Lucas 24

Jesus Moris Hias

1 #24:1-12 Haree Mateus 28:1-8, Marcos 16:1-8, João 20:1. Iha loron primeiru ba semana nee, iha dadeer-saan nakukun, feto sira baa rate. Sira lori ai morin nebee sira prepara ona. 2No sira haree katak fatuk duir sai tiha ona hosi rate. 3Sira tama maibee la hetan Nai Jesus nia mate isin. 4Bainhira sira duvida hela kona ba ida nee, tebes, ema nain rua hamriik ho ropa nabilan iha sira nia sorin. 5Feto sira nee tauk, no hakneak ho oin ba rai. Nain rua nee dehan ba sira, “Tanba saa mak imi buka ida nebee moris iha mate sira nia leet? 6Nia la iha nee, maibee Nia moris hias ona. Hanoin hetan oinsaa Nia koalia ho imi bainhira Nia sei iha Galileia. 7Nia dehan, ‘Ema sei entrega Ema Nia Oan ba sala nain sira nia liman. Sira sei prega Nia ba krús, no iha loron terseiru Nia sei moris hias.’” 8No sira hanoin hetan Jesus nia liafuan. 9Sira fila fali hosi rate, no foo hatene buat hotu nee ba sira nain sanulu resin ida, no mos ba sira seluk hotu. 10Feto sira nebee konta buat sira nee ba apostolu sira mak Maria Madalena, Joana, Maria nebee Tiago nia inan, no feto sira seluk nebee hamutuk ho sira. 11Maibee ema hanoin feto sira nee nia liafuan mak istória naran deit, no sira la fiar. 12Maibee Pedro hamriik no halai ba rate. Nia hakruuk no haree deit ropa linhu. Nia sai fali no hanoin iha laran kona ba buat nebee akontese.

Iha Dalan Ba Emaus

13Iha loron nee kedas, nain rua hosi sira lao ba aldeia ida naran Emaus. Aldeia nee dook maizoumenus kilometru sanulu resin ida#24:13 Lian Gregu dehan ‘stadia 60.’ hosi Jerusalém. 14No sira koalia hamutuk kona ba buat hotu nebee akontese ona. 15Tuir mai, bainhira sira koalia no hanoin hela, Jesus rasik hakbesik no lao hamutuk ho sira. 16Maibee sira nia matan la hatene Nia. 17Nia dehan ba sira, “Imi koalia ba malu kona ba saida bainhira imi lao dadaun nee?” No sira nain rua para tiha ho oin tristi. 18Ema ida hosi sira, naran Cleopas, hataan no dehan ba Nia, “Ita mak estranjeiru mesak deit iha Jerusalém nebee la hatene buat sira nebee foin akontese iha nebaa iha tempu nee?” 19Nia dehan ba sira, “Kona ba saida?” No sira dehan ba Nia, “Kona ba Jesus hosi Nazaré. Nia mak profeta ida nebee hatudu kbiit ho liafuan no hahalok iha Maromak nia oin no iha povu hotu nia oin. 20No oinsaa xefi saserdote sira no ita nia ukun nain sira entrega Nia atu simu kastigu mate. No ema prega ona Nia ba krús. 21Maibee ami hanoin katak Nia mak ema nebee atu hola fali Israel.#24:21 Atu salva Israel hosi terus. Haree kona ba ‘hola fali’ iha Rut 4:14 no nota. Sin, no liu tan nee, ohin mak loron terseiru hosi tempu nebee buat hirak nee akontese. 22No mos, feto balu hosi ami nia grupu halo ami hakfodak. Tanba ohin dadeer sedu, sira baa rate 23maibee sira la hetan Ninia mate isin. Sira mai fali no dehan katak sira haree vizaun ida ho anju sira, nebee dehan katak Nia moris hias ona. 24No ema balu hosi ami baa rate no hetan buat sira nee tuir buat nebee feto sira hatete. Maibee sira la haree Nia.” 25Depois Nia dehan ba sira, “Oh ema beik sira! Imi iha fuan laran nebee neineik atu fiar buat hotu nebee profeta sira koalia nanis ona! 26Laos Kristu tenki simu terus sira nee, no tama ba Ninia glória?” 27No hahuu hosi Moisés no profeta sira hotu, Nia esplika ba sira buat hotu nebee hakerek iha Eskritura kona ba Nia.#24:27 Testamentu Tuan foo sai kona ba Kristu (Mesias) dala barak. Ezemplu balu iha Jénesis 3:15; Deuteronómiu 18:15; Salmu 22:7-8; Isaias 7:14, 9:1-7,52:13-53:12, no Zakarias 12:10, 13:1.

28Bainhira sira besik ona ba aldeia nebee sira atu tama, Nia lao hanesan Nia atu baa fatin seluk. 29Maibee sira obriga Nia, no dehan, “Mai hela ho ami. Tanba besik kalan ona, no loron matan besik atu monu ona.” Entaun Nia tama hodi hela ho sira. 30Bainhira Nia tuur haan hamutuk ho sira, Nia foti paun no foo bensa. No Nia silu paun no foo ba sira. 31Depois sira nia matan nakloke, no sira konhese Nia. No Nia lakon kedas hosi sira nia oin. 32Sira dehan ba malu, “Laos ita senti ita nia fuan laran lakan bainhira Nia koalia hela ho ita iha dalan no Nia loke Eskritura sira ba ita?” 33Sira hamriik iha oras nee kedas no fila fali ba Jerusalém. Sira hetan apostolu nain sanulu resin ida halibur ho ema nebee hamutuk ho sira, 34nebee dehan, “Nai moris hias ona, no Nia mosu ba Simão!” 35Depois ema nain rua nee konta kona ba buat sira nebee akontese iha dalan, no oinsaa sira konhese Nia bainhira Nia silu paun.

Jesus Mosu Ba Eskolante Sira

36Bainhira sira koalia hela nunee, Jesus rasik hamriik iha sira nia leet. No Nia dehan ba sira, “Dame hela ho imi!” 37Maibee sira tauk tebes no hakfodak tanba sira hanoin katak sira haree mate klamar#24:37 Lian Gregu dehan pneuma, nebee ‘espíritu’, iha mos versíkulu 39. ida. 38Jesus dehan ba sira, “Tanba saa mak imi laran taridu? No tanba saa mak imi laran ru-rua? 39Haree took Hau nia liman no Hau nia ain. Ida nee mak Hau rasik. Kaer Hau no haree ba. Mate klamar la iha isin no ruin hanesan imi haree katak Hau iha.” 40No bainhira Nia koalia tiha nunee, Nia hatudu Ninia liman no ain ba sira. 41Sira seidauk fiar tanba sira haksolok demais no admira. Nunee Nia dehan ba sira, “Imi iha buat ruma iha nee atu haan ka?” 42No sira foo ikan tunu pedasuk ida ba Nia.#24:42 Manuskritu balu aumenta ‘no bani been isin uitoan’. 43Nia foti ikan nee no haan iha sira nia oin.

44Tuir mai, Nia dehan ba sira, “Hau koalia ona liafuan nee bainhira Hau sei hamutuk ho imi. Hau dehan katak buat hotu-hotu nebee hakerek nanis ona kona ba Hau iha Lei hosi Moisés, iha profeta sira, no iha Salmu sira, tenki kumpri duni.#24:44 Haree versíkulu 27 no nota. 45Depois Nia loke sira nia neon hodi sira bele kompriende Eskritura. 46Nia dehan ba sira, “Ida nee hakerek nanis ona, katak Kristu tenki hetan terus no iha loron terseiru Nia sei moris hias hosi mate, 47no katak ema bele arepende no hetan perdaun ba sala hodi Ninia naran. No ema sei haklaken liafuan nee iha nasaun hotu, hahuu hosi Jerusalém. 48Imi mak sasin kona ba buat sira nee. 49Tebes, Hau sei haruka promesa ida ba imi hosi Hau nia Aman. Maibee hein iha sidade nee, too imi simu kbiit hosi leten.”

Jesus Sae Ba Lalehan

50Jesus lori sira sai ba Betánia. No Nia foti Ninia liman hodi foo bensaun ba sira. 51Bainhira Nia foo dadaun bensaun ba sira, Nia husik sira no sae ba lalehan. 52Sira adora Nia, no fila fali ba Jerusalém ho haksolok boot. 53No sira hela nafatin iha Templu hodi hahii Maromak.

Currently Selected:

Lucas 24: BK

Highlight

Copy

Compare