Lucas 18

Feto Faluk Nebee La Rende

1Jesus konta ai knanoik ida ba sira hodi sira bele kontinua halo orasaun nafatin, no keta rende. 2Nia dehan, “Iha sidade ida iha juis ida. Nia la hamtauk Maromak no la respeita ema. 3No sidade nee iha mos feto faluk ida. Nia baa hasoru beibeik juis nee no dehan, ‘Foo justisa mai hau hasoru hau nia akuzadór.’ 4Fo-foun juis nee lakohi. Maibee tuir mai nia dehan ba nia aan, ‘Mezmu hau la hamtauk Maromak no la respeita ema, 5maibee tanba feto faluk nee kria problema nafatin, hau sei foo justisa ba nia. Se lae, nia sei halo hau kole tanba nia mai beibeik.’” 6Depois Nai dehan, “Rona saida mak juis nebee la justu nee dehan. 7Laos Maromak sei foo justisa ba Ninia ema nebee Nia hili ona, nebee hakilar ba Nia loron-kalan? Nia sei dada tempu kona ba sira ka? 8Hau hatete ba imi katak Nia sei foo justisa ba sira lalais. Maski nunee, bainhira Ema Nia Oan mai, Nia sei hetan fiar iha mundu nee ka lae?”

Ema Farizeu No Kobradór Impostu

9Jesus konta mos ai knanoik nee ba ema sira nebee fiar aan katak sira ema moris loos no sira hakribi ema seluk: 10“Ema nain rua sae ba Templu hodi halo orasaun. Ida ema Farizeu no ida seluk ema kobradór impostu. 11Farizeu nee hamriik mesak no halo orasaun nunee, ‘Maromak, hau foo agradese ba Ita Boot, katak hau la hanesan ema seluk, nebee hamatak sasaan, la justu, halo sala seksuál, no hau la hanesan mos ho kobradór impostu nee. 12Hau jejún dala rua kada semana ida, no hau foo porsentu sanulu hosi buat hotu nebee hau hetan.’ 13Maibee kobradór impostu nee, nia hamriik dook, no lakohi foti sae ninia matan ba lalehan, maibee nia tuku ninia hirus matan no dehan, ‘Maromak, hatudu grasa mai hau nebee sala nain!’ 14Hau hatete ba imi, mane ida nee tuun fali ba ninia uma ho laran loos; maibee laos ema Farizeu nee. Tanba ema hotu nebee foti aan, Maromak sei hatuun nia; no nia nebee haraik aan, Maromak sei foti aas nia.”

Husik Labarik Sira Mai

15 #18:15-17 Haree Mateus 19:13-15 no Marcos 10:13-16. Ema sira lori mos labarik kiik-oan ba Jesus hodi Nia bele tau liman ba sira. Maibee bainhira Ninia eskolante sira haree ida nee, sira siak ema sira nee. 16Maibee Jesus bolu kiik-oan sira mai, no dehan, “Husik kiik-oan sira nee hakbesik mai Hau, no keta hapara sira. Tanba ema hanesan nee mak simu Maromak nia reinu. 17Tebes Hau dehan ba imi, ema nebee la simu Maromak nia reinu hanesan labarik kiik-oan ida, nia sei la bele tama reinu nee.”

Xefi Nebee Riku

18 #18:18-30 Haree Mateus 19:16-30, Marcos 10:17-31. Xefi ida husu Jesus dehan, “Mestri Diak, hau tenki halo saida atu hetan moris rohan laek?” 19No Jesus dehan ba nia, “Tanba saa mak o bolu Hau diak? La iha ida nebee diak, só Maromak mesak deit. 20O hatene ona ukun fuan sira: ‘Keta halo sala seksuál, keta oho, keta naok, keta foo sasin falsu, foo onra ba o nia inan-aman.’”#18:20 Haree ukun fuan sira iha Exodu 20. 21No xefi dehan, “Hau halo tuir buat sira nee hotu dezde hau sei kiik.” 22Bainhira Jesus rona nunee, Nia dehan ba xefi, “O sei falta buat ida: faan tiha buat hotu nebee o iha, no fahe ba ema kiak sira, no o sei hetan riku-soin iha lalehan. No mai tuir Hau.” 23Bainhira xefi rona nunee, nia sai tristi tebes, tanba nia riku loos. 24No bainhira Jesus haree katak xefi nee tristi tebes, Nia dehan, “Susar duni ba sira nebee iha riku-soin atu tama Maromak nia reinu! 25Tanba fasil liu ba kuda kamelu ida#18:25 Iha lian Aramaiku, liafuan ‘kuda kamelu’ no ‘tali’ atu hanesan deit. Haree Mateus 19:24. atu tama liu hosi daun kuak, duké ema riku ida atu tama ba Maromak nia reinu.” 26Ema sira nebee rona nunee dehan, “Entaun see mak bele hetan salvasaun?” 27Maibee Jesus dehan, “Buat nebee ema la bele halo, Maromak bele halo.” 28Depois Pedro dehan, “Tebes, ami husik ona ami nia sasaan, no tuir O.” 29No Nia dehan ba sira, “Hau dehan lo-loos ba imi, katak ema nebee husik uma, feen, maun-alin, inan-aman, ka oan sira, tanba Maromak nia reinu, 30ema nee sei simu barak liu tan iha tempu agora, no moris rohan laek iha tempu nebee atu mai.”#18:30 Iha lian Gregu, ‘tempu agora’ mak kairos, no ‘tempu nebee atu mai’ mak aion.

Jesus Foo Hatene Nia Atu Mate

31 #18:31-33 Haree Mateus 20:17-19 no Marcos 10:32-34. Depois Jesus halibur sira nain sanulu resin rua nee, no dehan ba sira, “Tebes, ita sae dadaun ba Jerusalém, no buat hotu nebee profeta sira hakerek ona kona ba Ema Nia Oan sei akontese. 32Tanba ema sei entrega Nia ba ema Jentiu sira, no sira sei goza Nia, no halo terus ba Nia, no tafui kabeen ba Nia. 33No sira sei baku Nia ho sikoti, no oho Nia. No iha loron terseiru Nia sei moris hias.” 34Maibee sira la kompriende buat ida hosi liafuan nee. Liafuan nee subar hela hosi sira no sira la hatene buat nebee Jesus dehan.

Jesus Kura Ema Matan Delek

35 #18:35-43 Haree Mateus 20:29-34 no Marcos 10:46-52. Bainhira Jesus hakbesik ba Jerikó, ema matan delek ida tuur hela iha dalan ninin hodi husu ezmola. 36Nia rona ema lubun boot lao liu dadaun, nunee nia husu saida mak akontese. 37No sira foo hatene ba nia, “Jesus hosi Nazaré mak liu dadaun.” 38Entaun nia hakilar no dehan, “Jesus, Oan Mane hosi David, hatudu laran luak mai hau!” 39No sira nebee lao uluk siak nia no haruka nia nonook. Maibee nia hakilar makaas liu tan, “Oan Mane hosi David, hatudu laran luak mai hau!” 40Jesus para, no haruka sira lori ema nee ba Nia. Bainhira ema nee hakbesik, Jesus husu nia, 41“Saida mak o hakarak Hau halo ba o?” No nia dehan, “Nai, hau hakarak haree.” 42No Jesus dehan ba nia, “O bele haree. O nia fiar salva ona o.” 43Nia bele haree kedas. No nia lao tuir Jesus no foo glória ba Maromak. No povu hotu nebee haree ida nee hahii Maromak.

Currently Selected:

Lucas 18: BK

Highlight

Copy

Compare