Levítiku 16
16
Loron Dame Nian
1 Nai koalia ba Moisés bainhira Arão nia oan mane nain rua mate tiha ona, tanba sira hakbesik iha Nai nia oin no sira mate. 2No Nai dehan ba Moisés, “Koalia ba o nia maun Arão, hodi nia la bele tama mai arbiru iha Fatin Santu nebee iha veo laran, iha Matan Dame nia oin, nebee iha Arka nia leten, hodi nia la bele mate; tanba Hau sei hatudu aan iha kalohan nebee iha Matan Dame nia leten. 3Entaun Arão bele tama iha Fatin Santu liu hosi nee: ho karau oan nebee aman hodi halo sakrifísiu sala nian no bibi malae aman hodi halo sakrifísiu tunu motuk. 4Nia sei hatais batina linhu nebee santu, no kalsa linhu nebee kona nia isin, no nia tenki hatais sintu linhu, no turbante hosi hena linhu.#16:4 Haree Exodu 28 no dezenhu nebaa kona ba saserdote nia ropa. Buat sira nee mak ropa santu. Nunee nia tenki hariis aan ho bee, depois nia sei hatais buat sira nee. 5No nia sei lori hosi komunidade Israel bibi timor oan rua hodi halo sakrifísiu sala nian no bibi malae aman hodi halo sakrifísiu tunu motuk.
6Arão sei oferese ninia karau aman nebee sakrifísiu sala nian, ba nia aan rasik, hodi taka nia sala no ba ninia uma kain. 7Depois nia sei foti bibi rua nee no aprezenta sira iha Nai nia oin, iha odamatan ba Tenda Enkontru. 8No Arão sei dada rifa ba bibi rua nee, ida ba Nai no ida hodi sai bibi nebee husik. 9Arão sei lori bibi ida nebee sai Nai nian no oferese nia nudar sakrifísiu sala nian. 10Maibee bibi ida nebee hetan hodi husik, tenki aprezenta nia moris iha Nai nia oin, hodi taka sala ho nia, no husik bibi nee hodi halai ba rai fuik.
11Arão sei lori karau aman nebee oferta sala nian nebee ba nia aan rasik no nia sei taka nia sala rasik, no ba ninia uma kain. Nia sei oho karau aman nee hodi halo sakrifísiu sala nian ba nia aan rasik. 12Nia sei foti manko ida nebee nakonu ho ahi klaak hosi ahi nebee iha altár iha Nai nia oin, no nia liman nakonu ho insensu morin, no nia sei lori buat nee tama iha veo laran. 13No nia sei tau insensu nee ba ahi iha Nai nia oin hodi kalohan hosi insensu bele taka Matan Dame nebee iha Arka Aliansa nia leten, hodi nia la mate. 14Nia sei foti raan hosi karau aman no hisik ho nia liman fuan ba iha Matan Dame iha sorin lorosae. Nia sei hisik raan dala hitu ho nia liman fuan iha Matan Dame nia oin.
15Depois nia sei oho bibi malae hodi halo sakrifísiu sala nian ba povu, no lori bibi nia raan tama ba veo laran, no halo ho raan nee hanesan nia halo ho karau aman nia raan, no hisik ba Matan Dame no iha Matan Dame nia oin. 16Nunee nia sei taka sala kona ba Fatin Santu nee tanba ema Israel sira nebee la moos, no tanba sira nia sala nebee kontra liu hosi sira nia sala hotu. No nia sei halo hanesan nee ba Tenda Enkontru nebee hela iha sira nia leet ho sira nia hahalok nebee la moos. 17La bele iha ema ida iha Tenda Enkontru nia laran bainhira Arão tama hodi taka sala iha Fatin Santu, too nia sai fali, no nia taka ona sala ba nia aan rasik, ba ninia uma kain no ba komunidade Israel tomak. 18Depois nia sei sai ba altár nebee iha Nai nia oin, no taka sala kona ba buat nee. Nia sei foti raan hosi karau aman, no raan hosi bibi timor, no tau raan nee iha altár nia dikur sira hotu. 19No nia sei hisik raan balu dala hitu ba altár, no hamoos buat nee, no halo altár nee santu hosi ema Israel sira nia hahalok nebee la moos.
20Bainhira nia taka ona sala kona ba Fatin Santu, Tenda Enkontru no altár, nia sei lori bibi ida nebee moris hela. 21Arão sei tau nia liman rua ba bibi moris nia ulun no foo sai ba bibi nee kona ba ema Israel sira nia hahalok aat hotu, no sira nia hahalok hotu nebee kontra Maromak liu hosi sira nia sala hotu, no nia sei tau buat sira nee ba bibi nia ulun, no nia sei haruka bibi nee sai liu hosi ema prontu nia liman hodi ba rai fuik. 22Bibi nee sei lori sira nia hahalok aat hotu ba iha rai nebee ema la iha, no ema nee sei husik bibi ida nee iha rai fuik.
23Arão sei tama iha Tenda Enkontru no nia sei hasai ropa linhu nebee nia hatais bainhira nia tama iha Fatin Santu, no nia sei husik ropa iha nebaa. 24Nia sei hariis ho bee iha Fatin Santu no hatais ninia ropa no sai mai. Depois nia sei oferese ninia sakrifísiu tunu motuk, no povu nia sakrifísiu tunu motuk, hodi taka nia sala rasik no taka povu nia sala. 25Bokur hosi sakrifísiu sala nian nee nia sei tunu iha altár leten. 26No ema nebee lori bibi nebee atu husik, nia sei fasi ninia ropa, hariis ho bee, depois nia bele tama akampamentu. 27No karau aman nebee sakrifísiu sala nian no bibi nebee sakrifísiu sala nian, nebee sira nia raan mak lori ona ba Fatin Santu nia laran hodi taka sala, tenki lori animál sira nee ba akampamentu liur, no sunu sira nia kulit, isin no teen iha ahi. 28No nia nebee sunu sira sei fasi ninia ropa, no hariis ho bee, depois nia bele tama akampamentu.
29Ida nee sei sai estatutu ba imi too tinan ba tinan katak iha fulan hitu, iha loron sanulu iha fulan nee, imi sei hatuun aan,#16:29 ‘hatuun’ nee bele iha sentidu katak sira sai tristi ka jejún. no keta halo servisu ida, laos ema ida hosi imi ka estranjeiru nebee lao hamutuk ho imi iha imi nia leet. 30Tanba iha loron nebaa, saserdote sei taka imi nia sala, hodi hamoos imi, nunee imi sei sai moos hosi imi nia sala hotu iha Nai nia oin. 31Loron nee sei sai loron deskansa ba imi, no imi sei hatuun aan hodi tuir estatutu nee too tinan ba tinan. 32Saserdote nebee simu unsaun no simu konsagrasaun hodi serví nudar saserdote troka ninia apaa, nia sei taka sala no hatais ropa linhu, ropa nebee santu. 33No nia sei taka sala kona ba Fatin Santu nee, no nia sei taka sala kona ba Tenda Enkontru, no ba altár, no nia sei taka saserdote sira nia sala, no ba povu hotu iha komunidade nee. 34Ida nee sei sai estatutu too tinan ba tinan ba imi, hodi taka ema Israel sira nia sala hotu, tinan ida dala ida.” No Moisés halo tuir orden nebee Nai foo ba nia nee.
Currently Selected:
Levítiku 16: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.