Roma 7
7
Livre Hosi Lei
1Maun-alin sira, hau koalia ba imi nebee hatene lei. Imi hatene ka lae, katak lei domina deit ema bainhira nia moris hela? 2Tanba lei kesi feen hamutuk ho ninia laen bainhira laen nee moris hela. Maibee se nia laen mate, feto nee sai livre ona hosi lei kona ba ninia laen. 3Nunee se laen moris hela no feto nee baa hela hamutuk ho mane seluk, ema sei bolu nia feto nebee halo sala adultériu. Maibee se ninia laen mate ona, nia livre hosi lei nee. Nunee se nia kaben fali ho mane seluk, nia laos feto nebee halo sala adultériu.
4Hanesan nee, hau nia maun-alin sira, imi mos mate ona ba lei liu hosi Kristu nia isin. Nunee imi sai Ninian, nebee moris hias ona hosi mate, atu nunee ita bele foo fuan ba Maromak. 5Tanba bainhira ita moris iha ita nia isin, ita hakarak halo sala, nebee liu hosi lei. No ida nee lori ita nia isin lolon atu foo fuan ba mate. 6Maibee agora ita livre ona hosi lei. Ita mate ona ba buat nee, nebee kastigu ita. Nunee ita bele serví liu hosi dalan foun Espíritu nian, laos liu hosi dalan tuan surat nian.
Lei No Sala
7Entaun ita sei dehan saida? Lei mak sala ka? La bele! Se lei la iha karik, hau sei la hatene kona ba sala. Tanba hau sei la hatene kona ba hahalok nebee kaan se lei la dehan, “O la bele kaan.” 8Maibee sala nee hetan oportunidade liu hosi ukun fuan no kria hahalok kaan oi-oin iha hau nia laran. Tanba bainhira lei la iha, sala mak mate. 9Tanba uluk hau moris ketak hosi lei. Maibee bainhira ukun fuan mai, sala foin moris, no hau mate. 10Ukun fuan nebee tuir lo-loos atu foo moris, ikus mai lori hau ba mate. 11Tanba sala foti oportunidade hosi ukun fuan atu lohi hau. No liu hosi ukun fuan nee, sala oho hau. 12Nunee lei mak santu, no ukun fuan mak santu, loos no diak.
13Entaun, buat nebee diak halo hau mate ka? Lae! Maibee sala mak halo hau mate liu hosi buat nebee diak. Ida nee hatudu katak sala mak sala duni, no liu hosi ukun fuan sala sai aat tebes. 14Tanba ita hatene katak lei mak espíritu nian. Maibee hau mak isin nian nebee faan ona atu sala domina hau. 15Hau la kompriende hau nia hahalok. Tanba buat nebee hau hakarak halo, hau la halo. No buat nebee hau hakribi, ida nee mak hau halo fali. 16Entaun se hau halo buat nebee hau lakohi halo, hau konkorda katak lei mak diak. 17Agora, laos tan hau mak halo ida nee, maibee sala nebee hela iha hau nia laran mak halo ida nee. 18Tanba Hau hatene katak la iha buat diak ida nebee hela iha hau, katak iha hau nia isin. Tanba hau hakarak halo buat diak, maibee hau la konsege atu halo ida nee. 19Tanba buat diak nebee hau hakarak halo, hau la halo. Maibee buat aat nebee hau lakohi halo, ida nee mak hau halo beibeik. 20Se hau halo buat nebee hau lakohi halo, entaun ida nee laos hau mak halo, maibee sala nebee hela iha hau nia laran.
21Nunee hau hetan lei ida, katak bainhira hau hakarak halo buat diak, buat aat mos besik ho hau. 22Tanba hau kontenti ho Maromak nia lei iha hau nia laran. 23Maibee hau haree lei seluk iha hau nia isin nebee funu hasoru lei nebee iha hau nia neon. Lei seluk nee kastigu hau ba lei sala nian nebee hela iha hau nia isin. 24Oh hau nee ema terus duni! See mak salva hau hosi isin mate nee? 25Agradese ba Maromak, liu hosi ita nia Nai Jesus Kristu! Entaun, hau rasik serví Maromak nia lei ho hau nia neon, maibee hau serví lei sala nian ho hau nia isin.
Currently Selected:
Roma 7: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
