Lucas 23

Jesus Iha Pilatos Nia Oin

1Depois ema lubun tomak nee hamriik, no lori Jesus ba Pilatos. 2#23:2-3 Haree Mateus 27:11-14, Marcos 15:2-5, João 18:29-37.Sira komesa akuza Nia dehan, “Ami hetan Mane nee lohi ami nia nasaun. Nia bandu ema atu la selu impostu ba César, no Nia dehan katak Nia mak Kristu, nebee liurai ida.” 3Pilatos husu Nia dehan, “O mak ema Judeu sira nia liurai ka?” No Nia hataan dehan, “Ita mak hatete nunee.” 4Depois Pilatos dehan ba xefi saserdote sira no ema lubun nee, “Hau la hetan sala ida iha Mane nee.” 5Maibee sira ulun toos nafatin, no dehan, “Nia soran povu nee, no hanorin iha rai Judeu hotu, hahuu hosi Galileia too iha fatin nee.”

Jesus Hasoru Herodes

6Bainhira Pilatos rona ida nee, nia husu Mane nee mak ema Galileia ka lae. 7Bainhira Pilatos hatene katak Jesus mai hosi distritu nebee Herodes mak ukun, nia haruka Jesus ba Herodes. Tanba Herodes mos iha Jerusalém iha tempu nebaa. 8No bainhira Herodes haree Jesus, nia kontenti loos. Kleur ona nia hakarak haree Jesus. Tanba nia rona tiha buat barak kona ba Jesus, no nia hein katak nia bele haree Jesus halo milagre ruma. 9No Herodes husu pergunta barak ba Jesus, maibee Jesus la hataan buat ida. 10Xefi saserdote sira no eskriba sira hamriik no akuza makaas Jesus. 11No Herodes ho ninia soldadu sira goza Jesus no hamoe Nia. Sira foo hatais Nia ho ropa furak no haruka Nia fila fali ba Pilatos. 12Iha loron nebaa, Pilatos no Herodes sai kolega. Tanba uluk sira odi malu. 13Pilatos bolu xefi saserdote sira, ukun nain sira no povu nee atu mai halibur hamutuk. 14Nia dehan ba sira, “Imi lori mai hau Mane nee nudar ida nebee lohi povu. No tebes, hau husu pergunta ba Nia iha imi nia oin. Imi akuza Nia maibee hau la hetan sala ida iha Mane nee tuir buat hotu nebee imi dehan. 15No Herodes mos la hetan sala ida, tanba Herodes haruka Nia mai fali. Haree ba, Nia la halo buat ida nebee halo Nia merese atu hetan kastigu mate. 16Nunee hau sei baku Nia, no husik Nia ba.”#23:16 Surat balu aumenta v. 17 (ka tuir v.19), ‘Tanba Pilatos presiza husik ema ida ba sira iha tempu festa nian.’

Pilatos Foo Kastigu Mate Ba Jesus

18Maibee sira hotu hakilar hamutuk, “Halakon Mane nee, no husik Barabás ba ami.” 19Barabás mak ema ida nebee tama komarka tanba nia hahuu revolusaun ida iha sidade no nia oho ema. 20Dala ida tan Pilatos koalia ba sira tanba nia hakarak husik Jesus. 21Maibee sira hakilar nafatin, “Prega Nia ba krús! Prega Nia ba krús!” 22Ba dala tolu Pilatos dehan ba sira, “Tanba saa? Nia halo sala saida? Hau la hetan razaun ida atu foo kastigu mate ba Nia. Nunee hau sei baku Nia, no husik Nia ba.” 23Maibee sira hakilar makaas, no obriga nia atu prega Jesus ba krús. No sira nia lian manaan. 24Entaun Pilatos desidi atu halo tuir sira nia hakarak. 25Nia husik ema ida nebee tama komarka tanba halo revolusaun no oho ema. Maibee nia entrega Jesus ba sira nia hakarak.

Prega Ba Krús

26Bainhira sira lori sai Jesus, sira kaer Simão, ema Sirene, nebee tama mai hosi foho. Sira tau krús ba nia hodi nia bele lori krús nee tuir Jesus. 27Povu lubun boot lao tuir Nia, inklui feto sira nebee tanis no halerik tanba Nia. 28Maibee Jesus fila oin ba sira no dehan, “Jerusalém nia oan feto sira, keta tanis tanba Hau, maibee tanis ba imi nia aan rasik, no ba imi nia oan sira. 29Tanba tebes, tempu sei too mai, bainhira sira sei dehan, ‘Haksolok ba feto sira nebee oan la iha, no ba oan fatin nebee nunka kous, no ba susun nebee nunka foo susu! 30Iha tempu nebaa, sira sei hahuu dehan ba foho, ‘Monu hanehan tiha ami,’ no ba foho oan, ‘Taka tiha ami.’#23:30 Hosi Hosea 10:8. 31Tanba se sira halo buat sira nee bainhira ai huun sei matak hela, entaun sira sei halo saida bainhira ai huun nee sai maran?”

32Sira lori ema aat nain rua tan atu foo kastigu mate hamutuk ho Jesus. 33#23:33-43 Haree Mateus 27:33-44, Marcos 15:22-32, João 19:17-24.Depois sira mai too fatin ida naran Ulun Ruin. Iha nebaa, sira prega Jesus ba krús. Sira prega mos ema aat nain rua nee no tau ida iha Ninia sorin loos no ida seluk iha Ninia sorin karuk. 34Depois Jesus dehan, “Aman, foo perdaun ba sira, tanba sira la hatene buat nebee sira halo.”#23:34 Manuskritu balu la iha fraze ida nee hosi Jesus. No sira dada rifa atu fahe Ninia ropa.#23:34 Fahe ropa nee kumpri liafuan hosi Salmu 22:18. 35No povu nee hamriik hela hodi haree. Maibee ukun nain sira tarata Nia, no dehan, “Nia salva ona ema seluk, nunee husik Nia salva Ninia aan rasik; se Nia mak Kristu, nebee Maromak hili.” 36Soldadu sira mos goza Nia. Sira hakbesik ba Nia, no koko foo tua siin ba Nia. 37No sira dehan, “Se O mak ema Judeu sira nia liurai, salva aan ba!” 38No sira hakerek avizu iha Nia ulun leten,#23:38 Manuskritu balu aumenta ‘ho lian Gregu, Latinu no Ebreu’. “Nee mak ema Judeu sira nia liurai.”

39Ema aat ida nebee tara hela koalia aat ba Jesus. Nia dehan, “Se O mak Kristu, salva aan ba no mos salva ami!” 40Maibee ida seluk nee siak nia dehan, “O la hamtauk Maromak ka? Tanba o hetan kastigu hanesan. 41Ita hetan kastigu tuir justisa, tanba sira selu ita tuir ita nia hahalok. Maibee Mane ida nee la halo aat ida.” 42No nia dehan ba Jesus, “Nai, hanoin hau bainhira O tama ba O nia reinu.” 43No Jesus dehan ba nia, “Tebes Hau dehan ba o, ohin loron kedas o sei hamutuk ho Hau iha Paraizu.”#23:43 Paraizu mak fatin furak no hakmatek nebee ema dehan lalehan. 2 Korinto 12:4, Apokalipse 2:7.

Jesus Mate

44 #23:44-49 Haree Mateus 27:45-56, Marcos 15:33-41, João 19:30. Tuir mai, maizoumenus iha meiudia, nakukun taka rai tomak too tuku tolu lokraik. 45Loro matan sai nakukun, no veo#23:45 Veo mak kortina iha Templu laran nebee haketak Fatin Santu Liu hosi Fatin Santu. Haree Exodu 26:33 no dezenhu. iha Templu naklees fahe ba rua iha klaran. 46Depois Jesus hakilar ho lian makaas, no Nia dehan, “Aman, Hau entrega Hau nia espíritu ba O nia liman!” Bainhira Nia koalia tiha nunee, Nia iis kotu. 47Bainhira komandante haree buat nebee akontese, nia hahii Maromak, no dehan, “Tebes duni, Mane ida nee mak ema loos.” 48No povu hotu nebee halibur hamutuk hodi hateke ba, bainhira sira haree tiha buat sira nee, sira tuku hirus matan no fila fali ba uma. 49Ema hotu nebee konhese Jesus no feto sira nebee tuir Nia hosi Galileia, hamriik dook no haree buat sira nee.

Sira Hakoi Jesus

50 #23:50-56 Haree Mateus 27:57-61, Marcos 15:42-47, João 19:38-42. Tebes, iha ema ida naran José, hosi sidade Arimatea iha rai Judeia. Nia mak membru ida hosi tribunál. Nia ema diak no loos. 51Ema ida nee la konkorda ho desizaun no hahalok hosi sira seluk. No nia hein Maromak nia reinu. 52Nia baa hasoru Pilatos, no husu atu hetan Jesus nia mate isin. 53Tuir mai, nia hatuun mate isin, no falun tiha ho hena linhu. Depois nia tau mate isin iha rate nebee ema kee tiha hosi fatuk. Ema seidauk tau mate isin seluk iha rate nee. 54Loron nee mak loron preparasaun, no loron Sabdu besik atu hahuu ona. 55Feto sira nebee mai ho Jesus hosi Galileia mos tuir. No feto sira haree rate nee, no oinsaa ema tau Jesus nia mate isin. 56No sira fila fali hodi prepara ai morin no mina morin oi-oin. Iha loron Sabdu sira deskansa tuir ukun fuan.

Currently Selected:

Lucas 23: BK

Highlight

Copy

Compare