য়হোশু 6
6
য়রিহো শহরহিং গিংচপুওয়া
1ইস্রাইলিবি হোকো মাছুকো তামসা য়রিহো শহরকো লাপুংবিহা মেইমসা এনেচাংমি। হাংসুরে বাইরে নাপো জোচা মামুংমি। 2পরমপ্রভুহা য়হোশুহিংয়া জাংয়ে, “কাং, য়রিহো, আকো জাইপু আসা আকো লুইসুকো ম্যারাইক্যইওয়াবিহিংপারাং কা নাকো খুইতা স্যইরোওয়া। 3নাতি আসা নাকো সিপাইবিহা আকু পুরা শহরহিং সাইয়ুতা ইকোইহা হুরারোইমসা তেরোই। সাটুয়ু চোইপা এপারাং তেরোই। 4নীচো পাউবিহা খুইতা পেপনে চুংমসা করারকো সন্দুককো নাগাই নাগাই তেই। সানীয়ুতা নাতি আসা নাকো সিপাইবি নীকোই চোইপা পুরা শহরহিং হুরাকো আসা পাউবিহা পেপনে মুইকো। 5আকো নোইতা আবিহা পেপনেহা উইদাং চোইপা মুইওয়া মুইওয়া জোকো, আকু হিংতানি তাংসা সাডুুংপা ঙাসুকো আসা শহরকো পার্কাবিহা ইপুরোওয়া। আকো নোইতাহা তাংসা সেনাবিহা শহরকো নাপোতা হোকো।”
6য়হোশুহা পাউবিহিং মোউমসা জাংয়ে, “করারকো সন্দুকহিং পুউ, আসা নাবি নীচো পাউবিহা পেপনে পুমসা নাগাই নাগাই হ্যাতু।” 7আত্রংহা আকুহা দিংঙাবিহিং জাংয়ে, “আপনিকো দিংঙাবিহিংয়া পুরা শহরহিং হুরাপোইকো আসা আকুহিংপাহা সেংজাকো করারকো সন্দুককো নাগাই নাগাই ইচো পারা সিপাইবিহিং তেইকো আজ্ঞা জোয়ে।” 8য়হোশুহা ই নুওয়াং দিংঙাবিহিং জাংপুনতেনুকো নোইতাহা নীচো পাউবিহা লুকাকো দাংকো নীচো পেপনে পুউমসা প্রভুসেংজাকো নাগাই নাগাই তেইয়ে, আসা আপনিকো পেপনে মুইমসা নাগাই হ্যায়ে। প্রভুসেংজাকো করারকো সন্দুক পুউওয়াবিহা আবিকো নুনুই হোয়ে। 9সিপাইবিহা পেপনে মুইওয়া পাউবিকো নাগাই তেইয়ে, আসা নুনুইসো তেইওয়া সিপাইবিহা করারকো সন্দুককো নুনুই হোয়ে, আসা পাউবিহা পেপনে মুইমসা তেইয়ে। 10আদো য়হোশুহা আপনিকো দিংঙাবিহিংয়া মাঙাসুকো আসা কা মাজাংনু চোইপা ইয়্যইরে মায়্যইকো তামসা আজ্ঞা জোওয়া নিমগা। 11এপা জোমসারাং আকুহা আকু পারাকো দিংঙাবিহিংয়া প্রভুসেংজাকো করারকো সন্দুক ইকোই পুরা শহরহিং হুরাপোইয়ে। আকো নোইতা আবিহা আপনিকো য়ুংওয়াতা লায়োংয়ে আসা আউতারাং য়ুংপুইয়ে।
12-13আকো জুকুংহা য়হোশুহা হাপকোংসো লোয়ে আসা আকো সাইয়ুকো দিন ত্যাবাপা জোমসা পাউবি আসা সিপাইবিহা ন্যাসারাং শহরকো আরিকোংপে পুরা হুরায়ে। নাগাই নাগই হ্যাওয়া সিপাইকো পারাবি, আকো নোইতাহা করারকো সন্দুক পুউওয়া পাউবি আসা নোইস্যাতাহা নোই-নোই তেইওয়া সিপাইকো পারাবি হোয়ে। আত্রংহা পেপনেহা খ্যাদিংমি। 14আকো সায়ুরে আবিহা পুরা শহরহিং হুরাসোইয়ে আসা আপনিকো য়ুংওয়াতা লাকাপুয়ে। আবিহা সাটুয়ু চোইপা এপারাং জোয়ে।
15সানীয়ুতাহা আবিহা হাপকোং হোহোইনু লোসুয়ে আতাংকো ত্যাবাপারাং পুরা শহরহিং হুরায়ে, আত্রংকো দিন মেংচে আবিহা নীকোই চোইপা আকু শহরহিং হুরায়ে। 16নীকোই হুরাপুনতেনুকো নোইতাহা হাত্রং পাউবি পেপনে মুইদাং, আত্রংহা য়হোশুহা আপনিকো দিংঙাবিহিংয়া সাডিংপা ঙাকো তামসা আজ্ঞা জোয়ে, “পরমপ্রভুহা ই শহরহিংয়া নাকো খুইতা ত্যইপুনতেমি নিও। 17ই শহর আসা ইতা নিওয়া তাংসা সোংসাবি তাংসা পরমপ্রভুহিং চড়াইমসা পুরা দাংপানেরোওয়া। রাহাব নুংনাংরি আসা আকো সা আকো আপনিকো দিংঙাবিহিং মেংচে বাচাইরোওয়া, হাংপাতানাহা আকুহা কাবিকো জাসুস জোকো ওয়াংওয়া দিংঙাহিং ম্যইমসা এপিমগা। 18আদো দাংপুমসা হ্যাপুওয়া সোংসাবিসো নাবিহা তানাং য়ুং, মোকোনাহা আকু দাংপাকো সোতা ত্যইপুনতেওয়া সোংসাবি পুমসা নাবিহা আপনিহিং দাংপারোওয়া, আসা ইস্রাইলিবিকো য়ুংওয়া তাম্বুতা শ্রাপিত বানাইরোওয়া আসা ইহিং সঙ্কষ্টতা পারারোওয়া। 19সুন, জাতাং, কাঁসা আসা চাঁকো য়োটিবিহা প্রভুসেংজাকো সোতাহা পবিত্র নিও। আবিহা প্রভুসেংজাকো ভন্ডারতা সানেরোওয়া।”
20এপা জোমসারাং হাত্রং পাউবি পেপনে মুই, আত্রংহা আকু মুইওয়া হিংতানি দিংঙাবিহা সাডিংপা ঙাসুয়ে আসা শহরকো পার্কাবিহা ইপুয়ে। আকো নোইতাহা তাংসা সিপাইবিহা শহরকো নাপোতা হোয়ে আসা আকু শহরহিংয়া গিংচাপুয়ে। 21তালওয়ারসো শহরতা নিওয়া পোজা, মেমে, ওয়াংটেংটেংগেওয়া, পোজা মেমেবি, ওয়ারাংপুওয়াবি তাংসাহিং আবিহা স্যাপুয়ে। আবিহা পিকা-এতাবি, লুকাবি আসা গাধাবিহিংনে ঙাজ্যইং মেএতো। 22আত্রংহা জাসুস কাম জোওয়া নিহসো এহিংয়া য়হোশুহা জাংয়ে, “আকু নুংনাংরিকো সাতা হোতু আসা আপনিকো প্রতিজ্ঞা জোওয়া সেই আকুহিং আসা আকো সাকো দিংঙাহিং পারা।” 23আবিহা হোমসা রাহাব, আকো আয়ু-আপা ডুূওয়া-এবি আসা লেরা প্যাপ্যাম্যাম্যা তাংসাহিং পারামসা লেয়ে। আকো প্যাপ্যাম্যাম্যা তাংসাকো পামিবিহিং ইস্রাইলিবিকো তোংনাংকো জায়গাতা এনতাপা এপিয়ে। 24আকো নোইতা আবিহা শহরহিংয়া ওংপাপুয়ে আসা ভস্ম জোপুয়ে। সুন, জাতাং, কাঁসা আসা চাঁসো বানাইওয়া সোংসাবিহা সেংজাকো ভান্ডারতা পায়ে আসা আকু ল্যামসা দোসরা তাংসা সোংসাবিহা ভস্ম জোপুয়ে। 25আদো য়হোশুহা রাহাব আসা আকো তাংসা দিংঙাবিকো প্রাণহা বাচাইপিয়ে, হাংপাতানাহা আকুহা য়রিহোতা নিংপুওয়া নিহসো জাসুসহিংয়া ম্যইমসা এপিমগা। (হিনিকো দিন চোইপা আকো চেংওয়া-চেমেবিহা ইস্রাইলতা য়ুংদিংমি নিও।)
26আত্রংহা য়হোশুহা ইচো টেবো চেতাউনি পিচায়ে, “হাংসু য়রিহো শহরহিং ন্যাসারাং বানাইকো কশিষমি জোনাহা আকো তোইতাহা প্রভুসেংজাকো শ্রাপ হুইরোওয়া।
হাংসু আকু শহরকো হুটিং চু, আকো ডেসোইওয়া চেংওয়াহা সিপুরোওয়া,
হাংসু আকো শহরকো মাটা লাপুং বানাই, আকো চিংসোইওয়া চেংওয়া সিপুরোওয়া।”
27এপা জোমসারাং সেংজাহা য়হোশুহিংপা য়ুংয়ে আসা আকো নুওয়াংহা তাংসা দেশতা বেইপুয়ে।
Currently Selected:
য়হোশু 6: TXO
Highlight
Copy
Compare
Share
Want to have your highlights saved across all your devices? Sign up or sign in
2026 Bible Society of India in association with India Evangelical Mission