Lucas 17

Tentasaun Atu Sala

1Depois Jesus dehan ba Ninia eskolante sira, “Lasu nebee halo ema monu ba sala sei mai duni.#17:1 Lasu ka fatuk nebee halo ema sidi no monu ba sala ka sai tentasaun ba ema. Maibee susar ba nia nebee lori mai lasu nee! 2Diak liu ema kesi fatuk boot dulas batar nian ba ninia kakorok no soe nia ba tasi laran, duké nia halo kiik-oan sira nee ida atu monu ba sala.

3Kuidadu aan ba! Se o nia maluk halo sala hasoru o, koriji nia. No se nia arepende karik, foo perdaun ba nia. 4No se nia halo sala hasoru o dala hitu iha loron ida, no dala hitu nia fila fali ba o, no dehan, ‘Hau arepende,’ nunee o tenki foo perdaun ba nia.”

Aumenta Fiar

5Apostolu sira dehan ba Nai, “Aumenta tan ami nia fiar.” 6Nai dehan, “Se imi iha fiar hanesan mostarda musan ida,#17:6 Mostarda musan kiik tebes. Haree Mateus 13:31-32. imi bele dehan ba ai figeira boot nee,#17:6 Ai huun boot nebee Ficus sycomorus. Haree Lucas 19:4. ‘Fokit aan ba, no kuda fali iha tasi laran,’ no nia sei halo tuir.

Atan Tuir Orden

7Iha imi nia leet, iha ema ida nebee se karik nia iha atan ida nebee fila rai ka hein bibi, no atan nee fila fali hosi toos no patraun dehan, ‘Mai lai no tuur hodi haan’? 8Laos nia sei dehan ba atan nee, ‘Prepara hau nia hahaan. No hatais aan atu serví hau bainhira hau haan hemu. Depois mak o bele haan hemu.’ 9Nia sei foo obrigadu ba ninia atan tanba atan halo tuir orden sira nee ka? 10Hanesan nee mos ho imi, bainhira imi halo tuir orden hotu nebee imi simu, dehan, ‘Ami mak atan sira nebee folin laek. Ami halo tuir deit ami nia obrigasaun.’”

Ema Moras Lepra Sanulu

11Bainhira sira halo viajen ba Jerusalém, Jesus lao hosi Galileia too Samaria. 12No Nia tama ba aldeia ida. Iha nebaa ema moras lepra nain sanulu mai hasoru Nia, maibee sira hamriik dook. 13Sira bolu ho lian makaas dehan, “Jesus, Mestri, hatudu laran luak mai ami.” 14No bainhira Nia haree sira, Nia dehan ba sira, “Baa hatudu aan ba saserdote sira.” No bainhira sira lao hela iha dalan sira sai moos.#17:14 Sira hetan isin diak. Bíblia koalia kona ba ‘moos’ no ‘la moos’ tanba Lei. Haree Levítiku 14:1-32. 15Bainhira ema sira nee ida haree katak nia hetan isin diak ona, nia fila fali no hahii Maromak ho lian makaas. 16Nia monu tuun ho oin ba rai iha Jesus nia ain no foo agradese. No nia mak ema Samaria ida. 17Jesus hataan dehan, “Laos ema nain sanulu sai moos? Entaun nain sia nee iha nebee? 18La iha ema ida mak fila fali hodi foo glória ba Maromak, só deit ema estranjeiru nee ka?” 19Jesus dehan ba nia, “Hamriik no lao ba. O nia fiar salva ona o.”

Reinu Sei Mai

20Ema Farizeu sira husu bainhira mak Maromak nia reinu sei mai. Jesus hataan ba sira dehan, “Maromak nia reinu sei mai, maibee laos ho sinál sira nebee imi bele haree. 21No ema sei la dehan, ‘Haree iha nee!’ ka, ‘Haree iha nebaa!’ Tanba tebes, Maromak nia reinu mak iha imi nia leet.”#17:21 Ka ‘iha imi nia laran’.

22Jesus dehan ba eskolante sira, “Tempu sei too mai bainhira imi sei hakarak haree loron ida hosi Ema Nia Oan, no imi sei la haree ida nee. 23No sira sei dehan ba imi, ‘Haree iha nebaa!’ ka, ‘Haree iha nee!’ Keta baa, no keta lao tuir sira. 24Tanba hanesan rai lakan nebee nabilan hosi lalehan rohan ida too rohan seluk, nunee mos ho Ema Nia Oan iha Ninia loron. 25Maibee uluk lai Nia tenki simu terus barak, no jerasaun nee sei rejeita Nia. 26#17:26-37 Haree Mateus 24:37-41.Tanba hanesan iha Noé nia tempu, nunee mos iha Ema Nia Oan nia tempu. 27Sira haan hemu hela, no sira kaben no troka prenda atu kaben, too loron nebee Noé tama tiha ba roo boot laran. Depois rai nabeen mai no halakon sira hotu.#17:27 Lee kona ba Noé no rai nabeen iha Jénesis 7:17. 28Hanesan mos iha Ló nia tempu. Sira haan hemu, sosa no faan, kuda toos no harii uma. 29Maibee iha loron nebee Ló sai hosi Sodoma, ahi no fatuk klaak tuun mai hosi lalehan, no halakon sira hotu.#17:29 Lee kona ba Sodoma iha Jénesis 19:24. 30Nunee mos sei akontese iha loron nebee Ema Nia Oan hatudu aan. 31Iha loron nebaa, nia nebee sei iha uma leten, no iha sasaan iha uma laran, keta tuun mai atu foti sasaan hosi uma laran. No mos nia nebee iha toos, keta fila fali mai. 32Hanoin hetan Ló nia feen. 33See deit nebee hakarak salva ninia moris sei lakon ninia moris; no see deit nebee lakon ninia moris sei salva ninia moris. 34Hau hatete ba imi, iha kalan nebaa sei iha ema nain rua iha kama ida; Maromak sei lori tiha ida, no Nia sei husik hela ida seluk.#17:34 Liafuan Gregu la dehan ‘Maromak’. Iha mos versíkulu 35 no 36. 35Feto nain rua sei fai batar hamutuk; Maromak sei lori tiha ida, no Nia sei husik hela ida seluk. 36Ema nain rua sei iha toos; Maromak sei lori tiha ida, no Nia sei husik hela ida seluk.” 37Sira hataan ba Nia, “Iha nebee, Nai?” No Nia dehan ba sira, “Iha fatin nebee iha mate isin, iha nebaa manu makikit halibur hamutuk.”

Currently Selected:

Lucas 17: BK

Highlight

Copy

Compare