Lucas 13
13
Arepende Ba
1Iha tempu nebaa, ema balu foo hatene ba Jesus kona ba ema Galileia balu nebee Pilatos kahur sira nia raan ho sira nia sakrifísiu. 2Jesus hataan ba sira, “Imi hanoin ema Galileia sira nee hetan terus tanba sira mak sala nain nebee aat liu ema Galileia sira seluk ka? 3Hau hatete ba imi, laos. Maibee se imi la arepende, imi hotu mos sei lakon hanesan sira. 4Ka sira nain sanulu resin ualu, nebee uma aas Siloé monu hanehan sira no hamate sira. Imi hanoin katak sira mak sala nain aat liu ema seluk nebee hela iha Jerusalém ka? 5Hau hatete ba imi, laos. Maibee se imi la arepende, imi hotu mos sei lakon hanesan sira.”
Ai Knanoik Kona Ba Ai Figeira
6Nia konta mos ai knanoik nee: “Mane ida kuda ai figeira ida iha ninia toos uvas. Nia mai atu buka ai fuan hosi ai figeira nee maibee nia la hetan. 7Entaun nia dehan ba ema nebee servisu iha toos uvas nee, ‘Tebes, too tinan tolu ona, hau mai buka ai fuan hosi ai figeira nee. Maibee hau la hetan ida. Tesi tiha ai huun nee. Tanba saa mak ita husik nia la halo buat ida iha rai nee?’ 8No servisu nain hataan ba nia, ‘Nai, husik nia too tinan ida tan, no hau sei kee rai haleu nia huun no tau karau teen.#13:8 Lian Gregu la dehan ‘karau’, karik mos bibi teen ka teen seluk nebee halo rai bokur. 9No se nia foo fuan, diak. Maibee se lae, ita bele tesi tuun nia.’”
Feto Ho Espíritu Aat
10Jesus hanorin iha sinagoga ida iha loron Sabdu. 11No tebes, iha feto ida nebee iha espíritu nebee halo nia isin fraku durante tinan sanulu resin ualu. Nia hakruuk bonko deit no la bele hamriik loos. 12Bainhira Jesus haree feto nee, Nia bolu feto mai. Nia dehan ba feto nee, “Feto, o livre ona hosi o nia moras nee.” 13No Jesus tau liman ba nia, no nia hamriik loos kedas no hahii Maromak. 14Maibee sinagoga nia nai ulun hirus tanba Jesus kura ema iha loron Sabdu. No nia dehan ba povu nee, “Iha loron neen hodi halo servisu. Mai hetan kura iha loron sira nee, laos iha loron Sabdu.” 15Nai hataan ba nia dehan, “O laran makerek, iha loron Sabdu, laos imi ida-idak kore imi nia karau ka kuda buru hosi ninia luhan hodi lori nia ba hemu? 16Laos feto nee, nebee Abraão nia oan feto ida, nebee Satanás kesi durante tinan sanulu resin ualu, bele sai livre hosi kastigu nee iha loron Sabdu?” 17No bainhira Nia koalia nunee, ninia inimigu hotu sai moe. No povu hotu haksolok tanba buat furak hotu nebee Nia halo.
Mostarda Musan No Fermentu
18 #13:18-19 Haree Mateus 13:31-32. Depois Jesus dehan, “Maromak nia reinu hanesan saida? No Hau sei kompara reinu nee ho saida? 19Reinu nee hanesan mostarda musan ida, nebee ema lori no kuda iha ninia toos. Mostarda musan nee moris mai no sai ai huun boot ida. No manu sira iha loro leten mai halo knuuk iha ninia sanak.”
20No Nia dehan fali, “Hau sei kompara Maromak nia reinu ho saida? 21Reinu nee hanesan fermentu, nebee feto ida foti no kahur hamutuk ho trigu baldi tolu, too masa tomak sae.”
Odamatan Kloot
22Jesus kontinua lao liu hosi sidade no aldeia sira atu baa Jerusalém. No Nia kontinua hanorin. 23Ema ida dehan ba Nia, “Nai, ema uitoan deit sei hetan salvasaun ka?” No Nia dehan ba sira, 24“Hakaas aan atu tama liu hosi odamatan kloot. Tanba Hau hatete ba imi katak ema barak koko atu tama no sira la bele. 25Bainhira uma nain hamriik no taka tiha odamatan, imi sei hamriik iha liur no dere odamatan. No imi sei dehan, ‘Nai, Nai, loke lai odamatan mai ami.’ No nia sei hataan ba imi, ‘Hau la hatene imi mai hosi nebee.’ 26Depois imi sei hahuu dehan, ‘Ami haan hemu ona iha ita boot nia prezensa, no ita boot hanorin iha ami nia dalan sira.’ 27Maibee nia sei dehan, ‘Hau hatete ba imi, Hau la hatene imi mai hosi nebee. Hadook aan tiha hosi hau, imi hotu nebee halo hahalok aat.’ 28No imi sei tanis no ruun nehan bainhira imi haree Abraão, Isak no Jacó, no profeta sira hotu iha Maromak nia reinu, no Maromak soe imi rasik sai ba liur. 29No ema sei mai hosi parte lorosae no loromonu, hosi parte norte no súl. No sira sei tuur iha Maromak nia reinu. 30Tebes, ema nebee ikus sei sai primeiru. No ema nebee primeiru sei sai ikus.
Tanis Kona Ba Jerusalém
31Iha oras nee, ema Farizeu balu mai no dehan ba Jesus, “Sai tiha hosi fatin nee, tanba Herodes hakarak oho O.” 32Nia dehan ba sira, “Imi baa no foo hatene ba asu fuik kiik nee, ‘Tebes, Hau duni sai diabu sira no Hau kura ema ohin no aban. No iha loron terseiru Hau sei halo kompletu. 33Maski nunee Hau tenki kontinua lao ohin, aban no loron tuir mai. Tanba profeta ida la bele mate iha Jerusalém nia liur.’ 34Oh Jerusalém, Jerusalém, nebee oho profeta sira, no tuda mate sira nebee Maromak haruka ba o! Dala hira ona Hau hakarak halibur hamutuk o nia oan sira, hanesan manu inan halibur ninia oan sira iha ninia liras okos. Maibee imi lakohi! 35Tebes, Maromak#13:35 Lian Gregu la hakerek ‘Maromak’. husik tiha ona imi nia uma nee. Tebes, Hau hatete ba imi katak imi sei la haree tan Hau too tempu nebee imi dehan, ‘Bensaun ba Nia nebee mai hodi Nai nia naran.’”
Currently Selected:
Lucas 13: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
