Ɛsedɔ 31
31
Yâwɛɛ ŋɔsua-kɔlɔ seɣe pɛ́rɛ maa waai tɔɔ-ƃelai
(Ɛsedɔ 35:30--36:1)
1Yâwɛɛ è mò Mose mà ǹyɛɛi, 2“Ŋa Bɛzale lɛ́ nyii gáa a Ɔ̂ɔ ǹóŋ Uli ŋɔlóŋ, nyii kùla Zuda ŋɔsuui sui. 3Ŋa ǹáa fɛ́ɛ a ŋámɔ̂leŋ, táre mɛni-ŋa-káa da yɛrɛ sii kélee, 4a gɛɛ é yɛrɛ tîi-ŋa kɛ́ mɛni kpɛtɛ, a gɛɛ gɛ́ tii-ŋa kɛ́ a gôo, káne, da ƃara, 5kɔni sɔ̃ɔ kpanaŋɔɔ-ŋa kpɛ̀tɛ zee mɛni mâ gîe mɛi, wúru saa-mɛni da yɛrɛ tii da kpɛ́ni-ŋa. 6Ŋa Aisama ǹóŋ Oôlia lɛ́ nyii kùla Daŋ ŋɔsuui sui, a gɛɛ da ǹyaa dí tíi kɛ́. Ŋa táre tɛ́ɛ ǹyɛrɛ tii kɛ́-ƃelai kpéli-ŋai kélee pɔ́ a gɛɛ dí mɛni-ŋai kɛ́ ŋá m̀ó yâ a gɛɛ í gɛ̂i. 7Ŋásua-kɔlɔ seɣe pɛrɛ maa waai, Gbana-woo kɛ́ɛ maa gãlai da mɛi-pɛlɛ-sɛŋ é pɛ́lɛ bɛ́rɛi mu-sãai kélee dîa, 8teƃelei da maa sãa kélee, laŋpo see-wurii nyii gáa a gôoi da maa sãa kélee, zâla-sɛŋ kúŋ nɛ̃ɛ kéreŋ ɣâla-teƃelei, 9géreŋ sala kula ɣâla-teƃelei da maa sãa kélee, nya sɛŋ-foloi da zee-sɛŋ, 10díi-kɛ seɣe maa waa-ŋai nyii-ŋai díkaa Eelɔŋ da ǹônii mɛni mai, 11ŋulɔ maa waai da géreŋ-sɛŋ kúŋ nɛ̃ɛi nyii gáa Gwaa maa waai mɛni mai. Fɛ̂ɛ dí mɛni-ŋai ŋí kélee kɛ́ yɛ̂ɛ berei ŋá mò la yâi.”
Vii-tɔɔ-ɣelei
12Yâwɛɛ è mò Mose mà ǹyɛɛi, 13“Mó Eezuɛ-ŋai dîa a gɛɛ dí ŋáfii-tɔɔ ɣelei mɛi káa. Kpɛ́ni fêi, gáa a ŋɛi-kɛ-maa kwa kâa-ni kúloai da kásuui a gɛɛ ká gɔ́lɔŋ ńyãai a Yâwɛɛi ńyãa ƃe kámaa wâa. 14Mɛni ma ka Vii-tɔɔ ɣelei mɛi káa, kpɛ́ni fêi, maa waâi kámɛni ma. Ǹúui vé pâi ziɣêi a maa waâi, fɛ̂ɛ dí maa nuui páa. Ǹúui nyii pâi tíi kɛ̂i a Vii-tɔɔ ɣelei, fɛ̂ɛ maa nuui ŋɔnûa dí gula dísama. 15Ka tíi kɛ́ a fólo lɔ́ɔlu mɛi da, mɛi feerɛ ɣelei káa a fii-tɔɔ ɣele maa waa mɛni ma. Ǹúui pâi tíi kɛ̂i a ŋ̀elei tíi, fɛ̂ɛ dí maa nuui tí páa. 16Fɛ̂ɛ Eezuɛ-ŋai kélee dí Vii-tɔɔ ɣelei mɛi káa. Fɛ̂ɛ dísuui kélee é mɛi káa a wɔlɔ-wɔlɔ kono-tee. 17Fɛ̂ɛ é kɛ́ a wɔlɔ-wɔlɔ ŋɛi-kɛ-maa kwa Eezuɛ-ŋai kúloai. Kpɛ́ni fêi, Ńyãa ƃa Yâwɛɛ nyii ŋ̀elei kpɛ́tɛ da ǹɔii a fólo lɔ́ɔlu mɛi da, ŋá ḿvii tɔ́ɔ a mɛi feerɛ ɣelei.”
18Yâwɛɛ kpɛɛ a lónoɔɔ Mose pɔ́ Sana Yeei mai, è gili-too-ŋa kɔni-ƃela feerɛi tɛ̀ɛ bɔ́, nyii-ŋai ǹyaa Ɣâla è mɛi-ŋai pɔ̃yɛ dîa a ǹyée-gbuai.
Currently Selected:
Ɛsedɔ 31: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia
