Levítiku 9
9
Nai Simu Arão Nia Sakrifísiu
1Iha loron ualu, Moisés bolu Arão no ninia oan mane sira no katuas sira hosi Israel. 2Nia dehan ba Arão, “Foti karau oan ida hodi halo sakrifísiu sala nian, no bibi malae aman ida hodi halo sakrifísiu tunu motuk, nebee perfeitu, hodi oferese iha Nai nia oin. 3No hatete ba ema Israel sira, ‘Foti bibi aman ida hodi halo sakrifísiu sala nian, no karau oan ida no bibi malae oan ida, nebee idade tinan ida no perfeitu hodi halo sakrifísiu tunu motuk; 4no karau aman ida no bibi malae aman ida hodi halo sakrifísiu dame nian, nebee halo sakrifísiu iha Nai nia oin; no oferta trigu nian ho mina. Tanba ohin loron Nai sei hatudu aan ba imi.’” 5Sira lori buat sira nee mai iha Tenda Enkontru nia oin tuir Moisés nia orden. No komunidade tomak hakbesik no hamriik iha Nai nia oin. 6Moisés dehan, “Nai foo ona orden ba imi hodi halo tuir buat nee, nunee Nai sei hatudu Ninia glória ba imi.” 7No Moisés dehan ba Arão, “Baa altár no oferese ita nia sakrifísiu sala nian, no ita nia sakrifísiu tunu motuk nian, no taka ita nia aan rasik nia sala, no ba povu nee. No oferese povu nia oferta no taka sira nia sala, tuir Nai nia orden.”
8Nunee Arão baa altár no oho karau oan hodi halo sakrifísiu sala nian ba nia aan rasik. 9No Arão nia oan mane sira lori raan nee ba nia no nia hatama ninia liman fuan iha raan no kose ba altár nia dikur sira no fui raan nee iha altár nia okos. 10Maibee bokur, no rins rua, no bokur nebee taka aten hosi sakrifísiu sala nian, nia tunu iha altár leten, tuir orden nebee Nai foo ba Moisés. 11No karau nia isin no kulit nia sunu ho ahi iha akampamentu liur.
12Depois nia oho sakrifísiu tunu motuk, no Arão nia oan mane sira lori raan nee ba nia no nia fakar ba altár nia sorin hotu. 13No sira lori sakrifísiu tunu motuk ba nia, ho pedasuk sira nee, no ulun, no nia tunu buat sira nee iha altár nia leten. 14Nia fasi teen boot no kelen sira, no tunu iha sakrifísiu tunu motuk nia leten nebee iha altár nia leten.
15Depois nia lori mai povu nia oferta. Nia foti bibi nebee povu nia sakrifísiu sala nian, no oho bibi nee hodi oferese tanba sira nia sala, hanesan ida primeiru nian. 16No nia lori mai sakrifísiu tunu motuk, no oferese buat nee tuir regulamentu. 17No nia lori mai oferta trigu nian no foti balu ho liman, no nia tunu iha altár leten, iha sakrifísiu tunu motuk nia sorin nebee halo ona iha dadeer-saan nee.
18Nia oho mos karau aman no bibi malae aman hodi halo sakrifísiu dame sira, nebee ba povu. No Arão nia oan mane sira lori raan nee ba nia hodi nia fakar ba altár nia sorin hotu, 19no bokur hosi karau aman no bibi malae aman, no ikun bokur, no buat nebee taka teen boot, no rins rua, no bokur nebee taka aten. 20Sira tau bokur nee iha naan hirus matan nia leten, no nia tunu bokur nee iha altár nia leten, 21maibee naan hirus matan no kelen loos nee Arão foti sae hodi halo oferta nebee hasae iha Nai nia oin, tuir Moisés nia orden.
22Arão foti sae ninia liman ba povu nee no foo bensaun ba sira, no nia tuun mai hosi fatin nebee nia oferese sakrifísiu sala nian, sakrifísiu tunu motuk no sakrifísiu dame sira. 23Moisés no Arão tama ba iha Tenda Enkontru nia laran, no sai fali no foo bensaun ba povu. No Nai hatudu Ninia glória ba povu tomak. 24No ahi sai mai hosi Nai nia oin, no haan buat nebee iha altár nia leten - sakrifísiu tunu motuk no bokur. Bainhira povu tomak haree buat nee, sira hakilar no monu ho oin ba rai.
Currently Selected:
Levítiku 9: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.