Levítiku 19
19
Nai Mak Santu
1 Nai koalia ba Moisés, no dehan, 2“Koalia ba ema Israel sira nia komunidade tomak no dehan ba sira, Imi tenki sai santu, tanba Hau mak Nai, imi nia Maromak, nebee santu. 3Ema ida-idak tenki foo respeitu ba ninia inan no ninia aman, no halo tuir Hau nia loron Sabdu. Hau mak Nai, imi nia Maromak. 4Keta fila ba ídulu sira no keta halo maromak sira hosi besi. Hau mak Nai, imi nia Maromak.
5Se ema ida oferese sakrifísiu dame ba Nai, nia tenki oferese buat nee tuir metodu nebee Hau sei simu. 6Tenki haan sakrifísiu nee iha loron hanesan nebee o oferese nia, no bele haan iha loron tuir mai. No buat nebee sei hela iha loron terseiru tenki sunu iha ahi. 7No sei o haan sakrifísiu nee iha loron terseiru, buat nee sei sai foer, no Hau la simu nia. 8No see deit nebee haan buat nee iha hahalok aat tanba nia hakribi buat nebee santu ba Nai. Tenki hakotu ema ida nee hosi ninia povu nia leet.
Hadomi O Nia Maluk
9Bainhira o koa ai haan hosi o nia rai, o keta koa too rai ninin, no keta foti fali buat restu#19:9 Bainhira sira koa trigu entaun sira sempre iha trigu uitoan nebee monu ba rai. Orden nee dehan keta ba fali no hili buat nee maibee husik trigu uitoan nee ba ema kiak nebee bele tuir mai no foti. Haree Rut 2. nebee monu hosi buat nebee imi koa. 10No keta foti fali buat restu hosi o nia toos uvas, no keta hili uvas fuan sira nebee monu iha o nia toos uvas, maibee o tenki husik ba ema kiak no estranjeiru. Hau mak Nai, imi nia Maromak. 11O keta naok, keta lohi, no keta bosok malu. 12O keta jura falsu ho Hau nia naran, nunee o halo foer o nia Maromak nia naran. Hau mak Nai. 13O keta hanehan o nia maluk ka naok hosi nia. Keta kaer ema nia saláriu kalan tomak too aban fali. 14Keta foo malisan ba ema tilun diuk ka tau fatuk sidi iha ema matan delek nia oin. O tenki hamtauk o nia Maromak. Hau mak Nai.
15Bainhira o tesi lia, keta foti desizaun nebee la tuir justisa. Keta halis ba ema kiak ka foo respeitu ba ema boot.#19:15 Ebreu dehan ‘keta foti sae ema kiak ka foo onra ba ema boot.’ Keta hanoin ema ida importante liu ema seluk atu tesi lia tuir sira nia pozisaun ka razaun seluk. Tenki tesi lia loos tuir deit buat nebee sira halo. Maibee tesi lia ba o nia maluk ho justisa loloos. 16O keta lao tuun-sae hodi lori lia aat iha o nia povu nia leet. O keta hamriik hasoru o nia maluk nia moris.#19:16 Ebreu ‘raan’. Hau mak Nai.
17O keta odi o nia maluk iha o nia fuan laran. O tenki koalia klaru ba o nia maluk, hodi o la bele hola parte iha ninia sala. 18O keta selu fali buat aat, ka rai odi ba o nia maluk sira, maibee o tenki hadomi o nia maluk hanesan o nia aan rasik.#19:18 Haree Mateus 19:19 no 22:39, Marcos 12:31, Lucas 10:27, Roma 13:9 no Tiago 2:8. Hau mak Nai.
Halo Tuir Hau Nia Estatutu Sira
19O tenki halo tuir Hau nia estatutu sira. Keta husik o nia karau sira atu kaben ho animál oin seluk. O keta kuda fini nebee kahur ho fini oin seluk iha o nia toos. O keta hatais ropa nebee halo ho hena nebee kahur kabas oin rua.
20Ema ida nebee halo sala seksuál ho feto ida nebee atan feto ida, nebee promete ona ba mane seluk, no ema seidauk hola feto nee, no nia seidauk hetan liberdade, nunee tenki tesi lia. Keta oho nia tanba nia la iha liberdade. 21Mane nee tenki lori ninia sakrifísiu multa ba Nai, iha odamatan ba Tenda Enkontru, nebee bibi malae aman ida hodi halo sakrifísiu multa. 22Saserdote tenki taka nia sala ho bibi malae aman nebee sakrifísiu multa iha Nai nia oin, tanba nia halo sala ona. No nia sei hetan perdaun hosi sala nebee nia halo ona nee.
23Bainhira imi tama rai nebaa, no imi kuda ona ai horis oi-oin hodi haan, entaun imi tenki haree ai fuan nee nudar ai fuan bandu.#19:23 Ebreu ‘ai fuan nebee la hetan sirkunsizaun’. Keta haan buat sira nee too tinan tolu tanba imi bandu buat sira nee. 24Maibee iha tinan ba dala haat, ai fuan hotu nee sai santu hodi hahii ba Nai. 25Iha tinan ba dala lima, imi bele haan ai fuan sira nee, hodi nunee imi bele hetan rezultadu diak. Hau mak Nai, imi nia Maromak.
26Imi keta haan buat nebee sei iha raan iha laran. Imi keta uza liafuan buan nian ka halo tuir buat matan dook nian. 27Imi keta tesi imi nia fuuk iha ulun sorin, no keta halakon imi nia hasan rahun nia rohan. 28Imi keta halo kanek iha imi nia isin tanba ema mate no keta hetan tato iha imi nia isin. Hau mak Nai.
29Keta faan o nia oan feto hodi halo sala seksuál no sai feto luroon. Keta halo be rai nee monu ba sala seksuál no rai nee sai nakonu ho hahalok aat loos. 30Tenki halo tuir Hau nia loron Sabdu, no hamtauk Hau nia Fatin Santu. Hau mak Nai.
31Keta fila ba ema nebee liga ba mate klamar sira no keta buka matan dook sira hodi sai la moos liu hosi sira. Hau mak Nai, imi nia Maromak.
32O tenki hamriik iha ema fuuk mutin nia oin, no foo respeitu ba ema katuas nia oin. Hamtauk o nia Maromak. Hau mak Nai.
33Keta kria problema ba ema estranjeiru nebee lao hamutuk ho imi iha imi nia rai. 34Maibee estranjeiru nebee hela ho imi sei hanesan ema nebee moris iha imi nia leet. Imi tenki hadomi nia hanesan imi nia aan rasik. Tanba uluk imi mak estranjeiru sira iha rai Ejitu. Hau mak Nai, imi nia Maromak.
35Imi keta halo buat nebee la loos bainhira imi tesi lia, no bainhira imi sukat, ka tetu, ka sura. 36Tenki uza dasin nebee loos, besi dasin nian nebee loos, baldi sukat nebee loos no kalen sukat nebee loos.#19:36 Ba baldi sukat, Ebreu mak efa nebee litru 22; kalen mak hin nebee litru 3,5. Hau mak Nai, imi nia Maromak, nebee lori imi sai hosi Ejitu. 37Nunee imi tenki halo tuir Hau nia estatutu hotu, no Hau nia regulamentu hotu, no halao buat sira nee. Hau mak Nai.”
Currently Selected:
Levítiku 19: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.