Lucas 14
14
Jesus Kura Ema Iha Sabdu
1Iha loron Sabdu ida, bainhira Jesus tama ba iha xefi Farizeu ida nia uma atu haan, sira haree tu-tuir Nia. 2No tebes, iha mane ida iha Ninia oin nebee moras isin bubu. 3Jesus hataan ba ema nebee hatene lei no ema Farizeu sira dehan, “Tuir lei, ita bele kura iha loron Sabdu ka lae?” 4Maibee sira nonook deit. Entaun Jesus tau liman ba ema nee, kura nia no haruka nia baa. 5Jesus dehan ba sira, “Iha imi nia leet, see mak iha oan ka karau ida nebee monu iha bee posu iha loron Sabdu no la hasai kedas nia?” 6No sira la bele hataan liafuan ida kona ba buat hirak nee.
Ai Knanoik: Festa Kazamentu
7Bainhira Jesus haree oinsaa bainaka sira hili tuur fatin nebee importante, Nia konta ai knanoik ida ba sira. Nia dehan ba sira, 8#14:8-11 Haree Provérbiu 25:6-7.“Bainhira ema konvida o ba festa kazamentu ida, keta tuur iha fatin importante. Keta halo be nia konvida ema boot liu fali o. 9No nia nebee konvida imi nain rua sei mai no dehan ba o, ‘Foo fatin nee ba ema ida nee.’ Nunee o komesa sai moe no tenki baa fatin iha kotuk liu. 10Maibee bainhira ema konvida o, baa tuur iha kotuk liu. No bainhira nia nebee konvida o mai, nia bele dehan ba o, ‘Belun, mai tuur lai iha oin.’ Entaun o sei simu onra iha ema hotu nia oin nebee tuur iha meza hamutuk ho o. 11Tanba ema nebee foti aan, Nai sei hatuun nia; no ema nebee haraik aan, Nai sei foti aas nia.”
Ai Knanoik: Festa Boot Tebes
12Depois Jesus dehan ba ema nebee konvida Nia, “Bainhira o prepara haan kalan ka festa ida, keta konvida o nia belun sira, ka o nia maun-alin sira, ka o nia família, ka o nia vizinhu sira nebee riku. Tanba sira bele mos konvida fali o, no selu fali o. 13Maibee bainhira o halo festa, konvida ema kiak sira, ema aleijadu sira, ema ain aat sira no ema matan delek sira. 14No o sei simu bensaun, tanba sira la bele selu fali o. Tanba o sei simu o nia kolen iha tempu nebee ema loos sei moris hias.”
15Rona tiha buat sira nee, ema ida hosi sira nebee tuur haan ho Jesus dehan ba Jesus, “Haksolok ba nia nebee sei haan paun iha Maromak nia reinu!” 16#14:16-24 Haree Mateus 22:2-14.Maibee Jesus dehan ba nia, “Mane ida halo festa boot no konvida ema barak. 17Bainhira oras festa nian too ona, nia haruka ninia atan baa atu dehan ba sira nebee nia konvida ona nee, ‘Mai, tanba buat hotu prontu ona.’ 18Maibee sira hotu hahuu foo razaun oi-oin. Ida primeiru dehan ba nia, ‘Hau foin sosa rai ida, no hau tenki baa no haree rai nee. Hau husu deskulpa lai.’ 19No ida seluk dehan, ‘Hau foin sosa karau pár lima, no hau baa atu koko sira. Hau husu deskulpa lai.’ 20No ida seluk tan dehan, ‘Hau foin kaben ho hau nia feen, nunee hau la bele baa.’ 21Nunee atan mai, no foo hatene ba ninia nai kona ba buat sira nee. Depois uma nain nee sai hirus no dehan ba ninia atan, ‘Sai lalais baa estrada-estrada no dalan kiik sira iha sidade. No lori mai ema kiak, ema aleijadu, ema ain aat no ema matan delek.’ 22Tuir mai, atan dehan, ‘Nai, ida nee halo tiha ona tuir ita boot nia orden. Maibee fatin sei iha.’ 23No nai nee dehan ba ninia atan, ‘Sai ba dalan boot no toos sira, no obriga ema tama mai, hodi hau nia uma bele sai nakonu. 24Tanba hau dehan ba imi, hosi sira nebee hau konvida uluk nee, ida mos sei la koko hahaan iha hau nia festa.’”
Folin Atu Sai Dixípulu
25Ema lubun boot sira akompanha Jesus. No Nia fila oin no dehan ba sira, 26“Se ema ida hakbesik mai Hau, no nia la odi ninia inan-aman, feen, oan sira, maun-alin sira, no mos ninia moris rasik, nia la bele sai Hau nia eskolante.#14:26-27 Kompara ho Mateus 10:37-38. 27No ema nebee la lori ninia krús no lao tuir Hau, nia la bele sai Hau nia eskolante. 28Tanba imi ida nebee hakarak harii uma aas ida, laos nia tuur uluk lai no sura folin hira hodi haree ninia osan too atu halo too hotu? 29Se lae, bainhira nia hada fundasaun no la bele halo too hotu, ema hotu nebee haree ida nee komesa goza nia. 30No sira sei dehan, ‘Ema nee hahuu harii uma, maibee nia la bele halo too hotu.’ 31Ou se iha liurai ida nebee atu funu hasoru liurai seluk. Laos nia tuur uluk lai no tetu di-diak atu nia bele baa ho soldadu nain rihun sanulu hodi hasoru ida nebee iha soldadu nain rihun rua-nulu ka lae? 32Se lae, bainhira ida seluk dook hela, nia sei haruka reprezentante sira atu husu oinsaa atu halo dame. 33Nunee mos, se imi ida la husik buat hotu nebee nia iha, nia la bele sai Hau nia eskolante.
Masin Nebee Lakon Meer
34 #14:34-35 Haree Mateus 5:13. Lee kona ba masin iha Kolose 4:6 no nota. Masin mak diak. Maibee se masin nee lakon meer karik, oinsaa halo nia sai meer fali? 35Masin nee la diak ba toos ka atu tau iha teen fatin, maibee atu soe deit ba liur. Nia nebee iha tilun, husik nia rona ba.”
Currently Selected:
Lucas 14: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
