Lucas 22

Planu Atu Oho Jesus

1Festa Paun Fermentu Laek besik ona, nebee sira bolu Páskua. 2No xefi saserdote sira no eskriba sira buka dalan atu oho Jesus, tanba sira tauk povu.

3 #22:3-6 Haree Mateus 26:14-16, Marcos 14:10-11. Depois Satanás tama ba Judas, naran Iskariotes, nebee ema ida hosi sira nain sanulu resin rua. 4No nia sai hodi baa koalia ho xefi saserdote sira no komandante sira kona ba oinsaa nia bele faan Jesus ba sira. 5Sira kontenti, no promete atu foo osan ba nia. 6Nia konkorda no buka oportunidade atu faan Jesus ba sira bainhira ema lubun boot la iha.

Sira Prepara Páskua

7 #22:7-13 Haree Mateus 26:17-19, Marcos 14:12-16. Loron Paun Fermentu Laek nian too ona, bainhira sira tenki oho bibi oan Páskua nian. 8Entaun Jesus haruka Pedro no João, no dehan, “Baa prepara Páskua ba ita, hodi ita bele haan.” 9No sira dehan ba Nia, “O hakarak ami prepara iha nebee?” 10Nia dehan ba sira, “Tebes, bainhira imi tama tiha ba sidade, mane ida nebee lori sanan rai bee nian sei hasoru imi. Imi lao tuir nia ba uma ida nebee nia tama. 11No imi sei dehan uma nain, ‘Mestri dehan, “Fatin iha nebee, mak Hau bele haan Páskua ho Hau nia eskolante sira?”’ 12Nia sei hatudu ba imi kuartu boot iha andar leten nebee iha sasaan ona. Imi bele prepara iha nebaa.” 13No sira baa, no hetan buat sira nee tuir saida mak Jesus hatete ona ba sira. No sira prepara Páskua.

Sira Haan Páskua

14Bainhira oras too ona, Jesus tuur iha meza hamutuk ho apostolu sira. 15Nia dehan ba sira, “Hau hakarak tebe-tebes atu haan Páskua nee ho imi molok Hau hetan terus. 16Tanba Hau hatete ba imi, Hau sei la haan tan ida nee too ida nee kumpri ona iha Maromak nia reinu.” 17#22:17-20 Haree Mateus 26:26-29, Marcos 14:22-25, 1 Korinto 11:23-25.Jesus foti kopu, no Nia foo agradese, no dehan, “Simu ida nee, no fahe ba malu. 18Tanba Hau hatete ba imi, hosi agora ba oin Hau sei la hemu tan hosi uvas fuan too Maromak nia reinu mai.” 19No Nia foti paun no foo agradese. Depois Nia silu paun nee no foo ba sira. Nia dehan, “Ida nee mak Hau nia isin nebee Hau foo tanba imi. Halo ida nee hodi hanoin Hau.” 20Hanesan nee mos, bainhira sira haan tiha, Nia foti kopu, no dehan, “Ida nee mak aliansa foun iha Hau nia raan, nebee sei fakar tanba imi.#22:20 Uluk, iha tempu Moisés, Maromak halo aliansa (testamentu tuan) nebee halo metin ho raan (Ebreu 9:18, Exodu 24:7-8). Agora Jesus halo aliansa foun ho Ninia raan rasik (testamentu foun). 21#22:21-23 Mateus 26:21-24, Marcos 14:18-21, João 13:21-30.Maibee tebes, ema nia liman nebee atu faan Hau mak hamutuk hela ho Hau iha meza nee. 22Tebes, Ema Nia Oan sei baa tuir planu nebee halo tiha ona. Maibee susar ba ema ida nebee faan Nia!” 23No sira komesa husu ba malu kona ba see mak atu halo ida nee.

See Mak Boot Liu?

24 #22:24-27 Mateus 20:25-28, Marcos 10:42-45. Eskolante sira komesa haksesuk malu kona ba see mak boot liu. 25No Jesus dehan ba sira, “Liurai sira hosi ema Jentiu sira domina sira nia povu. No sira nebee halao autoridade simu naran ‘tulun nain’. 26Maibee imi la bele hanesan nee. Nia nebee boot liu iha imi nia leet tenki sai kiik liu. No nia nebee xefi tenki sai ema nebee serví. 27Tanba see mak boot liu, nia nebee tuur iha meja, ka nia nebee serví? Laos nia nebee tuur iha meja? Maibee Hau iha imi nia leet nudar ema nebee serví. 28Imi lao hamutuk ona ho Hau durante Hau nia tempu susar.

29No Hau foo reinu ida ba imi, hanesan Hau nia Aman foo ona mai Hau. 30Nunee imi bele haan hemu iha Hau nia meza iha Hau nia reinu. No imi sei tuur iha kadunan hodi tesi lia ba Israel nia suku sanulu resin rua.

Jesus Dehan Pedro Sei Nega Nia

31“Simão, Simão, tebes, Satanás hakarak hetan o hodi nia bele peneira o hanesan trigu. 32Maibee Hau halo orasaun ona kona ba o, hodi o nia fiar la bele lakon. No bainhira o fila fali, hametin o nia maluk sira.” 33Pedro dehan ba Nia, “Nai, hau prontu atu baa hamutuk ho O, too komarka no mos too mate.” 34Jesus dehan, “Hau hatete ba o, Pedro, katak ohin, molok manu aman kokoreek, o sei nega dala tolu katak o la konhese Hau.”

Tenki Kumpri Eskritura

35Jesus dehan ba sira, “Uluk, bainhira Hau haruka imi baa no imi la lori osan fatin ka pasta ka sandálias,#22:35 Jesus haruka sira halo evanjelizmu iha Lucas 10:4. imi falta buat ruma nee ka?” No sira dehan, “Lae.” 36Depois Nia dehan ba sira, “Maibee agora, nia nebee iha osan fatin no pasta, husik nia lori ba. No nia nebee la iha surik, husik nia faan ninia ropa, no sosa surik ida. 37Tanba Hau hatete ba imi, katak Eskritura nee tenki kumpri#22:37 Jesus atu halo kompletu (Gregu teleo) bainhira mate iha krús. João 19:30. iha Hau: ‘Sira sura Nia hamutuk ho sala nain sira.’#22:37 Hosi Isaias 53:12. Tanba buat nebee hakerek nanis ona kona ba Hau besik kumpri ona.” 38No sira dehan, “Nai, haree surik rua iha nee.” No Nia dehan ba sira, “Too ona.”

Jesus Halo Orasaun

39Depois Jesus sai, no hanesan baibain, Nia baa Foho Oliveira. No Ninia eskolante sira mos tuir Nia. 40#22:40-46 Haree Mateus 26:36-46, Marcos 14:32-42.Bainhira Nia too ona fatin nee, Nia dehan ba sira, “Halo orasaun atu imi la monu ba tentasaun.” 41Nia hadook aan hosi sira, maizoumenus dook hanesan ema soe fatuk ida. No Nia hakneak no halo orasaun, 42Nia dehan, “Aman, se O hakarak, hasai tiha kopu nee hosi Hau. Maski nunee, laos tuir Hau nia hakarak, maibee tuir O nia hakarak.” 43Depois anju ida hosi lalehan mosu ba Nia hodi foo forsa ba Nia. 44Nia laran susar tebe-tebes no halo orasaun makaas liu tan, too Ninia kosar sai hanesan raan nebee turuk boot ba rai.#22:43-44 Manuskritu balu la iha versíkulu 43 no 44. 45Bainhira Nia hamriik hosi halo orasaun, Nia fila ba Ninia eskolante sira, no Nia hetan sira toba dukur hela tanba sira laran tristi. 46No Nia dehan ba sira, “Tanba saa mak imi toba dukur? Hadeer ba no halo orasaun, atu imi la tama ba tentasaun.”

Judas Faan Jesus

47 #22:47-53 Haree Mateus 26:47-56, Marcos 14:43-50, João 18:3-11. Bainhira Jesus koalia hela, ema lubun boot mai. Ema ida naran Judas, nebee hosi sira nain sanulu resin rua, lao iha sira nia oin. Judas hakbesik ba Jesus atu rei Nia. 48Maibee Jesus dehan ba nia, “Judas, o sei faan Ema Nia Oan ho rei ida ka?” 49Bainhira sira nebee hamutuk ho Jesus haree buat nebee atu akontese, sira dehan ba Jesus, “Nai, ami sei ataka ho surik ka?” 50Depois ema ida hosi sira ataka saserdote boot nia atan. No nia tesi kotu atan nee nia tilun sorin loos. 51Maibee Jesus dehan, “Too ona!” No Nia kaer atan nia tilun, no kura tiha nia. 52Depois Jesus dehan ba xefi saserdote sira, komandante sira hosi Templu, no katuas sira, nebee mai hasoru Nia, “Imi mai ho surik no ai dona atu hasoru naok-teen ida ka? 53Loro-loron Hau hamutuk ho imi iha Templu, no imi la lolo liman atu kaer Hau. Maibee agora mak imi nia tempu, ho kbiit nakukun nian.”

Pedro Nega Jesus

54Depois sira kaer Nia, no lori Nia ba saserdote boot nia uma. No Pedro lao tuir hosi dook. 55#22:55-62 Haree Mateus 26:69-75, Marcos 14:66-72, João 18:16-18.Bainhira sira sunu ahi iha pátiu klaran, no tuur hamutuk, Pedro mos tuur iha sira nia leet. 56Maibee atan feto ida haree nia bainhira nia tuur hela besik ahi. Atan feto fihir nia no dehan, “Mane ida nee mos hamutuk ho Nia.” 57Maibee Pedro nega liafuan nee dehan, “Feto, hau la hatene Nia.” 58No la kleur tan, ema seluk haree nia, no dehan, “O mos ema ida hosi sira.” Maibee Pedro dehan, “Mane, laos hau.” 59Liu tiha maizoumenus oras ida, ema ida seluk konfirma dehan, “Tebes, mane nee mos hamutuk ho Nia. Tanba nia mos ema Galileia.” 60Maibee Pedro dehan, “Mane, hau la hatene saida mak o koalia nee.” No iha momentu nee kedas, bainhira nia koalia hela, manu aman kokoreek. 61No Nai fila oin no hateke ba Pedro. No Pedro hanoin hetan fali liafuan hosi Nai, no oinsaa Nia dehan ba Pedro, “Ohin, molok manu aman kokoreek, o sei nega Hau dala tolu.” 62Depois Pedro sai ba liur no tanis ho laran dodok.

Ema Goza Jesus

63 #22:63-65 Haree Mateus 26:66-68, Marcos 14:65, João 18:22-23. Ema nebee kaer Jesus goza Nia no baku Nia. 64No bainhira sira taka tiha Ninia matan ho hena, sira baku Ninia oin, no husu Nia, “Profesia ba, see mak baku O?” 65No sira koalia liafuan aat barak tan hasoru Nia.

Jesus Iha Tribunál

66Bainhira loron naroman ona, katuas sira hosi povu nee, xefi saserdote sira no eskriba sira halibur hamutuk. Sira lori Jesus ba sira nia tribunál,#22:66 Liafuan iha Gregu Sinédriu, nebee ema boot relijiaun tesi lia. no dehan, 67#22:67-71 Haree Mateus 26:67-71, Marcos 14:61-63, João 18:19-21.“O mak Kristu ka lae? Foo hatene mai ami lai.” Nia dehan ba sira, “Se Hau foo hatene ba imi, imi sei la fiar. 68No se Hau husu imi, imi sei la hataan Hau. 69Maibee hosi agora ba oin, Ema Nia Oan sei tuur iha Maromak nia kbiit nia liman loos.” 70Depois sira hotu dehan, “Entaun O mak Maromak nia Oan ka?” No Nia dehan ba sira, “Imi dehan katak Hau mak nee.” 71No sira dehan, “Tanba saa mak ita presiza tan sasin? Ita rona tiha ona hosi Ninia ibun rasik.”

Currently Selected:

Lucas 22: BK

Highlight

Copy

Compare