য়হোশু 9
9
গিবোনি জ্যাবিহা য়হোশুহিং ছল জোওয়া
1ইস্রাইলকো জিয়োওয়া নুওয়াংহা য়র্দনকো দিব্যা কাটুতা নিওয়া তাংসা ই জাইপুবি, হিত্তি, এমোরি, কনানী, পরিজ্জি, হিব্বি, আসা য়বুসিবি তাংসা হিংয়ে। আকু নুওয়াংহা য়্যাগ্যইকো তোইতা, আকো ডিব্যাতা আসা ভুমধ্য় ঝাহাদিকো আরিকো ওয়াংবোইকো দ্যাম্যা কাটুকো লেবনান চোইপা মেইপুয়ে। 2জাইপুবিহা তাংসা ইচো জিংমসা য়হোশু আসা ইস্রাইলিবিকো বিরোধতা লুইসুকো আপনি আপনিকো সিপাইবিহিং ইচো জায়গাতা জমা জোয়ে।
3আদো য়রিহো আসা এহ শহরতাহা য়হোশুহা হাং-হাং জোমমে, আকু নুওয়াংহা গিবোনকো দিংঙা হিব্বিবিহা হিংয়ে, 4আসা আকুহিং ল্যইপাকো নির্ণয় জোয়ে। আসা আবিহা হোমসা হাইক্রি চাওয়া-আংওয়া মোকায়ে আসা আপনিকো গাদাবিকো তোইতা য়াইপুনতেওয়া বোড়াবি আসা তোওয়া বেকোংকো জিয়োবিতা য়ুবি ওয়্যায়ে। 5আপনিবিরাং য়াইপুওয়া আংদুং আসা তোওয়া কোরোংবি লুউয়ে। আবিকো পুউদিংওয়া চাওয়া-আংওয়ারে সেংপুমসা মুউসাই ওয়াংপুনতেওয়া নিমি। 6আকো নোইতা আবিহা গিলগালতা ইস্রাইলিবিকো তাম্বুতা হোমসা য়হোশু আসা ইস্রাইলকো দিংঙাবিহিং জাংয়ায়ে, “কাবিহা তানাংকো দেশসো ওয়াংমি। কাবিহিংপা সন্ধি জোপি তামসা কাবি পাচাইচারোওয়া।”
7আদো ইস্রাইলকো দিংঙাবিহা জাংয়ে, “হাংপা কাবিহা নাবিহিংপা সন্ধি জোকোগা? সায়েত নাবিহা তোংনাংতারাং য়ুংমদোওয়া।”
8আবিহা য়হোশুহিংয়া জাংয়ে, “কাবিহা নাকো সেওয়া জোকো তৈয়ার নিও।”
য়হোশুহা উইয়ে, “নাবিহা হাংসুগা? হানিসো ওয়াংমগা?”
9আত্রংহা আবিহা আকুহিংয়া জাংয়ে, “উটকেওয়া, কাবিহা তানাংকো দেশসো ওয়াংমগা, হাংপাতানাহা কাবিহা নাবিকো পরমপ্রভু সেংজাকো বিষয়তা হিংমি নিও। আকো মিশ্রতা জোওয়া তাংসা নুওয়াং, 10আসা য়র্দনকো নুব্যা কাটুকো নিহসো জাইপুবি, হেশ্বোনকো জাইপু সিহোন আসা অস্তারোততা য়ুংওয়া বাশানকো জাইপু অৗগহিংপা হাং-হাং জোমি নিমমে, আকু তাংসা কাবি হিংমি নিও। 11কাবিকো অগুওয়াবি আসা তাংসা দেশকো দিংঙাবিহা কাবিহিং হাইক্রি চাওয়াবি তৈয়ার জোমসা, ইতা ওয়াংমসা নাবিহিংপা দোসপোংকো নিংপুমগা। নাবিকো সেওয়া জোকো আসা কাবিহিংপা ইচো সন্ধি-পত্র জোকো সোতা নাবিহিং পাচাইচাকো নিংপুমি নিও। 12কাবিকো পাওয়া কোব্রেং কাং। কাবি সা হুইতেমসা নাতিহিং দোসপোংকো ওয়াংনুওয়া আকুহা লোউচাক্যইপারাং নিমগা, আদো কাং, সেংপুমসা ইহা নেহা মুসাই ওয়াংপুনতেয়ো। 13ই বেকোংকো জিয়োবিতা য়ুবি ওয়্যানুওয়া ইহা চুবেরাং নিমগা, আদো কাং, ইহা টেপতেয়ো। ন্যাতা তানাং জিংওয়াকো সোতা কাবিকো আংদুং আসা কোরোংবিহা য়্যাইপুনতেয়ো।”
14ইস্রাইলকো দিংঙাবিহা আবিকোসো হাইক্রি চাওয়া-আংওয়াবি য়ুচায়ে। আকো বিষয়তাহা পরমপ্রভুসোহা সল্লা মালাংতো। 15য়হোশুহা গিবোনকো দিংঙাবিহিংপাহা ব্যারো জোকো সন্ধি-পত্র বানাইয়ে আসা আবিহিং য়ুংকো পিচাপুয়ে। ইস্রাইলকো অগুওয়াবিহা সন্ধি পালন জোরোওয়া তাওয়া প্রতিজ্ঞা জোয়ে।
16সন্ধি-পত্র জোওয়া সাসুংয়ুকো নোইতাহা আকু দিংঙাবিহা আবেইকো দেশতা য়ুংওয়াবিরাংগুং তামসা ইস্রাইলিবিহা সিদা চ্যইয়ে। 17আকো সোতা ইস্রাইলিবিহা নোয়ে আসা সাসুংয়ুকো নোইতাহা আকু দিংঙাবিকো য়ুংওয়া শহরবি গিবোন, কপিরা, বেরোত আসা কির্য়ত-য়ারিমতা দেয়োংয়ে। 18আদো ইস্রাইলিবিহা আবিহিংয়া স্যামক্যইতো, হাংপাতানাহা আবিকো অগুওয়াবিহা আকু দিংঙাবিহিংপাহা পরমপ্রভু ইস্রাইলকো সেংজাকো মিংতা পবিত্র প্রতিজ্ঞা জোওয়া নিমগা। তাংসা দিংঙাবিহা অগুওয়াবিহিংপাহা ই নুওয়োংকো বিষয়তা ন্যাক্যানুকুপা য়্যইসুয়ে; 19আদো অগুওয়াবিহা এপা জবাব পিচায়ে, “কাবিহা নাবিহিংপাহা পরমপ্রভু ইস্রাইলকো সেংজাকো মিংতা পবিত্র প্রতিজ্ঞা জোয়ে। নেহা য়াংবিহা আবিহিংয়া হাইরে খতি জোমক্যই। 20কাবিকো প্রতিজ্ঞা জোওয়াকো য়াংবিহা আবিহিংয়া য়ুংকোহা পিচানেরোওয়া, মোকোনা সেংজাহা য়াংবিহিংয়া দন্ড পিচারোওয়া। 21আবিহা ইতা য়ুংচপুকো, আদো আবিহা য়াংবিকো সোতা সেংঙে বোওয়া আসা তি হুইওয়া কাম জোনেরোওয়া।” অগুওয়াবিহা এপা জিংওয়া সুজাও পিচায়ে।
22য়হোশুহা গিবোনতা য়ুংওয়াবিহিংয়া আপনিকো নাগাইতা পারামসা আবিহিংয়া উইয়ে, “নাবিহা ইতা আবেইতা য়ুংমুং, আদোরে হাংপা তানাংসো ওয়াংমি তামসা কাবিহিং ল্যহপামগা? 23নাবিহা এপা জোওয়াকো সোতা সেংজাহা নাবিহিংয়া শ্রাপ পিচামি নিও। নাকো চেংওয়া চেমেবিহা হাত্রংদো ডেইয়া-ডেইয়ামেবি জিংমসা য়ুংনেরোওয়া আসা কুং সেংজাকো পবিত্র জায়গাতা সেংঙে বোওয়া আসা তি পুউনেওয়া জিংনেরোওয়া।”
24আবিহা জবাব পিচায়ে, “উটকেওয়া, কাবিহা এপা জোয়ে, হাংপাতানাহা কাবিহা সিদা চ্যইয়ে, কি নাবিহা সিওপারাং নাগাই গ্যইপানুওয়া ই তাংসা দেশ নাবিহিং আসা ইতা য়ুংওয়া দিংঙাবিহিং দাংপাকো তামসা নাবিকো সেংজাহা আপনিকো ডেইয়া মোসাহিং আজ্ঞা জোওয়া নিমগা। কাবিহা নাবিকোসো চুসুংপুয়ে, আপনিকো প্রাণকো সোতারে চুসুংপুয়ে। আকো সোতা কাবিহা এপা জোপুমগা। 25নেহা কাবিহা নাকো খুইতা নিও, নাতিহিং হেপা এনতাপা জিংমমে, আকুরাং কাবিহিংপা জোপুই।” 26আকো সোতা য়হোশুহা ই কাম জোয়ে, আকুহা আবিহিংয়া রক্ছা জোয়ে আসা ইস্রাইলকো দিংঙাবিকো খুইসো আবিহিংয়া সিকো মিচাতো। 27আদো আকুহিংপাহা আকুহা আবিহিংয়া ডেইয়া-ডেইয়ামেবি বানাইয়ে, আসা প্রভুসেংজাকো ভেদি আসা ইস্রাইলকো দিংঙাবিকো সোতা সেংঙে বোওয়া আসা তি পুইওয়া বানাইয়ে। পরমপ্রভুহা আপনিকো আরাধনা জায়গা তামসা জেংওয়া জায়গাতা হিনি চোইপা আবিহা আকু জায়গাতা আকু কামরাং জোদিংয়ো।
Currently Selected:
য়হোশু 9: TXO
Highlight
Copy
Compare
Share
Want to have your highlights saved across all your devices? Sign up or sign in
2026 Bible Society of India in association with India Evangelical Mission