ᐅᐸᓓᑭᔅ ᒫᑎᐤ 13
13
ᐁ ᐋᑕᓗᑲᓀᑦ ᐅᐗᓴᓶᐱᓂᑫᐗ
(ᒫᕐᒃ 4:1–9; ᓘᒃ 8:4–8)
1ᐁᐗᑯ ᑫᔮᐸᒡ ᐁ ᑭᔑᑳᓕᒃ ᒋᓴᔅ ᑮ ᐅᒋ ᐗᓚᐎᐤ ᐙᔅᑳᔨᑲᓂᒃ, ᒋᑭᐯᒃ ᒫᑲ ᑭᒋᑲᒦᒃ ᑮ ᐊᐱᐤ᙮ 2ᑮ ᒪᐗᓴᑯᓈᑎᑯ ᒫᑲ ᓈᔅᐱᒡ ᒥᔮᒪᐎᒥᒉᑎᓕᒋ ᐃᓕᓕᐗ, ᐌᒋ ᑮ ᐳᓯᑦ ᓈᐱᒀᓂᒃ, ᐁᑯᑕ ᒫᑲ ᐁᐱᑦ; ᒥᓯᐌ ᒥᔮᒪᐎᒥᒉᑎᒋᒃ ᐃᓕᓕᐗᒃ ᒫᑲ ᒋᑭᐯᒃ ᑮ ᓂᐸᐎᐗᒃ᙮ 3ᒥᒉᑦ ᑫᒀᓇ ᒫᑲ ᑮ ᐎᑕᒪᐌᐤ ᓇᔅᐱᑐᐌᐎ ᐋᑕᓗᑳᓇ ᐅᒋ, ᐁ ᐃᑗᑦ,
ᒫᑎᑲ, ᐅᐗᓴᓶᐱᓂᑫᐤ ᑮ ᑭᑐᑌᐤ ᑭᒋ ᐗᓴᓶᐱᓂᑫᑦ: 4ᐁ ᐊᑎ ᐗᓴᓶᐱᓂᑫᑦ ᒫᑲ, ᐋᑎᑦ ᓯᒥᓇ ᑮ ᐸᑭᑎᓋ ᐅᐱᒣ ᒣᔅᑲᓈᒃ, ᐱᓓᓯᐗᒃ ᒫᑲ ᑮ ᐯᒋ ᑭᑖᐗᒃ: 5ᐋᑎᑦ ᒫᑲ ᑮ ᐸᑭᑎᓋ ᐁ ᐊᓯᓂᐗᔅᑲᒥᑳᒃ, ᐃᑕ ᐁᑳ ᒥᔅᑕᐃ ᐁ ᐊᔅᑭᐗᒃ: ᐎᐸᒡ ᒫᑲ ᑭ ᓵᑭᓂᑖᐎᑭᓋ ᐁᑳ ᐁ ᑭᔅᐸᑳᒃ ᐊᔅᑭ: 6ᐃᔅᐱ ᒫᑲ ᐱᓯᒻ ᑳ ᓵᑯᑌᑦ, ᑮ ᐃᔅᒀᑌᐗ; ᐁᑳ ᒫᑲ ᐁ ᐗᑕᐱᐗᑭ, ᑮ ᐊᑎ ᓂᐱᒫᑲᓋ᙮ 7ᐋᑎᑦ ᒫᑲ ᑮ ᐸᑭᑎᓋ ᒥᔑᑲᐎᒥᓇᑯᓯᔅᑳᒃ; ᒥᔑᑳᐎᒥᓇᑯᔑᔭᒃ ᒫᑲ ᐁ ᓵᑭᓂᑖᐎᑭᒋᒃ ᑮ ᑭᐱᔅᑲᒶᒃ᙮ 8ᑯᑕᑭᔭ ᒫᑲ ᑮ ᐸᑭᑎᓋ ᒥᓗ ᐊᔅᑮᒃ, ᑮ ᒥᓂᔑᐗᓋ ᒫᑲ, ᐋᑎᑦ ᒥᑖᑐᒥᑕᓇᐤ ᑕᑡᐤ ᐋᓕᐙᒃ, ᐋᑎᑦ ᓀᔥᑕ ᓂᑯᑣᓱᒥᑕᓇᐤ, ᐋᑎᑦ ᓂᔅᑐᒥᑕᓇᐤ᙮
9ᐊᐌᓇ ᐌᑖᐗᑳᑴ ᑭᒋ ᐯᑕᒃ, ᐁᑯᔑ ᑲᑕ ᐯᑕᒻ᙮
ᐁ ᐃᑡᒋᑳᑌᑭ ᐋᑕᓗᑳᓇ
(ᒫᕐᒃ 4:10–12; ᓘᒃ 8:9–10)
10ᑮ ᐯᒋ ᓈᑎᑯ ᒫᑲ ᑭᔅᑭᓄᐊᒪᐙᑲᓇ, ᐁ ᐃᑎᑯᑦ, ᑖᓀᑭ ᐌᒋ ᐋᔭᒥᐊᒋᒃ ᓇᔅᐱᑐᐌᐎ ᐋᑕᓗᑳᓇ ᐅᒋ?
11ᐁ ᓇᔥᑴᐗᔑᐃᐌᑦ ᒫᑲ ᑮ ᐃᑌᐤ, ᐁ ᒥᓕᑲᐎᔦᒃ ᑭᓚᐗᐤ ᑭᒋ ᑭᔅᑫᓕᑕᒣᒃ ᑳ ᒫᒪᔅᑳᑌᓕᑖᑾᑭ ᑭᒋᑭᔑᑳᐎ ᐅᑭᒫᐎᐎᓇᒃ, ᒫᑲ ᐎᓚᐗᐤ ᓇᒪᐎᓚ ᒥᓛᐗᒃ᙮ 12ᐌᓴ ᐊᐌᓇ ᐁᔮᑴ, ᐁᐗᒀᓇ ᑫ ᒥᓛᑲᓂᐎᑦ, ᐊᐙᓯᑌ ᒫᑲ ᑲᑕ ᐌᓗᑎᓯᐤ: ᒫᑲ ᐊᐌᓇ ᐁᑳ ᐁᔮᑴ, ᐁᐗᒀᓇ ᑫ ᒪᔅᑲᒫᑲᓂᐎᑦ ᑫᒀᓕᐤ ᑳ ᐋᔮᑦ᙮ 13ᐁᐗᑯ ᐌᒋ ᐋᔭᒥᐊᑭᒃ ᓇᔅᐱᑐᐌᐎ ᐋᑕᓗᑳᓂᒃ: ᐋᑕ ᐁ ᐙᐱᒋᒃ ᓇᒪᐎᓚ ᐙᐱᐗᒃ; ᓀᔥᑕ ᐁ ᐯᑕᑭᒃ ᓇᒪᐎᓚ ᐯᑕᒶᒃ, ᓇᒪ ᓀᔥᑕ ᓂᓯᑐᑕᒶᒃ᙮ 14ᐁᐗᑯ ᐅᑯ ᐌᒋ ᑎᐱᐸᓕᓕᒃ ᐋᐃᓭᔭ ᐅ ᑭᔅᑭᐙᐃᑫᐎ ᐋᔭᒥᐎᓐ, ᑳ ᐃᑗᒪᑲᓂᓕᒃ, ᐁ ᐯᑕᒣᒃ ᑭ ᑳ ᐯᑌᓇᐗᐤ, ᓇᒪ ᒫᑲ ᑭ ᑳ ᓂᓯᑐᑌᓇᐗᐤ; ᓀᔥᑕ ᐁ ᐙᐸᑕᒣᒃ ᑭ ᑳ ᐙᐸᑌᓇᐗᐤ, ᓇᒪ ᒫᑲ ᑭ ᑳ ᓂᓯᑕᐎᓀᓇᐗᐤ᙮ 15ᐌᓴ ᐅᑯ ᐃᓕᓕᐗᒃ ᐅᑌᐃᐗᐤ ᑲᑫᐹᑎᓯᒪᑲᓂᓕᐤ, ᐅᑖᐗᑲᐙᐗ ᓀᔥᑕ ᓇᒪᐎᓚ ᓇᐃᑕᒧᒪᑲᓂᓕᐗ, ᓀᔥᑕ ᑭ ᑭᐸᐊᒶᒃ ᐅᔅᑭᔑᑯᐙᐗ; ᐁᑳ ᐐᔅᑳᑦ ᑭᒋ ᐙᐸᑕᑭᒃ ᐅᔅᑭᔑᑯᐙᒃ ᐅᒋ, ᓀᔥᑕ ᑭᒋ ᐯᑕᑭᒃ ᐅᑖᐗᑲᐙᒃ ᐅᒋ, ᓀᔥᑕ ᑭᒋ ᓂᓯᑐᑕᑭᒃ ᐅᑌᐃᐙᒃ, ᓀᔥᑕ ᑭᒋ ᑴᔅᑳᑎᓯᐋᑲᓂᐎᒋᒃ, ᓂᓚ ᓀᔥᑕ ᑭᒋ ᒥᓇᐙᒋᐊᑭᒃ᙮
16ᒫᑲ ᔕᐌᓕᑖᑾᓋ ᑭᓚᐗᐤ ᑭᔅᑭᔑᑯᐙᐗ, ᐌᓴ ᐙᐱᒪᑲᓋ; ᓀᔥᑕ ᑭᑕᐗᑳᐙᐗ, ᐌᓴ ᐯᑕᒧᒪᑲᓋ᙮ 17ᐌᓴ ᑖᐺ ᑭᑦ ᐃᑎᓇᐗᐤ, ᒥᒉᑦ ᐅᑭᔅᑭᐙᐃᑫᐗᒃ ᓀᔥᑕ ᐅᒀᔭᔅᑭᑖᑎᓯᐗᒃ ᑮ ᐊᑲᐙᑕᒶᒃ ᑭᒋ ᐐᐸᑕᑭᒃ ᐅᐅ ᑫᒀᓇ ᑳ ᐙᐸᑕᒣᒃ, ᓇᒪ ᒫᑲ ᐅᒋ ᐙᐸᑕᒶᒃ; ᓀᔥᑕ ᑭᒋ ᐯᑕᑭᒃ ᐅᐅ ᑫᒀᓇ ᑳ ᐯᑕᒣᒃ, ᓇᒪ ᒫᑲ ᑮ ᐯᑕᒶᒃ᙮
ᒋᓴᔅ ᐋᓕᒧᒣᐤ ᐅᐗᓴᓶᐱᓂᑫᐗ
(ᒫᕐᒃ 4:13–20; ᓘᒃ 8:11–15)
18ᓇᑐᑕᒧᒃ ᒫᑲ ᓇᔅᐱᑐᐌᐎ ᐋᑕᓗᑳᓐ ᐁ ᐃᔑ ᐋᓕᒧᒫᑲᓂᐎᑦ ᐅᐗᓴᓶᐱᓂᑫᐤ᙮ 19ᐃᔅᐱ ᐊᐌᓇ ᐱᐁᑕᑭ ᐅᑭᒫᐎᐎᓂ ᐋᔭᒥᐎᓂᓕᐤ, ᐁᑳ ᒫᑲ ᓀᓯᑐᑕᑭ, ᐁᑯ ᐱᐁᒋ ᒪᔅᑲᒥᑯᑦ ᒪᒋ ᐊᐌᓕᐗ ᐊᓂᐁᓕᐤ ᑳ ᑮ ᐸᑭᑎᓂᑳᑌᓕᒃ ᐅᑌᐃᒃ᙮ ᐁᐗᑯ ᐊᐗ ᑳ ᐅᑎᓇᒃ ᓯᒥᓇ ᐅᐱᒣ ᒣᔅᑲᓈᒃ᙮ 20ᒫᑲ ᐊᓇ ᑳ ᐅᑎᓇᒃ ᓯᒥᓇ ᐊᓐᑕ ᐊᓯᓂᐗᔅᑲᒥᑳᒃ, ᐁᐗᒀᓇ ᑳ ᐯᑕᒃ ᐋᔭᒥᐎᓂᓕᐤ, ᑣᔦᒃ ᒫᑲ ᐅᑎᓇᒻ ᐁ ᒥᓚᐙᑕᒃ; 21ᓇᒪᐎᓚ ᒫᑲ ᐅᑕᐱᐎᐤ ᐱᒋᓛᒃ, ᒫᑲ ᐊᒋᓚᐤ ᐱᑯ ᓂᐸᐎᐤ: ᐌᓴ ᐃᔅᐱ ᐊᓕᒥᓯᐎᓂᓕᐤ ᓀᔥᑕ ᑲᒀᑕᑭᓯᐎᓂᓕᐤ ᒥᐋᒋ ᑕᑾᓂᓕᑭ ᐋᔭᒥᐎᓐ ᐅᒋ, ᑭᑭᑳ ᓈᔦᑕᐌᓕᑕᒻ᙮ 22ᐊᓇ ᓀᔥᑕ ᑳ ᐅᑎᓇᒃ ᓯᒥᓇ ᒥᔑᑲᐎᒥᓇᑯᓰᔅᑳᒃ, ᐁᐗᒀᓇ ᑳ ᐯᑕᒃ ᐋᔭᒥᐎᓂᓕᐤ ᐁ ᐅᑕᒣᓕᑕᒃ ᒫᑲ ᐅᒣᓕᐤ ᐊᔅᑭᓕᐤ, ᓀᔥᑕ ᐁ ᐙᔦᔑᐃᑯᑦ ᒥᔕᑭᓯᐎᓇ, ᑭᐱᔅᑲᒶᒃ ᐋᔭᒥᐎᓂᓕᐤ ᓇᒪᐎᓚ ᒫᑲ ᒥᓂᔑᐎᐤ᙮ 23ᒫᑲ ᐊᓇ ᑳ ᐅᑎᓇᒃ ᓯᒥᓇ ᒥᓗ ᐊᔅᑮᒃ, ᐁᐗᒀᓇ ᑳ ᐯᑕᒃ ᐋᔭᒥᐎᓂᓕᐤ, ᓀᔥᑕ ᑳ ᓂᓯᑐᑕᒃ; ᐊᓯᒋ ᓀᔥᑕ ᑳ ᒥᓂᔑᐎᑦ, ᓀᔥᑕ ᑳ ᓂᑖᐎᑭᐃᐌᑦ, ᐋᑎᑦ ᒥᑖᑐᒥᑕᓇᐤ ᑕᑡᐤ ᐋᓕᐙᒃ ᐋᑎᑦ ᓂᑯᑣᓱᒥᑕᓇᐤ, ᐋᑎᑦ ᓂᔅᑐᒥᑕᓇᐤ᙮
ᓇᔅᐱᑐᐌᐎ ᐋᑕᓗᑳᓐ ᒪᒋ ᒪᔅᑯᔑᔭ
24ᑯᑕᒃ ᓇᔅᐱᑐᐌᐎ ᐋᑕᓗᑳᓐ ᑮ ᐎᑕᒪᐌᐤ, ᐁ ᐃᑗᑦ, ᑭᒋᑭᔑᑳᐎ ᐅᑭᒫᐎᐎᓐ ᐃᔑᓈᑾᓐ ᑖᐱᔅᑯᒡ ᐊᐌᓇ ᑳ ᐗᓴᓶᐱᓇᒃ ᓯᒥᓇ ᐅ ᓂᑖᐎᑭᒋᑲᓂᒃ: 25ᒫᑲ ᒣᒀᒡ ᐃᓕᓕᐗᒃ ᑳ ᓂᐹᒋᒃ, ᐊᓂᐃ ᑳ ᐸᒀᑎᑯᑦ ᑮ ᐯᒋ ᐗᓴᓶᐱᓇᒥᓕᐗ ᒪᒋ ᒪᔅᑯᔑᐎ ᓯᒥᓇ, ᐁᑯ ᒫᑲ ᒥᐋᒑᓕᒋ᙮ 26ᒫᑲ ᐃᔅᐱ ᐱᐁᒋᓵᑲᔅᑭᑦ ᒪᑖᒥᓇᔉ, ᓀᔥᑕ ᐱᐁᒋ ᒥᓂᔑᐎᑦ, ᐁᑯ ᓀᔥᑕ ᓂᔪᑾᑭ ᒪᒋ ᒪᔅᑯᔑᔭ᙮ 27ᐁᑯ ᒫᑲ ᐅᑦ ᐊᑑᔅᑫᓛᑲᓂᒪ ᐙᔅᑳᔦᑲᓂ ᐅᑭᒪᐤ ᑳ ᐯᒋ ᐃᑎᑯᑦ, ᐅᑭᒪᐤ, ᓇᒪ ᓈ ᒥᓗ ᓯᒥᓇ ᑭ ᑮ ᐙᓴᓶᐱᓀᑕᐃ ᑭ ᓂᑖᐎᑭᒋᑲᓂᒃ? ᑖᓐᑌ ᒫᑲ ᑳ ᐅᒋ ᒪᒋ ᒪᔅᑯᔑᐗᒃ? 28ᑮ ᐃᑌᐤ, ᑳ ᐸᒀᔑᑦ ᐁᐗᒀᓇ ᑳ ᑐᑕᒃ᙮ ᐊᑑᔅᑫᓛᑲᓇᒃ ᑮ ᐃᑌᐗᒃ, ᑭ ᓇᑕᐌᓕᒥᓈᓐ ᓈ ᑭᒋ ᓇᑕᐎ ᒪᓂᐱᑕᒫᒃ? 29ᒫᑲ ᑮ ᐃᑗᐤ, ᓇᒪᐎᓚ; ᒫᔅᑯᒡ ᒦᔅᑲᐤ ᒣᑾᒡ ᐁ ᒪᓂᐱᑕᒣᒃ ᒪᒋ ᒪᔅᑯᔑᔭ ᑖᐱᔅᑯᒡ ᑭ ᑳ ᐊᓯᒋᐱᑕᐙᐗᐗᒃ ᐸᑴᔑᑲᓇᒃ᙮ 30ᐁᑯᔑ ᑖᐱᔅᑯᒡ ᑲᑕ ᓂᑖᐎᑭᐗᒃ ᐹᑎᒫ ᒪᐗᒋᒋᑳᓂᐗᑫ: ᐃᔅᐱ ᒫᑲ ᐅᑎᒋᐸᓕᑭ ᑭᒋ ᒪᐗᒋᒋᑳᓂᐗᒃ ᓂ ᑳ ᐃᑖᐗᒃ ᐅᒪᓂᔑᑫᐗᒃ, ᓃᔥᑕᒻ ᒫᐗᒋᑖᒃ ᒪᒋ ᒪᔅᑯᔑᔭ, ᐊᓵᐱᑕᒧᒃ ᒫᑲ ᑭᒋ ᐃᔅᒀᓴᒣᒃ; ᒫᑲ ᒫᐗᒋᐃᑯᒃ ᐸᑴᔑᑲᓇᒃ ᓂ ᑕᒀᐃᑫᐎᑲᒥᑯᒃ᙮
ᓇᔅᐱᑐᐌᐎ ᐋᑕᓗᑳᓐ ᒪᔅᑕᑦ ᓯᒥᓐ
(ᒫᕐᒃ 4:30–32; ᓘᒃ 13:18–19)
31ᑯᑕᒃ ᓇᔅᐱᑐᐌᐎ ᐋᑕᓗᑳᓐ ᑮ ᐎᑕᒪᐌᐤ, ᐁ ᐃᑗᒃ, ᑭᒋᑭᔑᑳᐎ ᐅᑭᒫᐎᐎᓐ ᐃᔑᓈᑾᓐ ᑖᐱᔅᑯᒡ ᐯᔭᒃ ᒪᔅᑕᑦ ᓯᒥᓐ, ᐃᓕᓕᐤ ᑳ ᐅᑎᓇᒃ, ᑳ ᐸᑭᑎᓇᒃ ᒫᑲ ᐅ ᓂᑖᐎᑭᒋᑲᓂᒃ: 32ᐁᐗᑯ ᒫᐗᒋ ᐋᐱᔖᔑᓐ ᐁ ᐃᑕᑎᑭ ᓂᑖᐎᑭᑖᑲᓇ: ᒫᑲ ᐃᔅᐱ ᓀᑖᐎᑭᒃ, ᒫᐗᒋ ᒥᔕᐤ ᑳ ᐃᑕᑎᑭ ᓂᑖᐎᑭᑖᑲᓇ, ᐃᔥᐱᔥ ᑭᒋ ᒥᔅᑎᑯᐗᒃ; ᐱᓓᓯᐗᒃ ᑳ ᐹᐹᒥᓛᒋᒃ ᒫᑲ ᐯᒋ ᑕᔑᑫᐗᒃ ᐅ ᐗᑎᑾᓂᒃ᙮
ᓇᔅᐱᑐᐌᐎ ᐋᑕᓗᑳᓐ ᐅᐱᓯᑲᓐ
(ᓘᒃ 13:20–21)
33ᑯᑕᒃ ᓇᔅᐱᑐᐌᐎ ᐋᑕᓗᑳᓐ ᑮ ᐎᑕᒪᐌᐤ: ᑭᒋᑭᔑᑳᐎ ᐅᑭᒫᐎᐎᓐ ᐃᔑᓈᑲᓐ ᑖᐱᔅᑯᒡ ᐅᐱᓯᑲᓐ, ᑳ ᐅᑎᓇᒃ ᐃᔅᑴᐤ, ᓀᔥᑕ ᑳ ᐃᑕᔅᑖᑦ ᓂᔅᑐ ᑎᐹᔨᑲᓇ ᐸᑴᔑᑲᓂᒃ, ᐱᓕᔥ ᒥᓯᐌ ᑳ ᐅᐱᓯᐸᓕᒃ᙮
ᐁ ᐃᔑ ᐋᐸᒋᑖᑦ ᒋᓴᔅ ᓇᔅᐱᑐᐌᐎ ᐋᑕᓗᑳᓇ
(ᒫᕐᒃ 4:33–34)
34ᒥᓯᐌ ᐅᐅ ᑫᒀᓇ ᒋᓴᔅ ᑮ ᐎᑕᒪᐌᐤ ᒥᔮᒪᐎᒥᒉᑎᓕᒋ ᐃᓕᓕᐗ ᓇᔅᐱᑐᐌᐎ ᐋᑕᓗᑳᓂᒃ; ᓇᒪᐎᓚ ᓀᔥᑕ ᐙᔦᔥ ᑮ ᐃᑌᐤ ᐁᑳ ᐁ ᐋᐸᒋᑖᑦ ᓇᔅᐱᑐᐌᐎ ᐋᑕᓗᑳᓂᓕᐤ: 35ᑭᒋ ᑎᐱᐸᓕᓕᒃ ᑳ ᑮ ᐃᑗᑦ ᐅᑭᔅᑭᐙᐃᑫᐤ, ᐁ ᐃᑗᑦ, ᓂ ᑳ ᐹᔅᑭᑐᓀᓕᓐ ᓇᔅᐱᑐᐌᐎ ᐋᑕᓗᑳᓂᒃ; ᓂ ᑳ ᐎᑌᓐ ᑫᒀᓇ ᑳ ᑮ ᑳᒋᑳᑌᑭ ᐊᔅᐱᓐ ᑳ ᐯᒋ ᐊᔅᑭᐗᒃ᙮
ᒋᓴᔅ ᐐᑖᒻ ᑖᓐ ᐁ ᐃᑗᒪᑲᒃ ᓇᔅᐱᑐᐌᐎ ᐋᑕᓗᑳᓐ ᒪᒋ ᒪᔅᑯᔑᔭ ᐅᒋ
36ᐁᑯ ᒋᓴᔅ ᑫᒋᑎᔕᐙᑦ ᒥᔮᒪᐎᒥᒉᑎᓕᒋ ᐃᓕᓕᐗ, ᐙᔅᑳᔨᑲᓂᒃ ᒫᑲ ᑮ ᐱᑐᑫᐤ: ᑭ ᐯᒋ ᓈᑎᑯ ᒫᑲ ᐅ ᑭᔅᑭᓄᐊᒪᐙᑲᓇ, ᐁ ᐃᑎᑯᑦ, ᐎᑕᒪᐎᓈᓐ ᐊᓂᒪ ᓇᔅᐱᑐᐌᐎ ᐋᑕᓗᑳᓐ ᐁ ᐃᔑ ᐋᓕᒧᒋᑳᑌᑭ ᒪᒋ ᒪᔅᑯᔑᔭ ᓂᑖᐎᑭᒋᑲᓂᒃ᙮
37ᐁ ᓇᔥᑴᐗᔑᐋᑦ ᒫᑲ ᑮ ᐃᑌᐤ, ᐊᓇ ᑳ ᐗᓴᓶᐱᓇᒃ ᒥᓗ ᓯᒥᓇ ᐁᐗᒀᓇ ᐃᓕᓕᐎᑯᓯᓵᓐ; 38ᓂᑖᐎᑭᒋᑲᓐ ᐁᐗᑯ ᐅᒪ ᐊᔅᑭ; ᐊᓂᐃ ᒥᓗ ᓯᒥᓇ ᐁᐙᒀᓂᑭ ᑳ ᐅᑦ ᐊᐙᔑᒥᔑᒥᑯᒋᒃ ᐅᑭᒫᐎᐎᓂᓕᐤ; ᒫᑲ ᒪᒋ ᒪᔅᑯᔑᔭ ᐁᐗᒀᓂᑭ ᐅᒪᒋᑡᐤ ᐅᑦ ᐊᐙᔑᒥᔕ; 39ᑳ ᐸᒀᔑᐃᐌᑦ ᑳ ᐗᓴᓶᐱᓇᒃ ᐁᐗᑯ ᒪᒋᒪᓂᑐ; ᐁ ᒫᐗᒋᒋᑳᓂᐗᒃ ᐁᐗᑯ ᐁ ᐃᔥᒀᐸᓕᒃ ᐊᔅᑭ; ᐅᒪᓂᔑᑫᐗᒃ ᓀᔥᑕ ᐁᐗᒀᓂᑭ ᐁᓐᒐᓚᒃ᙮ 40ᑖᐱᔅᑯᒡ ᓀᔥᑕ ᒪᒋ ᒪᔅᑯᔑᔭ ᐁ ᒫᐗᒋᒋᑳᑌᑭ ᓀᔥᑕ ᐃᔅᒀᓯᑳᑌᑭ ᐃᔥᑯᑌᒃ: ᐁᑯ ᑖᐱᔅᑯᒡ ᑫ ᐃᑭᒃ ᐃᔥᒀᐸᓕᑭ ᐊᔅᑭ᙮ 41ᐃᓕᓕᐎᑯᓯᓵᓐ ᑲᑕ ᑭᒋᑎᔕᐌᐤ ᐅᑦ ᐁᓐᒐᓕᒪ, ᐎᓚᐗᐤ ᒫᑲ ᑲᑕ ᒫᐗᒋᑖᐗᒃ ᒥᓯᐌ ᑫᒀᓕᐤ ᑳ ᓈᔦᑕᐌᓕᑖᑾᓂᓕᒃ, ᐊᓂᐃ ᓀᔥᑕ ᑳ ᒪᒋᑐᑕᒥᓕᒋ; 42ᑲᑕ ᐃᔑ ᐌᐱᓀᐗᒃ ᒫᑲ ᐃᔥᑯᑌᐎᑲᒥᑯᒃ: ᐁᑯᑕ ᑫ ᐃᑕᑾᒃ ᒫᑐᐎᓐ ᓀᔥᑕ ᑫ ᐃᔑ ᒫᑗᐋᐱᑌᔑᓂᓈᓂᐗᒃ᙮ 43ᐁᑯ ᐅᒀᔭᔅᑭᑖᑎᓯᐗᒃ ᑫ ᐙᓯᓱᒋᒃ ᑖᐱᔅᑯᒡ ᐱᓯᒻ ᐅᑖᐎᐙᐗ ᐅᑦ ᐅᑭᒫᐎᐎᓂᓕᒃ᙮ ᐊᐌᓇ ᐌᑖᐗᑳᑴ ᑭᒋ ᐯᑕᒃ, ᐁᑯᔑ ᑲᑕ ᐯᑕᒻ᙮
ᓇᔅᐱᑐᐌᐎ ᐋᑕᓗᑳᓐ ᐌᓗᑎᓯᐎᓐ ᑳ ᑳᒋᑳᑌᒃ
44ᒥᓇ, ᑭᒋᑭᔑᑳᐎ ᐅᑭᒫᐎᐎᓐ ᐃᔑᓈᑾᓐ ᑖᐱᔅᑯᒡ ᐌᓗᑎᓯᐎᓐ ᐁ ᑳᒋᑳᑌᒃ ᓂᑖᐎᑭᒋᑲᓂᒃ; ᐁᐗᑯ ᐃᔅᐱ ᐃᓕᓕᐤ ᑳ ᒥᔅᑲᒃ ᑳᑕᐤ, ᓀᔥᑕ ᐁ ᓯᑭᓓᐃᑯᑦ, ᓇᑕᐎ ᐊᑖᐙᑫᐤ ᒥᓯᐌ ᑳ ᐋᔮᑦ, ᐊᑖᐌᐤ ᒫᑲ ᐊᓂᐁᓕᐤ ᓂᑖᐎᑭᒋᑲᓂᓕᐤ᙮
ᓇᔅᐱᑐᐌᐎ ᐋᑕᓗᑳᓐ ᐁ ᐋᓕᒧᒫᑲᓂᐎᑦ ᐁ ᒥᓗᔑᔑᓕᒋ ᐁᓴ
45ᒥᓇ ᑭᒋᑭᔑᑳᐎ ᐅᑭᒫᐎᐎᓐ ᐃᔑᓈᑾᓐ ᑖᐱᔅᑯᒡ ᐊᑖᐌᐎᓕᓕᐤ ᐁ ᓈᓇᑕᐌᓕᒫᑦ ᐁ ᒥᓗᔑᔑᓕᒋ ᐁᓴ; 46ᐁᐗᑯ, ᐃᔅᐱ ᑳ ᑮ ᒥᔅᑲᐙᑦ ᐯᔭᒃ ᐁᓴ ᓈᔅᐱᒡ ᐁ ᑭᔅᑕᑭᑖᑯᓯᓕᒋ, ᑮ ᓇᑕᐎ ᐊᑖᐙᑫᐤ ᒥᓯᐌ ᑳ ᐋᔮᑦ, ᑮ ᐊᑖᐌᐤ ᒫᑲ᙮
ᓇᔅᐱᑐᐌᐎ ᐋᑕᓗᑳᓐ ᐊᓕᐱ ᐅᒋ
47ᒥᓇ, ᑭᒋᑭᔑᑳᐎ ᐅᑭᒫᐎᐎᓐ ᐃᔑᓈᑾᓐ ᑖᐱᔅᑯᒡ ᐊᓕᐱ ᑳ ᐸᑲᔅᑕᐌᐙᑲᓂᐎᑦ ᑭᒋᑭᒦᒃ, ᓀᔥᑕ ᒥᓯᐌ ᓇᓈᑲᐤ ᑳ ᐱᑕᐅᓛᑦ; 48ᐁᐗᑯ, ᐃᔥᐱ ᓯᐋᑲᔅᑭᓀᑦ, ᑮ ᐋᒀᓯᐱᑌᐗᒃ, ᑮ ᓇᐊᐃᐗᒃ ᒫᑲ, ᑮ ᒫᐗᒋᐁᐗᒃ ᒫᑲ ᐊᓂᐃ ᑳ ᒥᓗᔑᔑᓕᒋ ᐊᓱᐗᒋᑲᓂᒃ, ᒫᑲ ᑮ ᐌᐱᓀᐗᒃ ᐊᓂᐃ ᑳ ᒫᓛᑎᓯᓕᒋ᙮ 49ᐁᑯ ᑖᐱᔅᑯᒡ ᑫ ᐃᑭᒃ ᐃᔥᒀᐸᓕᑫ ᐊᔅᑭ: ᐁᓐᒐᓚᒃ ᑲᑕ ᐯᒋ ᐹᑳᓂᐁᐗᒃ ᐅᒪᒋᑣᐗ ᐅᒀᔭᔅᑭᑎᐗ ᐅᒋ; 50ᐃᔥᑯᑌᐎᑲᒥᑯᒃ ᒫᑲ ᑲᑕ ᐃᔑ ᐌᐱᓀᐗᒃ: ᐁᑯᑕ ᑫ ᐃᑕᑾᒃ ᒫᑐᐎᓐ ᓀᔥᑕ ᑫ ᐃᔑ ᒫᑗᐋᐱᑌᔑᓂᓈᓂᐗᒃ᙮
ᐅᔥᑭ ᑫᒀᓇ ᓀᔥᑕ ᑳᔮᔥ ᑫᒀᓇ
51ᒋᓴᔅ ᐃᑌᐤ ᒫᑲ, ᑭ ᑮ ᓂᓯᑐᑌᓇᐗᐤ ᓈ ᒥᓯᐌ ᐅᐅ ᑫᒀᓇ?
ᑮ ᐃᑌᐗᒃ ᒫᑲ, ᐁᐁ, ᑌᐯᓕᒋᑫᔭᓐ᙮
52ᐁᑯ ᐁᑖᑦ, ᐁᐗᑯ ᐅᒋ ᒥᓯᐌ ᑕᑐ ᐅᒪᓯᓇᐃᑫᐤ ᑳ ᑭᔅᑭᓄᐊᒫᑦ ᑭᒋᑭᔑᑳᐎ ᐅᑭᒫᐎᐎᓂᒃ, ᓇᔅᐱᑕᐌᐤ ᐃᓕᓕᐗ ᑳ ᑎᐯᓕᑕᒥᓕᒋ ᐙᔅᑳᔨᑲᓂᓕᐤ, ᑳ ᐅᒋ ᐗᓚᐎᑕᑖᑦ ᐅ ᐌᓗᑎᓯᐎᓂᒃ ᐅᔥᑭ ᑫᒀᓇ ᓀᔥᑕ ᑳᔮᔥ ᑫᒀᓇ᙮
ᓈᔦᑕᐌᓕᒣᐗᒃ ᒋᓴᓴ ᓈᓴᕆᑎᒃ
(ᒫᕐᒃ 6:1–6; ᓘᒃ 4:16–30)
53ᑮ ᐃᑭᓐ ᒫᑲ, ᐃᔅᐱ ᒋᓴᔅ ᑳ ᑮ ᑭᔑ ᐃᑗᑦ ᐅᐅ ᓇᔅᐱᑐᐌᐎ ᐋᑕᓗᑳᓇ, ᐊᓐᑕ ᑮ ᐅᒋ ᑭᑐᑌᐤ᙮ 54ᐃᔅᐱ ᒫᑲ ᐌᑎᑕᒃ ᑎᐱᓚᐌ ᐅᑦ ᐊᔅᑭ, ᑮ ᑭᔅᑭᓄᐊᒪᐌᐤ ᐅᑦ ᐋᔭᒥᐁᐎᑲᒥᑯᓚᒃ, ᑳ ᐅᒋ ᒫᒪᔅᑳᑕᒥᓕᒋ, ᐁ ᐃᑗᓕᒋ ᒫᑲ, ᑖᓐᑌ ᐌᒋ ᐋᔮᑦ ᐊᐗ ᐃᓕᓕᐤ ᐅᒣᓕᐤ ᑲᑫᑕᐌᓕᑕᒧᐎᓂᓕᐤ, ᓀᔥᑕ ᐅᐅ ᒫᒪᔅᑳᒋ ᐊᑑᔅᑫᐎᓇ? 55ᓇᒪ ᓈ ᐊᐗ ᒥᔅᑎᑯᓈᐯᐤ ᐅᑯᓯᓴ? ᓇᒪ ᓈ ᐅᑳᐎᔭ ᒣᕆ ᐃᔑᓂᑳᓱᓕᐗ? ᓀᔥᑕ ᐎᒋᔖᓇ, ᒉᒻᔅ, ᓀᔥᑕ ᒍᓯᔅ, ᓀᔥᑕ ᓵᐃᒪᓐ, ᓀᔥᑕ ᒎᑕᔅ? 56ᓀᔥᑕ ᐎᒋᔖᓂᔅᑴᒪ, ᓇᒪ ᓈ ᒥᓯᐌ ᐁ ᐃᑕᓯᒋᒃ ᑭ ᐎᒉᐎᑯᓈᐗᒃ? ᑖᓐᑌ ᐌᒋ ᐋᔮᑦ ᐊᐗ ᐃᓕᓕᐤ ᒥᓯᐌ ᐅᐅ ᑫᒀᓇ? 57ᑮ ᓈᔦᑕᐌᓕᒣᐗᒃ ᒫᑲ᙮
ᒫᑲ ᒋᓴᔅ ᑮ ᐃᑎᐤ, ᐅᑭᔅᑭᐙᐃᑫᐤ ᐋᔭᐤ ᑭᔅᑎᓯᐎᓂᓕᐤ, ᑎᐱᓚᐌ ᐅᑦ ᐊᔅᑮᒃ, ᓀᔥᑕ ᑎᐱᓚᐌ ᐎᑭᒃ ᐱᑯ ᓇᒪᐎᓚ ᑭᔅᑌᓕᒪᐤ᙮ 58ᐁᑯᑕ ᒫᑲ ᓇᒪᐎᓚ ᒥᒉᑦ ᒫᒪᔅᑳᒋ ᐊᑑᔅᑫᐎᓇ ᑮ ᐅᒋ ᑐᑕᒻ, ᐁᑳ ᐁ ᑮ ᑖᐺᑕᒥᓕᒋ᙮
Currently Selected:
ᐅᐸᓓᑭᔅ ᒫᑎᐤ 13: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
