João 3

Tenki Moris Fali

1Ema ida naran Nicodemos mai hosi ema Farizeu sira. Nia mak ukun nain ida hosi ema Judeu sira. 2Nia mai hasoru Jesus iha kalan no dehan, “Rabi, ami hatene katak Ita mak mestri ida nebee mai hosi Maromak. Tanba ema ida la bele halo milagre sira nee, se Maromak la hamutuk ho nia.” 3Jesus hataan ba nia, “Tebes, tebes, Hau dehan ba o, se ema la moris fali,#3:3 Bele mos ‘moris hosi leten’. Iha mos versíkulu 7. nia la bele haree Maromak nia reinu.” 4Nicodemos dehan ba Jesus, “Oinsaa mak ema ida bele moris fali bainhira nia katuas ona? Nia bele tama fali ba ninia inan nia oan fatin atu moris fali ka?” 5Jesus hataan, “Tebes, tebes, Hau dehan ba o, se ema ida la moris hosi bee no hosi Espíritu, nia la bele tama ba Maromak nia reinu. 6Buat nebee moris hosi isin mak isin. No buat nebee moris hosi Espíritu mak espíritu. 7Keta hakfodak katak Hau dehan ba o, ‘O tenki moris fali.’ 8Anin huu ba fatin nebee nia hakarak. O bele rona anin nia lian maibee o la hatene anin nee mai hosi nebee no atu baa nebee. Nunee mos ho ema hotu nebee moris hosi Espíritu.”

9Nicodemos hataan ba Jesus, “Oinsaa mak buat sira nee bele akontese?” 10Jesus hataan ba nia, “O mak Israel nia mestri maibee o la kompriende buat sira nee ka? 11Tebes, tebes, Hau dehan ba o katak ami koalia kona ba buat nebee ami hatene, no foo testemunha kona ba buat nebee ami haree ona, maibee imi la simu ami nia testemunha. 12Se Hau koalia ho o kona ba buat mundu nian no o la fiar, oinsaa mak o bele fiar bainhira Hau koalia kona ba buat lalehan nian? 13La iha ema ida nebee sae tiha ona ba lalehan, só Nia nebee tuun mai hosi lalehan, nee mak Ema Nia Oan.#3:13 Manuskritu balu aumenta, ‘nebee iha lalehan’. 14Hanesan Moisés hiit sae samea iha rai fuik maran, nunee mos ema sei hiit sae Ema Nia Oan,#3:14 Haree istória kona ba Moisés hiit sae samea iha Númeru 21:9. Jesus koalia kona ba oinsaa nia mate iha krus. Haree João 8:28 no 12:32-33. 15atu see-see deit nebee fiar ba Nia sei hetan moris rohan laek.”

Maromak Hadomi Mundu

16“Tanba Maromak hadomi tebes mundu, too Nia foo Ninia Oan Mane mesak, atu ema hotu nebee fiar ba Nia sei la lakon, maibee sei hetan moris rohan laek. 17Tanba Maromak haruka Ninia Oan Mane mai iha mundu, laos atu foo sala ba mundu, maibee atu mundu bele hetan salvasaun liu hosi Nia. 18Ema nebee fiar ba Nia la hetan kastigu. Maibee ema nebee la fiar ba Nia hetan ona kastigu, tanba ema nee la fiar ba Maromak nia Oan mesak nia naran. 19Kastigu mai tanba nee: tanba naroman mai ona iha mundu, maibee ema hadomi nakukun liu fali naroman, tanba sira nia hahalok mak aat. 20Tanba ema hotu nebee halo aat mak odi naroman. No sira la mai iha naroman, atu ema la haree sira nia hahalok. 21Maibee nia nebee halo buat nebee loos sei mai iha naroman, atu ema bele haree katak nia halao ninia hahalok iha Maromak.”

Jesus Boot Liu João

22Nee hotu tiha, Jesus no Ninia eskolante sira tama ba rai Judeia. Nia hela iha nebaa ho sira no foo batizmu. 23João mos foo batizmu iha Enon, besik Salim, tanba iha nebaa iha bee barak. No ema mai no hetan batizmu. 24Tanba iha tempu nee João seidauk tama ba komarka laran.

25Depois João nia eskolante balu diskuti malu ho ema Judeu ida kona ba serimonia hamoos aan. 26No sira mai ba João, no dehan ba nia, “Rabi, Nia nebee hamutuk ho ita boot iha Jordaun sorin ba, nebee ita boot foo sasin kona ba Nia, tebes Nia mos foo batizmu, no ema hotu baa hasoru Nia.” 27João hataan, “Ema ida la bele simu buat ida, só deit buat nebee Maromak foo ba nia hosi lalehan. 28Imi rasik bele foo sasin katak hau dehan, ‘Hau laos Kristu, maibee Maromak haruka hau mai uluk Nia.’ 29Noivu mak simu noiva. Noivu nia belun, nebee hamriik atu rona nia, haksolok tebes bainhira nia rona noivu nia lian. Hau nia haksolok nee kompletu ona. 30Nia tenki sai boot liu, maibee hau tenki sai kiik liu.

31Nia nebee mai hosi leten mak aas liu hotu. Nia nebee mai hosi mundu mak mundu nian, no koalia hanesan ema hosi mundu. Nia nebee mai hosi lalehan mak aas liu hotu. 32Nia foo testemunha kona ba buat nebee Nia haree no rona, maibee ema la simu Ninia testemunha. 33Ema nebee simu Ninia testemunha deklara#3:33 Lian Gregu dehan ‘tau karimbu ba’, katak nia dehan nee loos duni. katak Maromak mak loos. 34Tanba Nia nebee Maromak haruka nee koalia Maromak nia liafuan, tanba Maromak foo Espíritu makaas tebes#3:34 Lian Gregu dehan Maromak foo Espíritu too la sukat. ba Nia. 35Aman hadomi Oan Mane, no foo ona buat hotu ba Ninia liman. 36Ema nebee fiar ba Oan Mane hetan moris rohan laek. No ema nebee la halo tuir Oan Mane sei la haree moris; maibee Maromak nia laran hirus hela ho nia.”

Currently Selected:

João 3: BK

Highlight

Copy

Compare