য়হোশু 7
7
আকানকো পাপ
1পরমপ্রভুহিং চড়াইনেওয়া হাই সোংসারে য়রিহোসো মোপুকো তামসা সেংজাকো ইস্রাইলিবিহিং পিচাওয়া আজ্ঞাহা পুরা মাজিংতো। ইচো আকান মিং নিওয়া দিংঙাহা আকু আজ্ঞাহা মামানেতো। সেংজাহা ইস্রাইলিবিকো তোইতাহা সিওপারাং সেদ্রাংপুয়ে। (আকানহা কর্মিকো চেংওয়া আসা জব্দিকো চুওয়া নিমগা। আকুহা য়হুদাকো জিরিকো জেরহো চিমাকো নিমগা।)
2য়হোশুহা লেরা দিংঙাবিহিংয়া বেথ-আবন জায়গাকো আবেইকো বেথেলকো নুব্যা কাটুতা নিওয়া এহ মিং নিওয়া শহরতা আকো নাপোকো নুওয়াং কোইকো আজ্ঞা জোমসা নিংপুয়ে। 3আকু কাম জোপুনতেনুওয়া আবিহা লায়োংমসা য়হোশুহিং জাংয়ে, “য়াংবি তাংসা এহ শহরহিং হমলা জোকোহা দরকার মোতো। দুই হাজার কিতা তিন হাজার মেংচে দিংঙাবিহিং নিংপু। আউতা লুইসুকোহা তাংসা সিপাইবিহিং মানিংপুগ্যই। আকু শহরহা সিওপা টেবো মোতো।” 4আকো সোতা তিন হাজার কাচি ইস্রাইলিবি হোমসা আকু শহরহিংয়া হামলা জোয়ে, আদো আবিহা পোঙামসা নুনুই ওয়েংনেয়ো। 5এহ শহরকো দিংঙাবিহা আবিহিংয়া শহরকো লাপুংসোহা লুংটুই তিংমসা এওয়া জায়গা চোইপা ঘীপুয়ে আসা য়্যাগ্যইসো লেতা উইদাংনুওয়া ছত্তিশ জনা কাচি ইস্রাইলিবিহিংয়া স্যাপুয়ে। এপা জিংপুনুওয়া ইস্রাইলিবিহা আপনিকোতা নিওয়া সাহসবিরে য়াংপাপুয়ে আসা আবিহা চুসুংপুমসা ফিপুয়ে।
6য়হোশু আসা ইস্রাইলকো অগুওয়াবিহা শোক জোমসা আপনি আপনিকো আংদুং ছিসুয়ে, প্রভুসেংজাকো করারকো সন্দুককো আবেইতা চুনুইসুয়ে আসা আপনিকো তুংসিংকো নুওয়াং হিংপামসা পোরোতা ধুলো ন্যামসা জিরুং চোইপা আকু মোংটোতারাং লেসোইয়ে। 7আসা য়হোশুহা জাংয়ে, “ও পরমপ্রভু! হাংপা কাবিহিংয়া দিব্যা পারামগা? এমোরিবিকো খুইসো স্যাকোগা? কাবিহিং দাংপাকোগা? হাংপাসা কাবিহা য়র্দন নুব্যাতা য়ুংকোহা গাগ্রুপা মাতামগা? 8এপারাং ইস্রাইলিবিহা দুসমানবিহিংপা পোঙামসা লায়োংপুনুওয়া কা হাং জোকোগা, প্রভু? 9কনানীবি আসা ই দেশতা নিওয়া দোসরা তাংসা ই নুওয়াং হিংরোওয়া। আবিহা কাবিহিংয়া য়োইসুমসা স্যাপুরোওয়া। আকো নোইতাহা আপনিকো ইজ্জতহিং বাচাইকোহা নাতিহা হাং জোকোগা?”
10পরমপ্রভুহা য়হোশুহিংয়া জাংয়ে, “লো! হাংপা এপা মোংটোতা লেদিংগা? 11ইস্রাইলহা পাপ জোমি নিও। কাহিংপা জোওয়া প্রতিজ্ঞা হানি আবিহিং কা আজ্ঞা জোমি নিমমে, আকুহা আবিহা ভঙ্গ জোমি নিও। কাহিং চড়াইকো আজ্ঞা পিচাওয়া লেরা সোংসাবি আবিহা এচাপুমি নিও। আবিহা আকু সোংসাবিহা কুচাপুমি নিও, আসা আবিহা পোসুমসা আপনিকো সোংসাবিহিংপা চিত্তা এমি নিও। 12আকো সোতা ইস্রাইলিবিহা আপনিকো দুসমানকো বিরোদ্ধতা সাডুংপা জিংমক্যইতো। দুসমানকো নাগাইসো আবিহা ক্যানেরোওয়া, হাংপাতানাহা আবিহা আপনিবিরাং দাংপুমসা হ্যাপুওয়া দন্ডতা পরেমি নিও। মাপুকো তামসা আজ্ঞা জোওয়া, আদো নাবিহা পুমসা এওয়া সোংসাবিহিংমি নাবি মাদাংপানাহা কা নাবিহিংপা মায়ুংরোওয়া।
13লো! দিংঙাবিহিং শুদ্ধ বানাই আসা কুং নাগাই পারাকো তৈয়ার জো। ‘আবিহিং জুকুং তৈয়ার য়ুংকো জাং, হাংপাতানাহা কা পরমপ্রভু ইস্রাইলকো সেংজাকো জাংনেওয়া নুওয়াংহা এপা নিও, ও ইস্রাইল, নাতিহিংপাহা এপা জিংওয়াহা হাসে ইচো সোংসা নিংগা হানিহিং নাশ জোনেকোমমে। আকো সোংসাবি মোয়েংপানু চোইপা নাতিহা নাকো দুসমানহিংপা লুইসুকো মাছু।’ 14আকো সোতা আবিহিং জাং, কি জুকুং হাপকোংহা আবিহা জিরি জিরিকো জিংমসা লেকো। কুং জেংওয়া জিরি, চিমা-চিমাকো হিসাবসো নাগাই লেকো। আউসোহা কুং জেংওয়া চিমা, প্যাপ্যাম্যাম্যা-প্যাপ্যাম্যাম্যাকো হিসাবসো নাগাই লেকো। কুং ন্যাসারাং জেংওয়া প্যাপ্যাম্যাম্যাকো দিংঙাবিহা ইচো ইচো জোমসা নাগাই লেকো। 15আকো নোইতাহা হানি দিংঙাহিং ওয়েংপাকোমে, আসা হাংসুকোতা আকু শ্রাপিত সোংসাবি নিকোমে, আবিহিংয়া আপনিকো প্যাপ্যাম্যাম্যা আসা তাংসা সোংসাবিহিংপা মেহতা ওংপাপুরোওয়া, হাংপাতানাহা আকুহা ইস্রাইলতা ইচো টেবো লেফেনেওয়া নুওয়াং পারামি নিও আসা কাহিংপা করার জোওয়ারে ভঙ্গ জোমি নিও।”
16আকো জুকুংহা য়হোশুহা জিরি জিরিকো ইস্রাইলিবিহিং নাগাই পারায়ে আসা আবিসোহা য়হুদাকো জিরিহিং ওয়েংপায়ে। 17য়হুদাকো জিরিহিং চিমা-চিমাহিং ওয়েংপাসা নাগাই পারায়ে আসা আউসোহা জেরহকো চিমাহিং নাগাই পারায়ে আসা আউসোহা জব্দিকো প্যা্প্যাম্যাম্যাহিং ওয়েংপায়ে। 18আত্রংহা জব্দিকো প্যাপ্যাম্যাম্যাকো পোজা দিংঙাবি ইচো ইচো জোমসা নাগাই পারায়ে আসা আবিকো প্যাকোতাহা জব্দিকো চুওয়া আসা কর্মিকো চেংওয়া আকানহিং ওয়েংপায়ে। 19য়হোশুহা আকুহিংয়া জাংয়ে, “চেংওয়া, পরমপ্রভু ইস্রাইলকো সেংজাকো নাগাইতা ইতা কাহিং আজিপ্পা জাং, আসা দোষ মোতো তামসা সাবিত জো। নাতিহা হাং জোংগা, আকুহা কাহিং জাং। আকুহা কুং নাগাইতা ম্যইকো কশিষ মোজো।”
20আকানহা জাংয়ে, “আজিপ্পারাংগা, ইস্রাইলকো প্রভুসেংজাকো বিরোদ্ধতা কা পাপ জোমি নিও। কাহা অপরাত জোয়ে, 21য়াংবিকো দখল জোওয়া সোংসাবিতাহা কাহা ইচো জেজেংক্যইওয়া বেবিলোনিয়া দেশতা বানাইওয়া আংদুং আসা দুই কেজি কাচি জাতাং আসা আধা কিলোরোমা আইংসি সিওপা সুনকো য়োতি দোয়ে। কাহা এসেপাকো মিচপুয়ে কি কাহা আকুহিংয়া এচাপুয়ে। আকুহা কুং য়ুংওয়া তাম্বুকো হানিরোমা লিতা জাতাং লিওয়াতা নাতিহা দোসুরোওয়া।” 22আকো সোতা য়হোশুহা ইচো নিহসো দিংঙাবিহিং নিংপুয়ে। আবিহা তাম্বুতা হোয়ে আসা আউতাহা আকু সোংসাবি আসা জাতাংহা তাংসারোমা লিতা এমসা লিতেওয়া দোসুয়ে। 23আকুহা আবিহা তাম্বুসো নোপামসা পায়ে আসা য়হোশু আসা তাংসা ইস্রাইলিবিকোতা সারেমসা প্রভুসেংজাকো নাগাইতা এয়ে। 24য়হোশু আসা তাংসা ইস্রাইলিবি য়ুসুমসা আকান, আকু জাতাং, আংদুং, সুনকো য়োতি, আকানকো চেংওয়া-চেমেবি, পিকা-এতাবি, গাধা আসা লুকাবি, আকো তাম্বু আসা লেরা তাংসা পুংজিবিপারাং প্যইপুয়ে আসা আকু তাংসাহিং আকোর জায়গাতা পুরায়ে। 25আসা য়হোশুহা জাংয়ে, “নাতিহা হাংপা কাবিকো তোইতা বিপদ পারামগা? পরমপ্রভুহা নেহা নাকো তোইতা বিপদ পারারোওয়া।” আত্রংহা তাংসা দিংঙাবিহা আকানহিংয়া লুংটুইসো টোমসা স্যাপুয়ে। আবিহা আকো সাকো দিংঙাবি আসা পুংজিবিকো তোইতারে লুংটুই টোয়ে আসা ওংপাপুয়ে। 26আবিহা আকো সিপুওয়া জুপাকো তোইতাহা উইসে লুংটুইবি তিংসুয়ে, আকুহা হিনি চোইপা নিকোরে নিও। আকো সোতারাং আকু জায়গাহিংয়া বিপদকো জায়গা তামসা জাংমগা। আকো নোইতাহা প্রভুসেংজাকো সেদ্রাংহা তিমেপা জিংপুয়ে।
Currently Selected:
য়হোশু 7: TXO
Highlight
Copy
Compare
Share
Want to have your highlights saved across all your devices? Sign up or sign in
2026 Bible Society of India in association with India Evangelical Mission