Ɛsedɔ 24

Dí Gbanaŋ-wooi ŋá ɣiri

1Yâwɛɛ è mò Mose ma ǹyɛɛi, “Ka Eelɔŋ, Nâda da Abiyu ka pá ḿbɔ ǹyéei ma. Ka Eezuɛ nuu-pɔlɔ-ŋai buu lɔ́ɔlu mɛi feerɛ síɣe ka dia-ni ká pá ká tɔ́ɔ kwaa kôya ma ká ḿvɛli. 2Mose ǹyaa tɔnɔ é lɛ́ɣɛ ŋ́gɔlɛ, kɛ́lɛ ǹúui, kpéli-ŋai dífe lɛ̀ɣɛ ŋ́gɔlɛ. Da núu da dífe pà ǹyéei ma.”

3Nya ƃe Mose è pà é Yâwɛɛ wóo-ŋai da ŋɔtɔ̂ŋ-ŋai su kula ǹûai dîa. Ǹûai kélee dí Mose wóo su tòo dîyɛɛ mai, “Mɛni-ŋai kélee Yâwɛɛ è mòi kwa pâi gɛ̂i.” 4Mose è Yâwɛɛ wóo-ŋai kélee pɔ̃yɛ. Nya ƃe è mu sìɣe a ɣele-wala pɛpɛ é Ɣâla-teƃele kpɛtɛ ǹyéei koo mu. È kɔni puu káo feerɛ tɔ́ɔ naa a kili-too-ŋa yɛ̂ɛ berei Eezuɛ-ŋai dísuu puu káo feerɛi káa lai. 5Mose è Eezuɛ nyáŋkpa-ŋa tɛ̀ɛ nyii-ŋai kéreŋ sala kùla naa dí laoi-laa sala kula a niŋa-sirɛ Yâwɛɛ mai. 6Nya ƃe Mose è ǹiŋa ŋãai da pù sɛŋ-folo-ŋa su é da táa ŋ̀âla-teƃelei ma. 7È Gbanaŋ-wooi maa kɔlɔi sìɣe é ǹóno ǹûai kélee dí mɛni. Nya ƃe dí mò dîyɛɛi, “Mɛni-ŋai kélee Yâwɛɛ è mòi kwa pâi gɛ̂i kú ŋ̀óo mɛni.”

8Nya ƃe Mose è niŋa ŋãai siɣe é dáa ǹûai dîa ǹyɛɛi, “Gbanaŋ-wooi maa ŋãai ká ŋí nyii Yâwɛɛ è gɛ̀ káyêei yɛ̂ɛ berei ŋ̀óo-ŋai ŋí kélee káa lai.”

9Mose, Eelɔŋ da Nâda é pɛ́lɛ Abiyu ma dí lì da Eezuɛ nuu-pɔlɔ buu lɔ́ɔlu mɛi feerɛi ǹyéei ma. 10Dí Eezuɛ-ŋai Díɣâlai kàa. Sɛŋ da è kɛ̀ Ɣâla kɔ́ɔ mu gɛɛ yɛ̂ɛ kɔni-ƃela bûluŋ kɛ́ɛ, nyii kɛ̀ a ma ponoɔɔ yɛ̂ɛ ɣele-kɔlɔŋ. 11Ɣâla fé ǹyée pɛlɛ ní Eezuɛ-ŋai túɛ-ƃelai dîa. Dí Ɣâla kàa, dí dílaa mii dí díkpele da dîa-ni.

Mose káa Sana Yeei ma

12Yâwɛɛ è mò Mose ma ǹyɛɛi, “Tɛ́ ḿbɔ naa ǹyéei ma í maa kpɛ́ŋ naa. Ŋa pâi kɔni-ƃela-ŋa tɛɛ̂i ípɔ nyii-ŋai ŋá dɔ̂ŋ-ŋai pɔ̃yɛ dîa ǹûai téniŋ tɔɔ-mɛni mai.” 13Nya ƃe è mu sìɣe da ǹyée-mu-ǹúui Zasua dí tɛ́ Ǹyéei maa waai ma. 14Mose è mò ǹúu pɔlɔ-ŋai dîa ǹyɛɛi, “Ka kúmaa kpɛ́ŋ ƃɛ́ é lɛ́ɛ la zu kú pá pôlu. Eelɔŋ da Ɔ̂ɔ díkaa kákɔlɛ. Laa-saa à tèe kásama ka lí dípɔ.”

15Nya ƃe Mose è tɛ̀ ǹyéei ma, ŋ̀ele-kɔlɔŋ-kolei é ǹyéei mɛi pɛ́lɛ. 16Yâwɛɛ ŋɔfólo-laai è yèŋ Sana Yeei mâ. Ŋ̀ele-kɔlɔŋ-kolei è ǹyéei mɛi pɛ́lɛ a fólo lɔ́ɔlu mɛi da. Mɛi feerɛ ɣelei Yâwɛɛ è Mose tòli é kúla ŋ̀ele-kɔlɔŋ-kolei su. 17Yâwɛɛ ŋɔfólo-laai è kɛ̀ Eezuɛ-ŋai ŋɛ́i yɛ̂ɛ ŋɔŋ ƃé ǹyéei ma kêrenii. 18Nya ƃe Mose è lɔ̀ ŋ̀ele-kɔlɔŋ kolei su é tɛ́ ǹyéei mâ. È kɛ̀ naa a ɣele-kûu buu náaŋ da kpíni-kûu buu náaŋ.

Currently Selected:

Ɛsedɔ 24: KWB

Highlight

Compare

Copy