Ɛsedɔ 30

Zâla-sɛŋ kúŋ nɛ̃ɛ kéreŋ ɣâla-teƃelei

(Ɛsedɔ 37:25-28)

1“Fɛ̂ɛ í kéreŋ-sɛŋ kúŋ nɛ̃ɛ kéreŋ ɣâla-teƃele kpɛtɛ. Gbɛtɛ a kpitili. 2M̀éla kélee é kɛ́ a bɔriɛɛ. Ŋɔkôya é kɛ́ a kɔ́ɔ-ƃɔlɔni tɔnɔ da gbûra. Ŋɔŋa-kɛtɛ kɛ́ ƃò a kɔ́ɔ-ƃɔlɔni tɔnɔ da gbûra. Ŋɔmɛi-koya é kɛ́ a kɔ́ɔ-ƃɔlɔni saaƃa. Da meɣêŋ-ŋai dí kɛ́ nɔ́ a díkpɛtɛɛ tɔnɔɔ. 3Fɛ̂ɛ í gôo kpîŋ-kpîŋ pú ma. Bú mɛi-pere da gɔ́ɔ ma í dínaŋ ma é pɛ́lɛ meɣêŋ-ŋai dîa. Gôo tínaŋ m̀â í doo gîei. 4Ziɣe-sãa feerɛ kpɛtɛ a gôo, í dípu gôo-ƃelai ma nyii dínâŋɔɔi mai mu-pere gwaa feerɛ ma a ŋ̀úru koya-ŋai lɔ̂i nyii-ŋai díkaa a ziɣe-wuru-ŋai. 5Ŋ̀úru kôya-ŋai kpɛtɛ a kpitili í gôo pú dîa. 6Zâla-sɛŋ kúŋ nɛ̃ɛ kéreŋ ɣâla-teƃelei sée gono-tee gãlai kɔlɛ zeɣei ŋɛ́i-tuɛ nyii gáa Gwaa Maa Waai da Gwaa Maa Waai Ŋɔkwaa Maa Waai loai. Nàa ƃé ŋa pâi íkâai naa. 7Fɛ̂ɛ Eelɔŋ é sâla-sɛŋ kúŋ nɛ̃ɛ kéreŋ zâla-sɛŋ kúŋ nɛ̃ɛ kéreŋ ɣâla-teƃelei ma a ɣele-wala kélee tãi a kɛ̂ laŋpoi kpɛtɛi lai. 8É géreŋ ŋɔ́nɔ ma a ɣele-wulii tãi a kɛ̂ laŋpoi tɔɔ̂i. Ka zâlai ŋí kúla ŋɛ́i-tuɛ a ɣele kélee káfulu-laai su da kásuui wɔlɔ-wɔlɔ da wɔlɔ-wɔlɔ. 9Káfe sâla-sɛŋ kúŋ nɛ̃ɛ kèreŋ m̀a nyii maa fé waa níi. Káfe fɛnɛ-sɛŋ kèreŋ m̀a a sâla, kpaa máŋ mii-sɛŋ sala, káfe kpólo sala kùla ma máŋ. 10Eelɔŋ é sɔnyɔ̂ŋ su-mɛni lɛɛ sâla kula géreŋ-sɛŋ kúŋ nɛ̃ɛ kéreŋ ɣâla-teƃelei ŋɔƃeɣêŋ-ŋai dîa tɔnɔ a kóraŋ kélee. Zuai è zɔnyɔ̂ŋ su-mɛni lɛɛ salai kùla lai, fɛ̂ɛ é ŋãa sía ƃeɣêŋ-ŋai dîa tɔnɔ a kóraŋ kélee. Ka gɛ́ tí a kóraŋ kélee káfulu-laai su da kásuui. Maa waâi ŋɛ́i.”

Yâwɛɛ ŋɔsua-kɔlɔ seɣe pɛrɛ maa waai mu ŋuŋ-fela-fei

11Nya ƃe Yâwɛɛ è mò Mose ma ǹyɛɛi, 12“ƃà kɛ̀ Eezuɛ-ŋai lônoi fɛ̂ɛ díkelee dí dífulu-laai maa fela-fei kɛ́ tɛi-tɛi a gɛɛ tãi ƃà dílònoi lai, mɛni kpɔ̂lu fé pà dípɔ. 13Ǹyaŋ ǹúui kélee da nònoi, fɛ̂ɛ é nyíŋi kɔ́lɛ. Sɛŋ-kao nyii ŋɔwiɛ káa yɛ̂ɛ berei ŋ̀âla-pɛrɛ kɛ́tɛi è nɛ̀ lai. Fɛ̂ɛ ǹúui kélee dí nyíŋi kɔ́lɛ ḿâ a sama-sɛŋ. 14Ǹúui kélee da nònoi, zu-kulai ƃa núu ŋɔkóraŋ è sìɣe kóraŋ buu feerɛ ma é tɛ́ tuɛ-pere, fɛ̂ɛ é zɛŋ-kaoi ŋí kɔ́lɛ ḿâ. 15Tãi kà kɛ̀ zɛŋ-kaoi ŋí kɔlɛ̂i la ḿâ káfulu-laai mɛni mai, tɔɔ-nuu fé dámaa kɔ̀lɛ é tɛ́ɛ ǹyii mâ gáa a sɛŋ é gɔlɛi. Kôlo-nuu fé guro-te kɔ̀lɛ é tɛɛ nyii mâ gáa Dɔŋ-la woo mai. 16Zɛŋ-kaoi ŋí sóŋ Eezuɛ-ŋai yêei í gɔlɛ ŋasua-kɔlɔ seɣe pɛrɛ maa waaii mu tii kɛ́ mɛni ma. Nyíŋi a pâi Eezuɛ-ŋai maa mɛni lɛɛ̂i ŋ́gili ŋá, ǹyaŋ nyíŋi a pâi kɛ̂i a kúfulu-laai maa fela-fei”

Mara sɛŋ-foloi

17Nya ƃe Yâwɛɛ è mò Mose mà ǹyɛɛi, 18“Sɛŋ-folo kpɛtɛ a ƃara, í zee-sɛŋ kpɛtɛ máŋ a ƃara. Zee ŋasua kɔlɔ seɣe pɛrɛ maa waai loai da ŋ̀âla-teƃelei, í yá pú zu. 19Eelɔŋ da ǹônii da pâi kɛ̂i díyee da díkɔɔ maa waâi zu. 20Tãi da lɔ̀ la Yâwɛɛ ŋɔsua kɔlɔ seɣe pɛrɛi maa waai mui, kpaa máŋ dí lɛɣɛ ŋ̀âla-teƃelei kɔlɛ sâla láa soŋ-tii kɛ́-mɛni ma, a gɛɛ dí kéreŋ sala kula mî, fɛ̂ɛ dí díwaa. À wàla kɛ́ tí, da pâi saâi. 21Fɛ̂ɛ dí díyee da díkɔɔ ma waa. Ǹyaŋ tɔ̂ŋ ká ŋí dímɛni ma da dísuui wɔlɔ-wɔlɔ da wɔlɔ-wɔlɔ.”

Bù ŋ̀ûa wulɔi

22Yâwɛɛ è mò máŋ Mose mà ǹyɛɛi, 23“Zɛŋ kúŋ nɛ̃ɛ-ŋai ŋí síɣe, wúru mãlaŋ kúŋ nɛ̃ɛ nyii ŋɔwiɛ káa a pãŋ puu káo feerɛi, sinimɔŋ kúŋ nɛ̃ɛ ŋɔpãŋ lɔ́ɔlu mɛi da, gûyɛ-wuru kúŋ nɛ̃ɛ ŋɔpãŋ lɔ́ɔlu mɛi da, 24da kasia ŋɔpãŋ puu káo feerɛ, nyii-ŋai díwiɛ káa yɛ̂ɛ berei ŋasua-kɔlɔ seɣe pɛrɛ maa waai è nɛ̀ lai, da wúlɔ wuru ŋɔwúlɔ sâne lɔ́ɔlu. 25Zãai ŋí sumo a gîe yɛ̂ɛ berei wúru-ya kpɛtɛ-nuu a gɛ̀ lai, í díkpɛtɛ a wúlɔ maa waa tíi maa waa kɛ́-mɛni ma. 26Bú ŋasua kɔlɔ seɣe pɛrɛ maa waai ma da gono-tee gãlai. 27Í bú ŋ̀âla-teƃelei ŋá da maa sãai kélee, laŋpo tɔɔ-wurii da maa sãai, zâla-sɛŋ kúŋ nɛ̃ɛ kéreŋ ɣâla-teƃelei, 28géreŋ sala kula ɣâla-teƃelei da maa sãa kélee é pɛ́rɛ nyá sɛŋ-foloi ma da pâi kɛ̂i a dímaa waa. Sɛŋ kélee pâi lɛɣɛ̂i diai, a pâi kɛ̂i a maa waa. 29Bere sîi ŋí ƃé fɛ̂ɛ í zãai ŋí sée la. Ǹyaŋ da pâi kɛ̂i a dímaa waa. Sɛŋ kélee pâi lɛɣɛ̂i diai, a pâi kɛ̂i a maa waa. 30Bú Eelɔŋ ŋûa da ǹônii í dísee a gɛɛ í sâla láa-soŋ-tii kɛ́ mî. 31M̀ó Eezuɛ-ŋai dîa yɛ̂ɛi, ‘Ŋ̀úlɔi ŋí é kɛ́ a ŋáwulɔ maa waa tíi maa waa kɛ́-mɛni ma káfulu-laai su da kásuui. 32Káfe bù núu kpɛ́ni ŋûa, káfe tela wúlɔ da kpɛ́ni kpɛtɛ yɛ̂ɛ ǹyaa. Maa waâi, ǹyaŋ fɛ̂ɛ ká ziɣe a maa waa. 33Ǹúui pâi wúlɔ kpɛtɛ̂i yɛ̂ɛ ǹyaai, kpaa máŋ é da pú ǹúui ma vé a sâla láa-soŋ-nuui, ma nuui ŋɔnûa da pâi gulâi dísama.’ ”

Géreŋ-sɛŋ kúŋ nɛ̃ɛi

34Yâwɛɛ è mò Mose mà ǹyɛɛi, “Zãai ŋí síɣe tɛi-tɛi a bɔriɛɛ, sate, onika, gabaluŋ, tuma-laa kúŋ nɛ̃ɛ da wúru mãlaŋ kúŋ nɛ̃ɛ. 35Dísumo a gîe yɛ̂ɛ berei wúru-ya kpɛtɛ-nuu a gɛ̀ lai. Í díkpɛtɛ a kéreŋ-sɛŋ kúŋ nɛ̃ɛ. Fɛ̂ɛ kpolo é kɛ́ zu, é kɛ́ a maa waa. 36Da fũa í da pú Gbanaŋ-woo kɛ́ɛ maa gãlai ŋɛ́i-tuɛ ŋásua kɔlɔ-seɣe pɛrɛ maa waai mu ƃɛ́i ŋa pâi kákâai naai. Fɛ̂ɛ ká géreŋ-sɛŋ kúŋ nɛ̃ɛi ŋí síɣe a maa waa. 37Géreŋ-sɛŋ kúŋ nɛ̃ɛi nyii ka pâi gbɛtɛ̂i a zãâi ŋí, káfe da gbɛ̀tɛ kákpîŋ mɛni ma. É kɛ́ kámɛni ma a nyii ma waâi ŋɛ́i. 38Ǹúui pâi da kpɛtɛ̂i a bere sii tí é gɛ́ a wúru-yai, maa ǹúui ŋɔnûai da pâi gulâi dísama.”

Currently Selected:

Ɛsedɔ 30: KWB

Highlight

Compare

Copy