Lucas 19

Jesus No Zakeu

1Jesus tama Jerikó no Nia lao liu dadaun. 2No tebes, iha mane ida naran Zakeu, nebee xefi ba kobradór impostu sira. Nia ema riku ida. 3Nia hakarak haree Jesus maibee nia la bele tanba ema lubun boot nee, no nia ema ain badak. 4Entaun nia halai uluk, no nia sae ai figeira boot.#19:4 Ai huun boot nebee Ficus sycomorus. Bele aas too 20m. Hanesan ai figeira maibee fuan kiik no laduun midar hanesan ai figeira. 1 Liurai 10:27, 1 Krónikas 27:28, Salmu 78:47, Amos 7:14, Lucas 17:6. Nia sae hodi haree Jesus nebee atu lao liu fatin nee. 5Bainhira Jesus too iha fatin nee, Nia hateke ba leten no dehan ba Zakeu, “Zakeu, tuun lalais mai. Tanba ohin Hau sei hela iha o nia uma.” 6Nunee nia tuun lalais, no simu Jesus ho laran haksolok. 7No bainhira povu haree ida nee, sira hotu murmura dehan, “Nia baa hodi sai bainaka ba mane ida nebee sala nain.” 8Tuir mai, Zakeu hamriik, no dehan ba Nai, “Tebes, Nai, hau sei fahe hau nia riku-soin ba rua hodi foo sorin ida ba ema kiak. No se hau hamatak ona ema karik, hau sei foo fali dala haat.” 9Jesus dehan ba nia, “Ohin loron salvasaun mai tiha ona iha uma nee, tanba nia mos Abraão nia oan. 10Tanba Ema Nia Oan mai hodi buka no salva ema nebee lakon.”

Ai Knanoik: Atan Diak

11Bainhira ema rona liafuan nee, Jesus foo sai ai knanoik ida, tanba Nia besik too Jerusalém, no sira hanoin katak Maromak nia reinu atu mosu mai kedas. 12Nunee Nia dehan, “Ema boot ida baa rai dook hodi simu reinu ida no fila fali mai. 13No nia bolu ninia atan nain sanulu. Nia foo osan mean#19:13 Lian Gregu dehan mina nebee iha tempu antigu liu (hanesan Abraão nia tempu) sira uza hodi tetu sasaan. Iha Jesus nia tempu, mina ida mak osan mean ho valór hanesan ema servisu too fulan tolu. sanulu ba sira no dehan ba sira, ‘Fila liman ba too hau mai fali.’ 14Maibee ninia povu odi nia. Sira haruka mensajen tuir nia nebee dehan, ‘Ami lakohi mane ida nee ukun ami.’ 15Tuir mai, bainhira nia simu ona reinu no nia fila fali, nia haruka ema bolu atan sira mai hasoru nia. Tanba nia foo ona osan mean ba sira no nia hakarak hatene ema ida-idak nee manaan hira liu hosi fila liman. 16Atan primeiru mai no dehan, ‘Nai, ita boot nia osan mean ida manaan fali osan mean sanulu.’ 17No nia dehan ba atan nee, ‘Diak! O mak atan diak. Tanba o hatudu fidelidade ho buat uitoan, nunee hau foo ba o knaar ba sidade sanulu.’ 18Depois atan segundu mai no dehan, ‘Nai, o nia osan mean ida manaan fali osan mean lima.’ 19No nia dehan ba atan nee, ‘O mos bele simu knaar ba sidade lima.’ 20Depois atan ida fali mai no dehan, ‘Nai, iha nee mak ita boot nia osan mean ida. Hau falun ho hena no rai di-diak. 21Tanba hau tauk ita boot. Tanba ita boot mak ema siak-teen, nebee foti buat nebee ita boot la rai, no kuu buat nebee ita boot la kuda.’ 22No nia dehan ba atan nee, ‘Hau sei tesi lia ba o tuir liafuan nebee sai hosi o nia ibun rasik, atan aat nee! O hatene ona ka, katak hau ema siak-teen, nebee foti buat nebee hau la rai, no kuu buat nebee hau la kuda ka? 23Entaun tanba saa mak o la rai hau nia osan iha banku? Nunee, bainhira hau mai fali hau bele hetan hau nia osan ho nia funan.’ 24No ema boot nee dehan ba sira nebee hamriik iha sorin, ‘Foti tiha osan mean ida nee hosi nia, no foo ba atan nebee iha osan mean sanulu.’ 25Sira dehan ba nia, ‘Nai, nia iha ona osan mean sanulu!’ 26‘Hau hatete ba imi, katak ba ema ida-idak nebee iha ona, hau sei foo tan; no hosi nia nebee la iha, buat uitoan nebee nia sei iha hau sei hasai. 27Maibee hau nia inimigu sira, nebee lakohi hau atu ukun sira, lori sira mai no oho sira iha hau nia oin.’”

Jesus Tama Jerusalém

28 #19:28-38 Haree Mateus 21:1-9, Marcos 11:1-10 no João 12:12-15. Bainhira Jesus koalia tiha nunee, Nia lao uluk, no sae ba Jerusalém. 29Bainhira Nia besik Betfage no Betánia, iha foho nebee naran Foho Oliveira, Nia haruka eskolante nain rua, 30no dehan, “Tama ba aldeia iha ita nia oin nee. Bainhira imi tama tiha, imi sei hetan kuda buru oan ida nebee kesi hela. Ema seidauk sae kuda buru oan nee. Kore nia, no lori nia mai. 31Se ema ida husu imi, ‘Tanba saa mak imi kore nia?’ Imi sei hataan nunee, ‘Tanba Nai presiza nia.’” 32Entaun sira nebee Jesus haruka ona baa no hetan ida nee tuir buat nebee Nia hatete ona ba sira. 33No bainhira sira kore dadaun kuda buru oan nee, kuda buru nia nain dehan ba sira, “Tanba saa mak imi kore kuda buru oan nee?” 34Sira dehan, “Nai presiza nia.” 35Sira lori kuda buru oan nee ba Jesus. Sira tau sira nia ropa iha kuda buru oan leten, no sira tau Jesus iha leten. 36No bainhira Jesus liu dadaun, sira nahe sira nia ropa iha dalan. 37Bainhira Nia besik ona, no too iha dalan nebee tuun hosi Foho Oliveira, Ninia eskolante lubun tomak hahuu haksolok no hahii Maromak ho lian makaas tanba milagre hotu nebee sira haree tiha ona. 38Sira dehan, “Bensaun ba Liurai nebee mai hodi Nai nia naran! Dame iha lalehan, no glória iha fatin aas liu!” 39Maibee ema Farizeu balu nebee iha ema lubun boot nia leet dehan ba Nia, “Mestri, hasee O nia eskolante sira.” 40Jesus hataan ba sira, “Hau hatete ba imi, se sira nonook, fatuk sira sei hakilar.”

Jesus Tanis Kona Ba Jerusalém

41Bainhira Jesus besik ona, Nia haree Jerusalém no tanis kona ba sidade nee. 42Nia dehan, “Se o rasik bele hatene loron ohin kona ba buat nebee bele halo dame! Maibee agora buat sira nee subar ona hosi o nia matan. 43Tanba tempu sei mai, bainhira o nia inimigu sira sei halo lutu kroat haleu o, no sira sei serka o no hanehan o iha sor-sorin. 44Sira sei harahun o no o nia oan sira nebee iha o nia laran. Sira sei la husik fatuk ida iha fatuk seluk nia leten. Tanba o la hatene tempu nebee Nai mak vizita o.”

Jesus Hamoos Templu

45 #19:45-47 Haree Mateus 21:12-16 no Marcos 11:15-18. Jesus tama Templu, no komesa duni sai sira nebee faan sasaan. 46Nia dehan ba ema sira nee, “Ema hakerek nanis ona, ‘Hau nia uma mak uma orasaun nian.’ Maibee imi halo fatin nee sai fali naok-teen sira nia knuuk.”#19:46 Kona ba ‘uma orasaun’, haree Isaias 56:7. Kona ba naok-teen sira nia knuuk, haree Jeremias 7:11.

47No Jesus hanorin loro-loron iha Templu. Maibee xefi saserdote sira, eskriba sira no xefi hosi povu nee buka dalan atu halakon Nia. 48Maibee sira la bele halo buat ida tanba povu hotu rona hela deit#19:48 Lian Gregu dehan ‘tara ba Ninia liafuan’, ho signifika katak sira gosta tebe-tebes atu rona Jesus. Ninia liafuan.

Currently Selected:

Lucas 19: BK

Highlight

Copy

Compare