Ɛsedɔ 15
15
Mose è Yâwɛɛ láa maa tɛ̀ a wule-wôo
1Nya ƃe Mose da Eezuɛ-ŋai dí ŋulei ŋí tòo Yâwɛɛ ma dîyɛɛi,
“Ŋa pâi wule tôoi Yâwɛɛ ma, kpɛ́ni fêi, a ŋɔfólo-laa tii kɛ́.
A zoo-ŋai ŋuŋ lá píli ǹyái su da zia-ƃelai.
2Yâwɛɛ káa a ŋáwala-walai laa.
Ŋa pâi ǹáa maa tɛ̂i ŋáwule-ŋai su.
Ŋáɣâlai ká ŋí, ǹyaŋ ŋa pâi ǹáa maa tɛ̂i.
Gáa a ńâŋ ŋɔɣâlai, ǹyaŋ ŋa pâi ǹáa maa tɛ̂i.
3Yâwɛɛ káa a kɔ-kuluƃa.
Ǹáa ƃa Yâwɛɛ.
4“È Gâloŋ ŋɔkéleŋ-ŋai da ŋɔkɔ́kɔ-ƃelai lɛ̀ɛ ǹyái su.
Gɔ-kûluƃa-ŋai mɛi-ƃelai è dílɛ̀i, dí lɛ̀ɛ Ǹyúo Kpɔ̂lui su.
5Ǹyái è dímɛi pɛ̂lɛ.
Dí yéŋ ǹya-kaoi ma yɛ̂ɛ kɔni.
6“Óo Yâwɛɛ, ílaa-mii-yee maa pɔlɔ-pɔlɔɔi.
A íkpɔara ƃelai su kara.
7Ífolo-laai ŋɔkɛ́tɛ-laai su, ƃa diai yée mɛi ɣále da tɔ̂ɔ yâi.
Ƃa ílii-ŋwânai tɛ̂ɛ a díkereŋ yɛ̂ɛ mɔlɔŋ-kpaŋ.
8Nya-ŋai ŋáa a tɛ́ díkîe ma a ílɛ̂woi.
Ǹyá-fɛɛ-ŋai dí tɔ́ɔ déŋ-deŋ yɛ̂ɛ yée.
Bari-ŋai dí kpànaŋ ǹyái sáma.
9Gbɔara-nuui è mò ǹyɛɛi, ‘Ŋa pâi díkpɛ̂i ŋá dísoŋ.
Ŋa pâi díkɔliŋ ŋá kɔlɛ̂i ŋá lii-nɛ̃ɛ kúla díkponôi.
Ŋa pâi ŋáƃoa-sɔkpɔi ɣâlai ŋá dísu kara a ǹyée.’
10Kɛ́lɛ í lɛ̂woi ŋɔfãa è ǹyái kɛ̀ é dímɛi pɛ́lɛ.
Dí yèŋ ǹyá kɛ́tɛi mu yɛ̂ɛ fomâ.
11“Gbɛ̂ɛ ƃé gáa yɛ̂ɛ yá ŋ̀âla-ŋai sáma Óo Yâwɛɛ?
Gbɛ̂ɛ ƃé gáa yɛ̂ɛ yá, yái íwala-walai maa-waa-laa su,
ímaa pɔlɔ-pɔlɔɔ fólo-laa tua-kɛɛ su, da ŋɛi-kɛ-maa kɛ́ɛi?
12Í ílaa-mii-yee sãa,
ǹɔii é kúkpɔara-ƃelai kpéle.
13Ǹûai í díŋuŋ ma ƃòi, ƃa tɔɔ dítuɛ
a ímaloŋ-kâa wɛli-kɛ-maai. Berei a lî íkɛ̂i maa waai mai, ƃa ǹɛ́ dîa a íwala-walai.
14Ǹûai da mɛni, dímaa è kpɛ̃lîŋ.
Yao è pà Felesia-ƃelai kɔlɔ̂i.
15Idɔŋ kaloŋ-ŋai da yào.
Môa-ŋai ŋuŋ-túɛ-ƃelai maa kɛ́ kpɛ̀liŋ.
Keena lɔii su-ƃelai líi à tòo pôlu.
16Yao da lii-sɛlɛŋ dí kɛ̀ dîa.
Íyee ŋɔwála-walai, Óo Yâwɛɛ
È díkɛ̀ dí dímɛi sáa a yao,
é lɛ́ɛ la zu ínûai dí tɛ́ɛ,
nyii-ŋai díkaa a ípɔɔi.
17Ƃa pâi pâi a dia í dísee íkpɔɔi yeei ma,
Óo Yâwɛɛ, ƃɛ́i í nàa kɛ̀ a ípɔ taai,
gwaa maa waai ma, nyii í nàa kpɛ̀tɛ a íyeei.
18Yâwɛɛ a pâi kɛ-mɛi-laa kɛ̂i wɔlɔ-wɔlɔ da wɔlɔ-wɔlɔ.”
Miriaŋ è Yâwɛɛ láa maa tɛ́ a wule-wôo
19Tãi Gâloŋ ŋɔsoo-ŋai da ŋɔkéleŋ ŋai é pɛ́lɛ ŋɔsoo sia-ƃelai dîa dí sèri la ǹyái sui, Yâwɛɛ è pà pôlu a ǹyái é sía dímɛi. Kɛ́lɛ Eezuɛ-ŋai dí sìa lɔii kpala ma dí tɛ́ɛ ǹyái sáma.
20Eelɔŋ zaaƃɔlɔ Miriaŋ nyii kɛ̀ a Ɣâla ŋɔlóno kɛ́-nuui, è nyɛ̃ɛ nyɛŋ sìɣe nɛyâai kélee dí lɛ̂ɛ bôlu gɛ́ ŋ̀ale díkɛ́ mãla. 21Miriaŋ è ŋulei ŋí tòo dîa ǹyɛɛi,
“Ka wule tóo Yâwɛɛ ma, kpɛ́ni fêi, a mɛni maa pɔlɔ-pɔlɔ kɛ́.
A zooi da zia-nuui kɛ́ da lɛ́ɛ ǹyái su.”
Ǹyá ŋwánai
22Nya ƃe Mose è tɔ̀ɔ ǹûai túɛ dí kula Ǹyúo Kpɔ̂lui ma dí lí Sûu fɛ̃ɛ-kpalaŋ su-pere. Dí sìa vɛ̃ɛ-kpâlaŋ su a fólo saaƃa dífa yá kàa. 23Tãi dí sèri la yá mai dífe pɔ̂ri ní díkpelêi naa, kpɛ́ni fêi, nàa yai è kɛ̀ a ŋwánaa. Mɛni ma dí nàa tòli a Mala. 24Nya ƃe ǹûai líi è ŋwàna Mose mà dîyɛɛi, “Lé ƃé kwa pâi kúkpelêi lai?” 25Nya ƃe Mose è Yâwɛɛ fɛ̀li a gbanaŋɔɔ. Yâwɛɛ è wúru da lɛ̀ Mose ma Mose é doo ǹyái su, ǹyái é nɛ́ɛ.
Nàa ƃé Yâwɛɛ è tɔ̂ŋ tɛ̀ɛ naa dí pɔ́ é dísu kɔɔŋ, 26Ǹyɛɛ diai, “À kɛ̀ kà ŋ̀óo mɛ̀ni kpɔ́ a ǹɛ́lɛɛ ńyãa Yâwɛɛ Káɣâlai, ka mɛni-ŋai kɛ́ ŋá ŋ̀wɛ̂lii ká gɛ́i ká ŋátɔ̂ŋ-ŋai kélee mɛi káa, gɛ̀ ní fé pâi tɔ̂ŋ kpɛ̂i kâa a gɔlɔ-fela sîi ŋai ŋá dɛ̀ɛ Ize-ŋai mɛni mai. Ńyãa ƃa Yâwɛɛ nyii káƃaloi.”
27Nya ƃe dí pà Iliŋ ƃɛ́i yá pɛlɛɛ puu káo feerɛ dí kɛ̀ naa da tóu wuru buu lɔ́ɔlu mɛi feerɛi. Dí díƃûui pù naa ǹyái kɔlɛ.
Currently Selected:
Ɛsedɔ 15: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia
