João 2
2
Kazamentu Iha Kaná
1Iha loron terseiru, iha festa kazamentu ida iha Kaná, nebee iha Galileia. No Jesus nia inan mos iha nebaa. 2Ema konvida mos Jesus ho Ninia eskolante sira ba festa kazamentu nee. 3Bainhira sira nia tua uvas la too, Jesus nia inan dehan ba Nia, “Sira nia tua uvas hotu ona.” 4Jesus dehan ba nia, “Feto, tanba saa mak involve Hau? Hau nia tempu seidauk too.” 5Ninia inan dehan ba atan sira, “Halo tuir buat hotu nebee Nia dehan ba imi.”
6Iha nebaa iha sanan boot neen nebee halo hosi fatuk. Ema Judeu sira baibain uza sanan boot nee hodi hamoos aan tuir sira nia kostumi. Sanan boot ida-idak bele simu bee litru ualu-nulu too atus ida rua-nulu. 7Jesus dehan ba sira, “Enxe nakonu bee ba sanan boot sira nee.” No sira enxe nakonu sanan boot sira nee too ibun. 8No Nia dehan ba sira, “Kuru ba, no lori ba festa nain.” No sira lori ba. 9Bainhira festa nain koko ona bee nebee nakfilak ona ba tua uvas, nia bolu noivu. Nia la hatene tua uvas nee mai hosi nebee, maibee atan sira nebee kuru bee hatene. 10Festa nain dehan ba noivu, “Ema hotu foo uluk tua uvas diak. No bainhira ema lanu ona mak foin foo tua uvas nebee laduun diak. Maibee o rai hela tua uvas diak too agora.” 11Jesus halo Ninia milagre primeiru nee iha Kaná iha Galileia. Ho ida nee Nia hatudu sai Ninia glória. No Ninia eskolante sira fiar ba Nia.
12Tuir mai Nia tuun ba Kafarnaum ho Ninia inan, ninia alin sira no Ninia eskolante sira. No sira hela iha nebaa too loron balu deit.
Jesus Hamoos Templu
13Ema Judeu sira nia Festa Páskua besik ona, no Jesus sae ba Jerusalém. 14#2:14-16 Haree Mateus 21:12-13, Marcos 11:15-17, Lucas 19:45-46.Iha Templu laran nia hetan sira nebee faan karau, bibi no manu pombu, no ema sira nebee troka osan mos tuur iha nebaa. 15Depois Nia halo sikoti hosi tali, no Nia duni sai sira hotu hosi Templu, hamutuk ho bibi no karau sira. Nia fakar sai osan hosi ema nebee troka osan no Nia baku fila sira nia meza. 16Nia dehan ba sira nebee faan manu pombu, “Lori sai tiha buat sira nee! Keta halo Hau nia Aman nia uma sai fali uma negósiu nian!” 17No Ninia eskolante sira hanoin hetan liafuan nebee hakerek nanis ona, “Laran manas ba O nia uma haan mohu hau.”#2:17 Haree Salmu 69:9.
18Ema Judeu sira dehan ba Nia, “Sinál saida mak O sei hatudu mai ami, hodi O bele halo buat sira nee?” 19Jesus hataan ba sira dehan, “Halakon Templu nee no Hau sei harii fali iha loron tolu nia laran.” 20Ema Judeu sira dehan, “Templu nee haan tinan haat-nulu resin neen hodi harii. No O sei harii fali iha loron tolu nia laran ka?” 21Maibee Jesus koalia kona ba templu nebee Ninia isin lolon rasik. 22Bainhira Nia moris hias ona hosi mate, Ninia eskolante sira hanoin hetan katak Nia dehan tiha ona liafuan nee. No sira fiar eskritura, no liafuan nebee Jesus koalia tiha ona.
Jesus Hatene Ema Nia Hanoin
23Bainhira Jesus iha Jerusalém iha Festa Páskua nian, ema barak tau fiar iha Ninia naran, tanba sira haree milagre sira nebee Nia halo. 24Maibee Jesus la fiar sira, tanba Nia konhese ema hotu. 25No Nia la presiza ema foo hatene kona ba sira nia hanoin. Tanba Nia hatene saida mak iha ema nia fuan laran.
Currently Selected:
João 2: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
