Ɛsedɔ 23

Tɔ̃yâ da tenîŋ-mo-laa

1“Ífe wôya koraŋ-mo tòo. Ífe kpɔ̀ŋ núu mâ a wôya sere-faa-kɛɛ a kɛ̀ ŋɔmɛni fé lɛ́lɛ ní. 2Ífe fàa núu támaa wóo ma a gɛɛ í mɛni nyɔ́mɔɔ kɛ́ kpaa máŋ í wôya sere-faa-kɛ̀ nɔ́ a gɛɛ í núu támaa líi láa. 3Ífe tɔ̀ɔ kôlo nuu pôlu a wôya-pere a ŋɔmɛni ƃó-tãi.

4“À kɛ̀ ƃà íkpɔara-nuu ŋɔniŋa kpaa máŋ ŋɔwɛlɛ-sôo kàa gɛ́ pù, zoŋ í pá la bɔ́ pôlu. 5À kɛ̀ ƃa íkpɔara-nuu kàa ŋɔwɛlɛ-sôoi a tôo a kpîri, ífe tɛ̀ɛ mà. Kpɔŋ mà ká mu siɣe.

6“Ífe kôlo nuu ŋɔtɔ̃yâi làŋ ŋɔmɛni ƃóɔɔ su. 7Ífe mɛni kpala pɛ̀lɛ núu ma. Ífe ǹúui pàa nyii zɔŋ fé baa-mɛni sui. Kpɛ́ni fêi, ǹúui a m̀ɛni nyɔ́mɔɔ sii-ŋai ŋí kɛ̂i, ŋa pâi ŋɔmɛnii ŋá teêi. 8Ífe yee-pɛlɛ ǹá sɛŋ-kao sòŋ. Kpɛ́ni fêi, yee-pɛlɛ ǹá-sɛŋ-kao a mɛni ŋá-tee-nuu kɛ̀ ŋ̀ɛ́i é pú, va dɔ̃yâ-nuui ŋɔtɔ̃yâi ƃò.

9“Káfe tùa a ŋɔ̃ya a nyɔ́mɔɔ. Ká ŋɔ̃ya ŋɔkili-ŋa-siai kɔ́lɔŋ. Kpɛ́ni fêi, ká kɛ̀ a ŋɔ̃ya Ize lɔii su.

Góraŋ ǹɔ́ɔlu mɛi feerɛ da ŋ̀ele-kûui ǹɔ́ɔlu mɛi feerɛi

10“Ƃa pâi sí-sɛŋ sîi ílɔii mâ a kóraŋ lɔ́ɔlu mɛi da í m̀a kúla. 11Kɛ́lɛ góraŋ mɛi feerɛ-ɣelei fɛ̂ɛ í ǹɛɛ naa é vii tɔ́ɔ. Ífe sí-sɛŋ sii da kélee sì naa. Gôlo-ƃelai da pɔ̂ri dílaa miî naa, vɛnɛ sãai dí gbéli míi. Gɛ́ tí máŋ a íkpɔmɔ ƃa-kpalaŋ da íƃa-wuru-kpalaŋ.

12“Ítii-ŋai kɛ́ a fólo lɔ́ɔlu mɛi da. Í ífii tɔ́ɔ a mɛi feerɛ-ɣelei, a gɛɛ íniŋa-ŋai da íwɛlɛ-sôo-ŋai dí dífii tɔ́ɔ, íluɛ-ŋai da íŋɔ̃ya-ŋai dí tóo díkɔlɔ̂i.

13“Ka káwoli tɔ́ɔ mɛni-ŋai kélee dîa ŋa m̀ó kâai. Káfe ɣâla da kpɛ́ni fɛ̀li. Káfe máŋ kpîŋ dílaa tòli.

Gúu kpaya-kpaya saaƃai

(Ɛsedɔ 34:18-26; Dutɛrɔnome 16:1-17)

14“Ka kúu kɛ́ ḿâ saaƃa kóraŋ tɔnɔ su. 15Ka dɛ́-sɛŋ féu kpoloi maa kûui mɛi káa. Yɛ̂ɛ berei nɔ́ ŋá m̀ó la kâai, ka dɛ́-sɛŋ féu kpoloi míi a ɣele-kûu lɔ́ɔlu mɛi feerɛ tãi ma ŋá nɛ̀ Abi-ɣaloŋ sui. Kpɛ́ni fêi, ka kùla Ize lɔii su maa-ɣaloŋ tí su. Núu da fé pà ŋɛ́i a ǹyée fôlo.

16“Ka kámii-sãai tée-tãi maa-kûui mɛi káa nyii gáa a kási-sãai m̀á maa-ŋuŋ kámɔ̃lɛi pôlu mai.

“Ka gúui mɛi káa nyii gáa a kákpɔmɔ-ƃa da káwuru-ƃa kula-kûui a góraŋ kpɛɛ ŋái. 17Káai a zinâai fɛ̂ɛ ká tɔ́ɔ ŋɛ́i-tuɛ ǹyãai Yâwɛɛ Káɣâlai gîe saaƃa kóraŋ tɔnɔ su a gúu-ŋai ŋí dítãi.

18“Kà kɛ̀ taa-tûlɛ kulâi a sâla ḿɛni ma, ká fé gùla a kpólo nyii tɛ́-sɛŋ káa zui. Zâla suai ŋ̀úlɔ da fé lɛɛ naa ɣele é bɔ́ mà.

19“Kási-sãai m̀á maa-ŋuŋ nyii ǹɛ̂lɛi ká pá la Yâwɛɛ Káɣâla ŋɔpɛ́rɛi mu.

“Káfe ƃoli-loŋ ɣìli a ǹee ŋíni-ya.

Kono-tee da lia-woo

20“Ka gáa ŋa pâi ŋákelai tɛ́ɛ̂i é tɔ́ɔ kátuɛ é kámɛi káa berei mâ é pá a káa ƃɛ́i ŋa nàa kpɛtɛi. 21Ka káwoli tɔ́ɔ mà ká ŋ̀óo mɛni. Káfe ŋ̀óo sîa tòo. Kpɛ́ni fêi, gáa tíi kɛ̂i ǹáai su. Vé pâi kásɔnyɔ̂ŋ su-mɛni lɛɛ̂i. 22Kɛ́lɛ à kɛ̀ kà ŋ̀óo mɛ̀ni, ká mɛnii kélee kɛ́ a mò kâai, gɛ̀ ní ŋa pâi kɛ̂i a kákpɔara-ƃelai díkpɔara-nuu, ŋá tɔ́ɔ diai dîa da tɔ̂ɔ kâai. 23Ŋákelai a pâi tɔ̂ɔi kátuɛ é pá a káa Amɔra-ŋai dílɔii, Ita-ŋai, Pɛriza ŋai, Keena-ŋai, Iva-ŋai da Zɛbusa ŋai dílɔii su, ŋá dísu kara. 24Káfe pɛ̀lɛ díɣâla-ŋai kɔ́ɔ mu kpaa máŋ ka dífɛli kpaa máŋ ka tûa yɛ̂ɛ dîa. Kɛ́lɛ ka díɣâla-ŋai kélee su kara ká díkɔni-ŋai wólo nyii-ŋai da dísiɣe a maa waai. 25Ka ḿvɛli ǹyãai a Yâwɛɛ Káɣâlai. Ŋa pâi lûwa lâai kâa mii-sɛŋ mɛni ma da yá, ŋa kɔlɔ-fela sîi kélee kúla kásama. 26Nɛni da kélee koo fé pâi karâi kálɔii su. Díkelee da pâi lóŋ maa-sɔlɔ ƃôi. Ŋa pâi kálɛ̂wo lâai kôyai.

27“Diai kélee da tɔ̂ɔ kâai ŋa pâi díkɛ̂i dí yao ḿâ. Diai kélee ka kɔ́ dípɔi, ŋa pâi díkili ŋá tɛ̂i. Ŋá kákpɔara-ƃelai kɛ́ dí pú ká tuɛ. 28Ŋa pâi yao tɛɛ̂i kátuɛ nyii pâi Iva-ŋai kpɛ̂i kátuɛ da Keena-ŋai é pɛ́lɛ Ita-ŋai dîa. 29Fé pâi dípɛ̂i kóraŋ tɔnɔ yée mu ǹɔii fa lá lɛ̀ɛ la a vólo, lɔɔ sua ŋai dí táma naa kámɛni ma. 30Ŋa pâi díkpɛ̂i naa a bɛlɛ-pɛlɛɛ é lɛ́ɛ la zu ka ƃûu ƃó ǹɔii é kɛ́ a kápɔɔ. 31Ŋa pâi kálɔii ŋɔkoyaŋ-perei lɛ̂i é síɣe Ǹyúo Kpɔ̂lui ma é lí Felesia-ŋai dílɔii mâ pere. É kúla vɛ̃ɛ-kpâlaŋ mâ é seri Yufeletii Ya-leei mâ. Ŋa pâi wála-wala tɛɛ̂i kápɔ ǹɔii-namelai mɛi a gɛɛ ká díkpɛ dí kúla káŋɛi. 32Káfe kákono tèe díyêei kpaa máŋ díɣâla-ŋai. 33Dífe sèe kálɔii su dífa laa kákɛ la ká sɔnyɔ̂ŋ kɛ ŋɛ́i-tuɛ. Kà díɣâla-ŋai fɛ̀li, da pâi kákɛ̂i kásu é kara.”

Currently Selected:

Ɛsedɔ 23: KWB

Highlight

Compare

Copy