য়হোশু 8
8
এহ শহরহিং গিংচাওয়া
1পরমপ্রভুহা য়হোশুহিংয়া জাংয়ে, “তাংসা লুইসুকো ম্যারাইক্যইওয়া দিংঙাবিহিং পুরামসা এহ শহরহিং আক্রমন জোয়াতু। মাচ্ছুংগে আসা লোচোপেংগেংপা মাজিংগ্যই। কা নাতিহিংয়া এহ শহরকো জাইপু, আকো প্রজা আসা শহরকো তোইতা জিয়োপারোওয়া আসা আকু দেশহিংয়া নাকো খুইতা পিচারোওয়া। 2য়রিহো আসা আকো জাইপুহিং হাং জোমমে, এপারাং এহ শহরকো জাইপুহিংনে জো, আদো হির্মাহা আকো সোংসাবি আসা এতা পিকাবি আপনিকো সোতা এচা। আকু শহরহিং ঝুকাইমসা নোইস্যাসো আক্রমন জোকো তৈয়ার জো।”
3আকো সোতা তাংসা লুইসুওয়া দিংঙাবিহিং পুরামসা এহ শহরতা হোকো য়হোশুহা তৈয়ার জিংয়ে। আকুহা আপনিকো তাংসারোমা এনতা-এনতাওয়া সিপাইবিকো পারাসো তিশ হাজার সিপাইবিহিং জেংয়ে, আসা আবিহিংয়া লিসুং নিংপুয়ে। 4আকুহা এপা জিংওয়া আজ্ঞা জোয়ে, “শহরকো নোইস্যা কাটুতা হোমসা গুংওয়াকো, আদো সিওপা তানাংহা মাহ্যা, আদো আক্রমন জোকো তৈয়ার য়ুং। 5কা আসা কুং দিংঙাবিহা শহরকো আবেইতা লেরোওয়া। হাত্রং এহকো দিংঙাবি কাবিহিং ঘীপামসা লে, আত্রংহা কাবিহা নাগাইকো ক্যামি ত্যাবাপা ক্যারোওয়া। 6আবিহা কাবিহিংয়া ঘীরোওয়া আসা এপারাং কাবিহা আবিহিংয়া শহরসো তানাং পারারোওয়া। নাগাইকো ত্যাবাপা কাবিহা আবিকোসো ক্যাদিংয়ো তামসা আবিহা নোরোওয়া। 7আত্রংহা নাবিহা গুংদিংওয়াকো জায়গাসো নোমসা শহরহিং আক্রমন জোকো জো। পরমপ্রভু নাকো সেংজাহা আকু শহরহা নাবিহিং পিচারোওয়া। 8শহর আক্রমন জোপুমতেনুওয়া প্রভুসেংজাকো আজ্ঞা সেই আকুহিংয়া মেহ চুংপুউ। নাবিহিংয়া ইরাং আজ্ঞা নিও।” 9এপারাং য়হোশুহা আবিহিং নিংপুয়ে আসা আবিহা আপনিবিরাং গুংওয়া জায়গাতা হোমসা খুইয়ায়ে। আকু জায়গাহা এহ শহরকো দিব্যা কাটুতা এহ আসা বেথেল শহরকো প্যাকোতা পরেয়ে। য়হোশুহা আত্রংকো লিসুংহা তাম্বুতারাং সময় পেংপাপুয়ে।
10আকো জুকুংহা য়হোশুহা হাপকোংসো লোমসা লুইসুকো ম্যারাইওয়া দিংঙাবিহিং জমা জোয়ে। আকো নোইতাহা আকু আসা ইস্রাইলকো অগুওয়াবিহা মাটা লুইসুওয়াবিহিং পুরামসা এহ শহরতা হোয়ে। 11আকুহিংপা নিওয়া লুইসুওয়া দিংঙাবিহা শহরকো মাটা লাপুং কাটুতা হোয়ে আসা দ্যাম্যা কাটুতা তাম্বু বানাইয়ে। আবি আসা এহ শহরকো প্যাকোতাহা ইচো ওয়াংবোই জায়গা নিমি। 12পাঁচ হাজার কাচি দিংঙাবি পুরামসা আকুহা এহ আসা বেথেলকো প্যাকোতা শহরকো দিব্যা কাটুতা ম্যইমসা এয়ে। 13লুইসুকো তৈয়ার জোমসা লুইসুওয়া মাটা দিংঙাবিহিংয়া শহরকো দ্যাম্যা কাটু এয়ে আসা দোসরা দিংঙাবিহিংয়া দিব্যা কাটু এয়ে। আত্রংকো লিসুংহা য়হোশুহা ওয়াংবোইতারাং য়ুংতেয়ে। 14এহ শহরকো জাইপুহা য়হোশুকো দিংঙাবিহিং তিংতানি সেন্নেপা তৈয়ার জোয়ে। আকুহা আপনিকো তাংসা দিংঙাবিহিংয়া আকু নাগাইকো জায়গা অরাবাতারাং ইস্রাইলিবিহিংপা লুইসুকো নাগাই গ্যইয়ে। নোই কাটুসো আপনিকো তোইতা আক্রমন জিংরোওয়া তাওয়া আবিহিংয়া সিদারাং ম্যইচ্যইতো। 15য়হোশু আসা তাংসা ইস্রাইলিবিহা ক্যামবেপা জোমসা চিচ্ছোওয়া বার্পুইবিরিতা ঠুইপুমসা হোয়ে। 16শহরকো তাংসা পোজা দিংঙাবিহিংয়া আবিহিং ঘীকো তাওয়া আজ্ঞা জিংওয়া নিমি। আবিহা য়হোশুহিং ঘীপুমসা হোদিংনুওয়া শহরসো তানাং জিংপুয়ে। 17এহ আসা বেথেলকো তাংসা পোজাবিহা ইস্রাইলিবিকো নুনুই থুইপুমসা শহরহা চিচ্চোপুয়ে। আকু শহরহিং কাংওয়াহা হাংসুরে মাতাপা জিংপুয়ে।
18আত্রংহা পরমপ্রভুহা য়হোশুহিংয়া জাংয়ে, “নাকো লেংজা এহ শহর কাটুতা তোরোইমসা ন্যাপা, কা আকু শহরহিংয়া নাকো খুইতা পিচাদাংয়ো।” য়হোশুহা এপারাং জোয়ো। 19আকু খুই তোরোইতানি গুংদিংওয়া দিংঙাবিহা নোপামসা শহরতা হোয়ে আসা আকুহিংয়া আক্রমন জোপুইয়ে। আকো নোইতা সেন্নেপা মেহসো ওংপাপুয়ে। 20এহ শহরকো পোজা দিংঙাবি নোই ল্যামসা কাংনুওয়া এহ শহরসোহা মোধুইহা ডিংবাতা হোদিংওয়া তিংয়ে। আবিহা ক্যাকোহা হাইরে ন্যাতা মাতাপা জিংপুয়ে, হাংপানাতাহা চিচ্চোওয়া বার্পুইবিরিবিতা ক্যাপুমসা হ্যাওয়া ইস্রাইলি লুইসুওয়াবিহা তুইপেং আবিহিংয়া হোমলা জোপুয়ে। 21দোসরা পারাকো দিংঙাবিহা শহরহিং আক্রমন জোমসা শহরহিং চুংপুওয়া তিংমসা য়হোশু আ্সা আকো দিংঙাবিহা তুইপেং এহকো শহরকো দিংঙাবিহিং স্যাপুয়ে। 22শহরতা দেকাওয়া ইস্রাইলিবিরে লুইসুকো নোপায়ে। এপা জোমসারাং এহ শহরকো পোজা দিংঙাবিহা তাংসা ইস্রাইলিবিকো অধিনতা পরেমসা সিপুয়ে। হাংসুরে ক্যাচা মামুংতো, 23আদো এহকো জাইপু ল্যামসাহা দোসরা হাংসুরে বাচেমক্যইতো। আকুহিংয়া প্যইপুমসা য়হোশুকোতা পুরায়ে।
24আপনিহিং ঘীপুমসা চিচ্চোওয়া বার্পুইবিরিতা পুরাওয়াবিহিংয়া ইস্রাইলিবিহা ইচো ইচো জোমসা স্যাপুয়ে। আকো নোইতা আবিহা লাকামসা এহ শহরতা হোয়ে আসা আউতা নিওয়া তাংসাহিং স্যাপুয়ে। 25-26য়হোশুহা আপনিকো লেংজাহা এহ শহর কাটুতা তোরোইমসা ন্যাপায়ে। আউতা নিওয়া তাংসা দিংঙাবি মাসিনু চোইপা আকুহা আকু লেংজাহা লিতা মাহুইপাতো। আত্রংকো দিনহা এহ শহরকো দিংঙাবিহা বারো হাজার পোজা দিংঙাবি আসা মেমেবিরে সিপুয়ে। 27প্রভুসেংজাকো য়হোশুহিং জাংমি ত্যাবাপা ইস্রাইলিবিহা শহরতা আক্রমন জোওয়া পিকা-এতাবি আসা সোংসাবিহা আপনি আপনিরাং এচাপুয়ে। 28য়হোশুহা এহ শহরহিংয়া মেহসো ওংপাপুয়ে। আকুহা হিনি চোইপারাং এপারাং ওংপুওয়া নিকোরে নিদিংয়ো। 29আকুহা এহকো জাইপুহিংয়া জিরুং চোইপা ইতেং সিংতেংতা থ্যইমসা এপুয়ে। সানি হুইপুনুওয়া আকুহা জাইপুকো সিপুওয়া জুপাহিংয়া ওয়েংপাকো আজ্ঞা জোয়ে আসা আবিহা সিপুওয়া জুপাহিংয়া শহরকো লাপুংতা বাডোইপুয়ে আসা উইসে লুংটুইবিসো য়ুইমসা সিপুওয়া জুপাহিংয়া তুংপুয়ে আসা আকু লুংটুইসো য়ুইওয়া লুংটুইবিহা নেচোইপা আউতারাং নিও।
মোসাকো লাতেওয়া লিংপাংহা য়হোশুহা তাংসাকো প্যাকোতা পড়াইওয়া
30আকো নোইতাহা য়হোশুহা এবাল য়্যাগ্যইতা পরমপ্রভু ইস্রাইলকো সেংজাকো সোতা ইচো ভেদি বানাইয়ে। 31আকু ভেদিহা প্রভুসেংজাকো ডেইয়া মোসাকো ইস্রাইলিবিহিং পিচাওয়া আদেশ সেই আকুহা হাত্রংরে চাসো মাঠেওয়া লুংটুইসো বানাইয়ে। মোসাকো লিংপাংতা জাংওয়া সেই আকু ভেদিতাহা আবিহা ওংপাওয়া বলি পিচামসা প্রভুসেংজাহিং আরাধনাকো বলি চড়াইয়ে। 32আউতাহা য়হোশুহা ইস্রাইলিবিকো দোংনাংতারাং লুংটুইসো কোপেমসা মোসাকো লাওয়া লিংপাংবি নক্কলি বানাইয়ে। 33ইস্রাইলিবি, আবিকো অগুওয়াবি, আবিকো ডেইয়াবি, ন্যায় জোওয়াবি আসা আবিকো প্যাকোতা য়ুংওয়া বিদেশীবিপারাং প্রভুসেংজাকো করারকো সন্দুককো নিহদ্যা কাটুতা, সন্দুক পুউওয়া লেবী পাউবিকো আবেইতা জায়ে। আদিরোমা সিওপা দিংঙাবিহা আপনিকো জুপাহা গিরিজ্জিম য়্যাগ্যই কাটুতা ন্যাপামসা জাসুয়ে আসা লেরা দিংঙাবিহা এবাল য়্যাগ্যইকো কাটুতা ন্যাপামসা জাসুয়ে। আশিষ য়ুচাকো সময়তাহা এপা জোকোহা প্রভুসেংজাকো ডেইয়া মোসাহা ইস্রাইলিবিহিংয়া আজ্ঞা জোওয়া নিমগা। 34আত্রংহা য়হোশুহা তাংসা লিংপাংবি, আকো আশিষ আসা শ্রাপবি তাংসা পবিত্র লিংপাংকো হিগাতা লাওয়া সেই সাডুংপা ঙামসা পড়াইয়ে। 35হাসে ইচো নুওয়াং মোসাহা আজ্ঞা পিচামি নিমমে, আকু আজ্ঞাবিতাহা য়হোশুহা ইস্রাইলকো তাংসা সমাজকো দিংঙাবিং, মেমেবিহিং, পোজাবি আসা চেংচুবিহিং আসা আবিহিংপা চিত্তা য়ুংওয়া পরদেশীবিহিংনে য়হোশুহা পড়াইমসা হিংপায়ে।
Currently Selected:
য়হোশু 8: TXO
Highlight
Copy
Compare
Share
Want to have your highlights saved across all your devices? Sign up or sign in
2026 Bible Society of India in association with India Evangelical Mission