Lucas 20

Jesus Nia Kbiit

1 #20:1-8 Haree Mateus 21:23-27 no Marcos 11:27-33. Tuir mai, Jesus hanorin povu iha Templu no Nia haklaken evanjelhu. Iha loron ida, xefi saserdote sira no eskriba sira mai hamutuk ho katuas sira, 2no dehan ba Nia, “Foo hatene mai ami, liu hosi kbiit saida mak O halo buat sira nee? See mak foo kbiit nee ba O?” 3No Jesus hataan sira dehan, “Hau mos sei husu imi pergunta ida. Foo hatene mai Hau lai: 4Batizmu hosi João mai hosi nebee? Hosi lalehan, ka hosi ema?” 5No sira koalia ba malu no dehan, “Se ita dehan, ‘Hosi lalehan,’ Nia sei dehan, ‘Tanba saa mak imi la fiar nia?’ 6Maibee se ita sei dehan, ‘Hosi ema,’ povu hotu nee sei foti fatuk hodi tuda mate ita. Tanba sira fiar katak João mak profeta ida.” 7Entaun sira hataan katak sira la hatene batizmu nee mai hosi nebee. 8No Jesus dehan ba sira, “Nunee Hau mos sei la foo hatene ba imi liu hosi kbiit saida mak Hau halo buat sira nee.”

Ai Knanoik: Ema Nebee Hadau Toos

9 #20:9-18 Haree Mateus 21:33-46 no Marcos 12:1-12. Depois Jesus komesa konta ai knanoik ida ba povu nee: “Ema ida kuda toos uvas ida. Depois nia foo aluga ba ema hodi servisu iha toos nee no nia baa rai dook no hela kleur iha nebaa. 10No iha tempu koileta, nia haruka atan ida ba ema nebee servisu iha toos nee, atu nunee sira bele foo ba nia uvas fuan balu hosi toos uvas. Maibee ema sira nebee servisu iha toos baku atan nee, no duni nia sai ho liman mamuk. 11No toos nain haruka fali atan seluk. Maibee ema nebee servisu iha toos nee baku mos atan nee, despreza nia, no duni nia sai ho liman mamuk. 12Toos nain haruka tan atan terseiru. No sira hakanek mos nia, no soe nia sai ba liur. 13Depois nain ba toos uvas nee dehan, ‘Hau sei halo saida? Hau sei haruka hau nia oan mane ida nebee hau hadomi. Karik sira sei respeita nia bainhira sira haree nia.’ 14Maibee bainhira ema nebee servisu iha toos nee haree toos nain nia oan, sira koalia hamutuk no dehan, ‘Nia mak simu toos nudar liman rohan. Mai ita oho nia hodi liman rohan nee sai ita nian.’ 15Entaun sira soe oan mane nee ba toos liur no oho tiha nia. Nunee nain ba toos uvas nee sei halo saida ba sira? 16Nia sei mai no halakon ema sira nebee servisu iha toos uvas nee. No nia sei foo toos uvas ba ema seluk.” Bainhira sira rona tiha liafuan nee, sira dehan, “Nee la bele!” 17No Jesus hateke ba sira, no dehan, “Entaun saida mak liafuan nee, nebee ema hakerek nanis ona:

‘Fatuk ida nebee badaen sira rejeita,

ida nee sai fatuk ulun ba lidun’?#20:17 Ou ‘sai huun ba fundasaun.’ Haree Salmu 118:22.

18Ema nebee monu ba fatuk nee sei rahun; no bainhira fatuk nee monu ba ema nia leten, fatuk nee sei deut ema nee.”#20:18 Haree Isaias 8:14-15. 19Xefi saserdote sira no eskriba sira koko atu kaer Jesus iha tempu nee kedas. Tanba sira hatene katak Nia konta ai knanoik nee hodi hasoru sira. Maibee sira tauk povu.

Selu Impostu Ba César

20 #20:20-38 Haree Mateus 22:15-32 no Marcos 12:13-27. Nunee xefi saserdote sira haree tu-tuir Jesus. Sira haruka espiaun sira atu finji nudar ema loos. Atu nunee sira bele lasu Nia liu hosi Ninia liafuan. Sira hakarak entrega Nia ba governadór nia kbiit no autoridade. 21Entaun sira husu Nia, “Mestri, ami hatene katak O koalia no hanorin loos. No O la fihir ema nia oin maibee O hanorin Maromak nia dalan ho lia loos. 22Nunee tuir lei, ita tenki foo osan impostu ba César#20:22 César mak liurai boot liu iha Roma nebee ukun sira nia rai. ka lae?” 23Maibee Nia haree sira nia lasu, no dehan ba sira, 24“Hatudu lai osan denáriu#20:24 Osan mutin nebee selu ba ema nia servisu ba loron ida. ida mai Hau. Figura nee see nian no naran nee see nian?” Sira hataan, “César nian.” 25Entaun Nia dehan ba sira, “Nunee foo ba César buat nebee César nian, no foo ba Maromak buat nebee Maromak nian.” 26Sira la bele lasu Nia liu hosi Ninia liafuan iha povu nia oin. Ninia resposta halo sira admira fali no sira sai nonook.

Ema Saduseu Sira Koko Jesus

27Depois ema Saduseu balu hakbesik ba Jesus. Sira la fiar katak ema bele moris hias. No sira husu Nia, 28“Mestri, Moisés hakerek ba ami katak se mane ida nia maun mate, nebee husik hela ninia feen, maibee oan la iha, nunee alin nee tenki kaben fali ho feto faluk nee. No alin nee tenki hakiak oan ba ninia maun. #20:28 Haree Deuteronómiu 25:5. 29Entaun iha maun-alin nain hitu. Mane ba dala ida kaben ho feto ida. Depois nia mate no la iha oan. 30Alin ba dala rua hola ninia maun nia feto faluk nee. Nia mos mate no la iha oan. 31No alin ba dala tolu hola feto faluk nee. No hanesan nee too alin mane ba dala hitu. Sira mate hotu no la iha oan. 32Ikus mai, feto faluk mos mate. 33Entaun iha tempu nebee ema moris hias ona, feto nee mak see nia feen loos? Tanba sira nain hitu kaben ho nia.”

34Jesus hataan ba sira, “Ema iha mundu nee kaben, no foo ema hodi kaben. 35Maibee sira nebee merese atu tama ba tempu#20:35 Lian Gregu dehan aeon. Hanesan mos iha versíkulu 34. iha nebaa, no moris hias hosi mate, sira la kaben no sira la foo ema hodi kaben. 36No sira la bele mate tan. Tanba sira sei sai hanesan ho anju sira. Sira sai Maromak nia oan sira. Tanba sira mak oan hosi tempu moris hias nian. 37Agora, kona ba ema mate bele moris hias ka lae, Moisés hatudu ida nee iha ai badak bainhira nia bolu Nai nudar Abraão nia Maromak, Isak nia Maromak, no Jacó nia Maromak. #20:37 Haree Exodu 3:6. 38Tanba Nia laos Maromak ba ema mate, maibee ba ema moris. Tanba ema hotu moris hela ba Nia.” 39Depois ema eskriba balu hataan, “Mestri, O koalia diak.” 40No sira la brani atu husu pergunta ida tan ba Nia.

See Nia Oan Mak Kristu?

41 #20:41-44 Haree Mateus 22:41-45, Marcos 12:35-37. Jesus dehan ba sira, “Oinsaa sira bele dehan katak Kristu mak David nia oan mane? 42Tanba David rasik dehan iha Livru Salmu Sira,

‘Nai dehan ba hau nia Nai,

“Tuur iha Hau nia liman loos,

43too Hau halo O nia inimigu sira sai fatin ida hodi tau O nia ain.”’#20:43 Hosi Salmu 110:1.

44Nunee David bolu Nia Nai, entaun oinsaa mak Nia David nia oan mane?”

Kuidadu Kona Ba Ema Eskriba Sira

45 #20:45-46 Haree Mateus 23:1-7, Marcos 12:38-40. Bainhira ema hotu rona dadaun, Nia dehan ba Ninia eskolante sira, 46“Kuidadu kona ba ema eskriba sira. Tanba sira hakarak lao ho batina naruk. Sira gosta simu kumprimentus iha merkadu. Sira gosta kadeira nebee diak liu iha sinagoga no fatin importante iha festa. 47Maibee sira tolan feto faluk sira nia uma. No sira finji atu halo orasaun naruk. Ema hanesan nee sei hetan kastigu makaas liu.”

Currently Selected:

Lucas 20: BK

Highlight

Copy

Compare