Roma 6
6
Mate Ba Sala, Moris Ba Maromak
1Entaun ita sei dehan saida? Ita sei kontinua halo sala hodi grasa sei aumenta barak? 2La bele! Oinsaa ita nebee mate ona kona ba sala, bele moris hias iha sala? 3Imi hatene ka lae, katak ita hotu nebee simu ona batizmu iha Jesus Kristu nee simu batizmu iha Ninia mate? 4Ida nee hakoi tiha ona ita ho Nia liu hosi batizmu iha mate, atu nunee, hanesan Kristu moris hias ona hosi mate liu hosi Aman nia glória, ita mos sei lao iha moris foun.
5Tanba se ita ida deit ho Nia iha mate hanesan Ninian, ita sei ida deit ho Nia hodi sai moris hias hanesan Nia. 6Ita hatene katak ita nia aan tuan nee ita prega ona ba krús hamutuk ho Nia, atu nunee ita nia isin sala nian la iha ona. No hosi tempu nee ba oin ita la sai atan ba sala. 7Tanba ema nebee mate tiha ona mak livre ona hosi sala. 8Agora, se ita mate ona ho Kristu, ita fiar katak ita mos sei moris hamutuk ho Nia. 9Ita hatene katak Kristu, nebee moris hias ona hosi mate, sei nunka mate fali. Mate la ukun ona Nia. 10Tanba bainhira Nia mate nee, Nia mate ba sala, dala ida nee hotu ona. Maibee Ninia moris nebee Nia halao nee, Nia moris ba Maromak. 11Nunee mos imi tenki haree imi nia aan hanesan nee: imi mate ona ba sala, maibee imi moris ba Maromak liu hosi Jesus Kristu.
12Tanba nee, keta husik sala ukun iha imi nia isin nebee sei mate, atu nunee imi la halo tuir buat nebee imi nia isin kaan. 13Keta entrega imi nia isin ba sala nudar alat ruma hodi halao hahalok la loos. Maibee entrega imi nia aan ba Maromak, hanesan ema nebee moris hias ona hosi mate. No entrega imi nia isin ba Maromak nudar alat ruma hodi halao hahalok loos. 14Sala sei la ukun tan imi. Tanba imi laos iha lei nia okos, maibee imi iha grasa nia okos.
Atan Ba Moris Loos
15Entaun saida? Ita sei halo sala tanba ita laos iha lei nia okos maibee ita iha grasa nia okos ka? La bele! 16Imi hatene ka lae, katak bainhira imi entrega aan nudar atan ba ema ida atu halo tuir nia, imi sai atan ba nia? Se imi sai atan ba sala, ikus mai imi mate. Se imi sai atan atu halo tuir buat nebee loos, ikus mai imi hetan moris loos. 17Maibee agradese ba Maromak. Tanba uluk imi atan ba sala, maibee agora ho imi nia fuan laran, imi halo tuir hanorin loos nebee imi simu tiha ona. 18Tanba imi sai livre ona hosi sala, nunee imi sai fali atan ba moris loos. 19Hau koalia tuir buat nebee ema hatene, tanba imi nia isin fraku. Uluk imi entrega imi nia isin nudar atan ba buat nebee foer no hahalok nebee kontra lei. No ida nee halo imi kontra lei barak liu tan. Maibee agora imi tenki entrega imi nia isin nudar atan ba moris loos. No ida nee sei halo imi santu.
20Tanba bainhira imi atan ba sala, imi livre hosi moris loos. 21Maibee iha tempu nebaa, imi hetan rezultadu saida hosi hahalok nee, nebee agora halo imi moe? Tanba ikus mai, buat sira nee lori imi ba mate. 22Maibee agora imi sai livre ona hosi sala, no imi sai atan ba Maromak. No rezultadu nebee imi hetan mak moris santu. No ikus mai, ida nee lori imi ba moris rohan laek. 23Tanba sala nia kolen mak mate, maibee Maromak nia prezenti mak moris rohan laek iha ita nia Nai Kristu Jesus.
Currently Selected:
Roma 6: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
