Nia atu hela ho sira. No Nia hela iha nebaa too loron rua. 41No ema barak liu tan fiar tanba Ninia liafuan. 42Sira dehan ba feto nee, “Agora ami fiar, laos tanba o nia liafuan, maibee tanba ami rasik rona Nia. No ami hatene duni katak Nia mak mundu nia Salvadór.”

43Liu tiha loron rua, Nia sai hosi fatin nee, no tama ba Galileia. 44(Jesus rasik foo sasin katak profeta ida la iha onra iha ninia rai rasik.) 45Entaun bainhira Nia tama mai Galileia, ema Galileia sira simu Nia, tanba sira haree ona buat hotu nebee Nia halo iha festa iha Jerusalém. Tanba sira mos baa festa nee.

Jesus Kura Ema Nia Oan Mane

46Entaun Jesus mai fali too Kaná iha Galileia, iha fatin nebee Nia halo bee nakfilak ba tua uvas. No iha Kafarnaum iha ema boot ida nebee nia oan mane moras.

47Bainhira ema boot nee rona katak Jesus mai ona hosi Judeia too Galileia, nia baa hasoru Jesus. Nia husu Jesus atu tuun mai, no kura ninia oan mane. Tanba oan nee besik atu mate. 48Jesus dehan ba nia, “Se karik imi la haree sinál no milagre sira, imi sei la fiar.” 49Ema boot nee dehan ba Jesus, “Mestri, tuun mai molok hau nia oan mate.” 50Jesus dehan ba nia, “Baa deit, o nia oan sei moris.” No ema boot nee fiar liafuan nebee Jesus koalia ba nia, no nia baa. 51No bainhira nia tuun dadaun, ninia atan sira hasoru nia, no foo hatene ba nia, “O nia oan mane sei moris hela.” 52Nia husu atan sira tuku hira mak oan nee komesa diak fali. No atan sira dehan ba nia, “Horiseik, tuku ida lokraik mak ninia isin manas lakon.” 53Nunee aman hatene katak iha oras nee duni mak Jesus dehan ba nia, “O nia oan mane sei moris.” No nia fiar, hamutuk ho ninia uma kain tomak. 54Ida nee mak milagre segundu nebee Jesus halo, bainhira Nia mai hosi Judeia no tama ba Galileia.

Currently Selected:

João 4: BK

Highlight

Copy

Compare