João 1

Liafuan Sai Isin

1Hahuu fo-foun, Liafuan iha nanis ona. No Liafuan nee hamutuk ho Maromak. No Liafuan nee mak Maromak. 2Nia hamutuk ho Maromak hori uluk kedas. 3Maromak halo buat hotu-hotu liu hosi Nia. Maromak la halo buat ida ketak hosi Nia.#1:3 Gregu la iha liafuan ‘Maromak’, hanesan mos iha versíkulu 10 no 17. 4Iha Nia mak moris. No moris nee mak naroman ba ema. 5Naroman nee nabilan iha nakukun. No nakukun la bele halakon naroman nee.

6Iha mane ida nebee Maromak haruka, ninia naran João. 7Nia mai nudar sasin ida, atu foo sasin kona ba naroman nee, hodi nunee ema hotu bele fiar liu hosi nia. 8Nia laos naroman nee, maibee nia mai atu foo sasin kona ba naroman nee.

9Naroman lo-loos nee, nebee foo naroman ba ema hotu, atu tama mai iha mundu. 10Nia iha mundu ona, no Maromak halo mundu liu hosi Nia, maibee mundu la konhese Nia. 11Nia mai ba buat nebee Ninian, maibee Ninia povu rasik la simu Nia. 12Maibee ema hotu nebee simu Nia, nebee fiar ba Ninia naran, Nia foo kbiit atu sai Maromak nia oan sira. 13Sira moris mai laos hosi raan, ka hosi isin nia hakarak, ka hosi ema nia hakarak, maibee hosi Maromak.

14Liafuan nee sai ema ida,#1:14 Gregu dehan ‘Liafuan nee sai isin.’ no Nia hela iha ita nia leet. Ita haree tiha ona Ninia glória, glória nudar Aman Nia Oan Mane Mesak, nakonu ho grasa no lia loos. 15João foo sasin kona ba Nia, no hakilar dehan, “Nia mak ida nebee hau dehan ona, ‘Nia nebee mai tuir hau mak uluk hau, tanba Nia iha tiha ona uluk liu hau.’” 16Hosi Ninia laran nakonu, ita hotu simu ona, no grasa tu-tuir grasa. 17Tanba Maromak foo ona lei liu hosi Moisés, maibee grasa no lia loos mai liu hosi Jesus Kristu. 18La iha ema ida nebee haree ona Maromak, só Oan Mane Mesak deit, nebee iha Maromak nia sorin,#1:18 Gregu dehan ‘iha Maromak nia hirus matan.’ Haree Lucas 16:22 no nota. Nia mak foo sai ona kona ba Maromak.

João Nia Testemunha

19João foo sai testemunha ida nee, bainhira ema Judeu sira haruka saserdote no ema Levi sira hosi Jerusalém hodi husu nia, “O nee see?” 20Nia foo sai, no nia la nega; maibee nia foo sai, “Hau laos Kristu.” 21No sira husu nia, “Entaun nusaa? O mak Elias ka?” No nia dehan, “Hau laos.” “O mak Profeta ka?” No nia hataan, “Lae.”#1:21 Ema Judeu sira hein ema atu salva sira: Kristu (Mesias, Salmu 2), Elias (Malakias 4:5) ka Profeta (Deuteronómiu 18:15). 22Entaun sira dehan ba nia, “O nee see? Ami presiza foo resposta ba sira nebee haruka ami. O dehan saa kona ba o nia aan?” 23Nia dehan, “Hau mak lian hosi ema ida nebee hakilar iha rai fuik laran, ‘Halo loos Nai nia dalan,’ hanesan profeta Isaias dehan ona.#1:23 Haree Isaias 40:3.

24(Ema Farizeu sira mak haruka ema sira nee.) 25No sira husu nia, “Tanba saa mak o foo batizmu, see o laos Kristu, ka Elias, ka Profeta?” 26João hataan ba sira, “Hau foo batizmu ho bee. Maibee iha ida nebee hamriik iha imi nia leet nebee imi la hatene. 27Nia mak ida nebee tuir hau. Maibee atu kore Ninia sandálias talin mos, hau la merese.” 28Buat sira nee akontese iha Betánia iha Jordaun sorin ba, iha fatin nebee João foo batizmu.

Maromak Nia Bibi Oan

29Loron tuir mai, João haree Jesus mai hakbesik ba nia, no nia dehan, “Haree ba, Maromak nia Bibi Oan nebee kasu mundu nia sala!#1:29 Liu hosi oho bibi nudar sakrifísiu mak ita hetan perdaun ba sala. Jénesis 22:8, Exodu 12:1-13, Levítiku 5:17-18, Isaias 53:7. 30Nia mak ida nebee hau dehan tiha ona, ‘Mane ida nebee tuir hau mak uluk hau, tanba Nia mak iha ona uluk liu hau.’ 31Hau la hatene Nia. Maibee hau mai no foo batizmu ho bee tanba razaun nee, hodi hatudu Nia ba Israel.” 32No João foo testemunha no dehan, “Hau haree Espíritu tuun hosi lalehan hanesan manu pombu ida, no Espíritu nee hela iha Nia. 33Hau la hatene Nia. Maibee Nia nebee haruka hau atu foo batizmu ho bee hatete mai hau dehan, ‘Nia nebee o sei haree Espíritu tuun ba, no hela iha Nia, mak ida nebee foo batizmu ho Espíritu Santu.’ 34Hau haree tiha ona, no foo sasin katak Nia mak Maromak nia Oan.”

Jesus Bolu Eskolante Primeiru

35Loron tuir mai, João hamriik ho ninia eskolante nain rua; 36Nia haree Jesus lao dadaun, no nia dehan, “Haree ba, Maromak nia Bibi Oan!” 37Eskolante rua nee rona nia koalia nunee no sira tuir Jesus. 38Jesus fila oin no haree sira lao tuir Nia, no Nia dehan ba sira, “Imi buka saida?” Sira dehan ba Nia, “Rabi” (nee katak Mestri), “O hela iha nebee?” 39Nia dehan ba sira, “Mai no imi sei haree.” Sira baa no haree fatin nebee Nia hela. No iha loron nee sira hela ho Nia, tanba tempu nee maizoumenus tuku haat lokraik. 40#1:40-42 Haree Mateus 4:18-22, Marcos 1:16-20, Lucas 5:2-11.Ema ida hosi sira nain rua nebee rona tiha João nia liafuan no tuir Jesus mak André, nebee Simão Pedro nia alin rasik. 41Nia baa hetan uluk ninia maun Simão, no dehan ba nia, “Ami hetan ona Mesias” (nee katak Kristu). 42No nia lori Simão ba Jesus. Bainhira Jesus haree Simão, Nia dehan, “O mak Simão, João nia oan mane. Ema sei bolu o Kefas” (nee katak Pedro).#1:42 Kefas mak ‘fatuk’ iha lian Aramaiku, no Pedro mak ‘fatuk’ iha lian Gregu.

Jesus Bolu Filipe No Natanael

43Loron tuir mai, Jesus desidi atu baa Galileia. Nia hetan Filipe, no dehan ba nia, “Tuir Hau.” 44Filipe mak ema hosi Betsaida, nebee André no Pedro nia sidade. 45Filipe hetan Natanael, no dehan ba nia, “Ami hetan ona Nia nebee Lei hosi Moisés no profeta sira hakerek nanis ona. Nia mak Jesus hosi Nazaré, José nia oan mane.” 46No Natanael dehan ba nia, “Buat diak ida bele mai hosi Nazaré ka?” Filipe dehan ba nia, “Mai no haree.” 47Jesus haree Natanael mai dadaun, no dehan kona ba nia, “Tebes, ema Israel duni, nebee la iha lia bosok iha nia laran!” 48Natanael dehan ba Jesus, “Oinsaa O konhese hau?” Jesus hataan ba nia, “Molok Filipe bolu o, Hau haree ona o bainhira o sei iha ai figeira huun nia okos.” 49Natanael hataan no dehan ba Nia, “Rabi, O mak Maromak Nia Oan! O mak Liurai hosi Israel!” 50Jesus hataan ba nia, “O fiar tanba Hau dehan ba o katak Hau haree ona o iha ai figeira huun nia okos ka? O sei haree buat sira nebee boot liu ida nee.” 51No Jesus dehan ba nia, “Tebes, tebes, Hau dehan ba imi, tuir mai imi sei haree lalehan nakloke, no Maromak nia anju sira sei tuun-sae ba Ema Nia Oan.”

Currently Selected:

João 1: BK

Highlight

Copy

Compare